上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
拍敗亞摩利人
10:1 耶路撒冷王亞多尼‧洗德聽見約書亞取艾城，一盡滅伊，款待艾城及伊的王，親像前款待耶利哥及伊的王一樣，閣聽見基遍徛起的百姓及以色列人立和約，徛起佇𪜶中間，
拍敗亞摩利人
10:1 耶路撒冷王亞多尼‧洗德聽著約書亞攻取艾城，刣死艾城的王，給𪜶完全剿滅，親像以前對待耶利哥及伊的王像款；閣聽著基遍的住民及以色列人定和平條約，及𪜶徛起，
10:2 就真驚；因為基遍是大城，親像一個京城，比艾城卡大，閣城內的人攏是勇士。
10:2 就真驚；因為基遍比艾城較大，親像一個京城，閣城內的人攏𠢕相刣。
10:3 對按呢耶路撒冷王亞多尼‧洗德差人去見希伯崙王何咸、耶末王毗蘭、拉吉王雅非亞，及伊磯倫王底璧，講：
10:3 耶路撒冷王亞多尼‧洗德就派人去見希伯崙王何咸、耶末王比蘭、拉吉王雅非亞，及伊磯倫王底璧，講：
10:4 「請恁上來我遮幫助我，咱通來去拍基遍，因為伊及約書亞及以色列立和約。」
10:4 「請恁來援助我；咱鬥陣來去攻打基遍，因為𪜶及約書亞以及以色列定和約。」
10:5 對按呢亞摩利人五個王，就是耶路撒冷王、希伯崙王、耶末王、拉吉王、伊磯倫王，大家聚集，及𪜶的軍隊上去，紮營佇基遍的對面，欲攻擊伊。
10:5 對按呢，耶路撒冷王、希伯崙王、耶末王、拉吉王、伊磯倫王，此五個亞摩利王攏導𪜶的軍隊，聚集紮營佇基遍的對面，欲進攻。
10:6 基遍人就差人去吉甲的營見約書亞，講：「你通勼手看你的奴僕，求你緊緊來遮拯救阮，幫助阮，因為徛起山地亞摩利人許個王攏聚集來攻擊阮。」
10:6 基遍人就派人去吉甲營地見約書亞，講：「你毋通勼手放拺你的奴僕；求你趕緊來解救阮，幫贊阮；因為住佇山區許個亞摩利王，攏聚集來欲攻擊阮。」
10:7 對按呢約書亞及伊一切的戰士，以及一切大力的勇士，攏對吉甲上去。
10:7 約書亞就及伊所有的戰士，以及強猛的勇士，對吉甲出發。
10:8 耶和華給約書亞講：「莫得驚𪜶；因為我已經將𪜶交佇你的手，𪜶無一人會徛住佇你的面前。」
10:8 上主對約書亞講：「毋免驚𪜶，因為我已經將𪜶交佇你的手；𪜶無一個人會當抵抗你。」
10:9 約書亞忽然到𪜶遐，因為伊對吉甲通暝上去。
10:9 約書亞對吉甲透暝上去，突擊亞摩利人。
10:10 耶和華互𪜶佇以色列人的面前紛亂。就佇基遍刣死𪜶真多，追趇𪜶，佇上伯‧和崙的路拍𪜶，到亞西加及瑪基大。
10:10 上主互𪜶佇以色列人的面前起混亂，以色列人就佇基遍給𪜶大大拍敗，追趇𪜶到伯‧和崙上崎的路，給𪜶拍到亞西加及瑪基大。
10:11 𪜶佇以色列人的面前逃走，佇伯‧和崙落去的時，耶和華對天落大雹佇𪜶的身上，到