上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
剩的土地的分配
18:1 以色列人的全會攏聚集佇示羅，搭會幕佇遐，因為地方已經互𪜶卡贏。
其他土地的分配
18:1 以色列人已經征服全地，全體會眾就來示羅聚集，佇遐設立會幕。
18:2 以色列人中猶有七支派未得著𪜶的業。
18:2 以色列人的中間有七個支族猶未分著𪜶的家業。
18:3 約書亞對以色列人講：「耶和華──恁列祖的上帝所賞賜恁的地，恁延迁去取伊，欲到底時啊？
18:3 約書亞就對以色列人講：「上主 — 恁列祖的上帝已經有賞賜恁土地，恁欲拖延到底時才去攻取？
18:4 恁逐支派著揀三人，我欲差𪜶去，𪜶就起身遍行彼個地，照𪜶的份額畫圖，就倒來我遮。
18:4 恁逐支族著揀三個人，我欲派𪜶行透全地；照逐支族應得的土地畫做地圖，才倒來我遮。
18:5 𪜶著將地分做七份；猶大猶原佇南方，𫢶佇伊的境內。約瑟家猶原佇北方，𫢶佇伊的境內。
18:5 𪜶著將全地分做七份；猶大猶原住佇南旁的境內，約瑟家住佇北旁的境內。
18:6 恁著將地分做七份，畫圖提來我遮。我就欲佇耶和華──咱上帝的面前，給恁拈鬮。
18:6 恁將彼七份土地完成製圖了後，提來我遮，我欲佇上主 — 咱的上帝面前為著恁抽籤。
18:7 獨獨利未人佇恁中間無份，因為耶和華祭司的職就是𪜶的業。迦得、流便，及瑪拿西半支派已經佇約但彼旁東勢得著地做業，就是耶和華的奴僕摩西所互𪜶的。」
18:7 利未人佇恁中間無分土地，因為做祭司服事上主就是𪜶的家業。迦得、呂便，及瑪拿西半支族，上主的僕人摩西已經將約旦河東旁的土地分互𪜶做家業。」
18:8 許個人起身去，約書亞命令許個去欲畫地圖的人講：「恁去遍行彼個地，畫圖倒轉來我遮。我欲佇示羅遮，耶和華的面前，給恁拈鬮。」
18:8 許個人欲出發的時，約書亞命令𪜶，講：「恁去行透全地，畫做地圖了後，閣倒轉來我遮；我欲佇示羅，佇上主面前為著恁抽籤。」
18:9 𪜶就去，遍行彼個地，照𪜶的城畫做七份，記佇冊裡，倒轉到示羅的營中見約書亞。
18:9 𪜶就去，行透全地，畫做地圖，將城鎮分做七份，記佇冊裡，倒轉來示羅營中，交互約書亞。
18:10 約書亞就佇示羅，耶和華的面前，給𪜶拈鬮。約書亞佇遐，分地互以色列人，照𪜶的宗族。
18:10 約書亞就佇示羅上主的面前，為著𪜶抽籤；佇遐，照以色列人的宗族分土地互𪜶。
分互便雅憫支派的土地
18:11 給便雅憫的支派，拈鬮照𪜶的宗族所得著的地，彼個界是佇猶大的子孫、約瑟的子孫的中間。
分互便雅憫支族的土地
18:11 便雅憫支族照𪜶的宗族抽籤得著的地，是佇猶大子孫及約瑟子孫的中間。
18:12 𪜶北旁的界是對約但河起，伊的界上去到耶利哥邊仔的北勢；閣上去，𨃟過山向西勢去，直直到伯‧亞文的曠野；
18:12 𪜶北旁的地界，對約旦河起，向北到耶利哥附近，閣向西𨃟過山，直直到伯‧亞文的曠野；
18:13 彼個界對遐去到路斯，到路斯南勢的邊仔（路斯就是伯特利），伊的界閣落去到亞他綠‧亞達，倚近下面的伯‧和崙南旁的山；
18:13 閣對遐向南經過路斯附近 (路斯就是伯特利)，閣落去亞他錄‧亞達珥，到倚近下‧伯‧和崙南旁的山。
18:14 伊的界對西勢，越落南，對伯‧和崙頭前南勢的山，直到猶大人的城基列‧巴力（就是基列‧耶琳）；這是𪜶西勢的界。
18:14 此個邊界對遐向西伸去，閣斡落南，對伯‧和崙頭前南旁的山，直到猶大人的城基列‧巴力 (就是基列‧耶琳)。這是𪜶西旁的邊界。
18:15 南旁是對基列‧耶琳的極頭起，伊的界對西勢出到尼弗多亞的水泉；
18:15 南旁對基列‧耶琳的邊界起，到尼弗多亞的水泉，
18:16 伊的界閣落去到便欣嫩山谷對面的山邊，就是利乏音山谷北勢的山；閣落去到欣嫩山谷，到耶布斯的南旁；閣落去到隱‧羅結；
18:16 閣落去到欣嫩子山谷對面的山腳，就是利乏音山谷的北旁；閣對遐經過欣嫩山谷，耶布斯 (就是耶路撒冷) 的南旁，落去到隱‧羅結；
18:17 閣對北勢出去到隱‧示麥，出去到亞都冥山坪對面的基利綠；閣落去到流便的子波罕的石磐；
18:17 閣向北經過隱‧示麥，出去到亞都冥山坪對面的基利綠，閣落去到波罕的石磐 (波罕是呂便的子)。
18:18 閣去亞拉巴對面北勢的邊仔，落去到亞拉巴；
18:18 閣向北經過亞拉巴的邊界，落去到亞拉巴，
18:19 伊的界到伯‧曷拉北勢的邊仔，此個界直直到鹽海北旁的海灣，就是約但南勢的河口；這是伊南旁的界。
18:19 閣經過伯‧曷拉北旁的交界，直直到鹽海北旁的海灣，就是約旦河南旁的河口。這是便雅憫南旁的邊界；
18:20 東旁的界到約但河。這是便雅憫人的業照𪜶的宗族，𪜶四圍的交界。
18:20 東旁的邊界到約旦河。這是便雅憫人照𪜶的宗族，順四圍的邊界分著的家業。
18:21 便雅憫的支派照𪜶的宗族所得著的城就是：耶利哥、伯‧曷拉、伊麥‧基悉、
便雅憫支族分著的城鎮
18:21 便雅憫支族照𪜶的宗族分著的城，就是耶利哥、伯‧曷拉、伊麥‧基悉、
18:22 伯‧亞拉巴、洗瑪臉、伯特利、
18:22 伯‧亞拉巴、洗瑪臉、伯特利、
18:23 亞文、巴拉、俄弗拉、
18:23 亞衛、巴拉、俄弗拉、
18:24 基法‧阿摩尼、俄弗尼、迦巴，共十二座城，及伊的鄉社；
18:24 基法‧阿摩尼、俄弗尼，及迦巴，共十二座城及附近的庄社。
18:25 閣有基遍、拉瑪、比錄、
18:25 閣有基遍、拉瑪、比錄、
18:26 米斯巴、基非拉、摩撒、
18:26 米斯巴、基非拉、摩撒、
18:27 利堅、伊利毗勒、他拉拉、
18:27 利金、伊利比勒、他拉拉、
18:28 洗拉、以利弗、耶布斯（就是耶路撒冷）、基比亞、基列，共十四座城，及伊的鄉社。這是便雅憫人所得著的業，照𪜶的宗族。
18:28 洗拉、以利弗、耶布斯 (就是耶路撒冷)、基比亞，及基列，共十四座城及附近的庄社。這是便雅憫人照𪜶的宗族分著的家業。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。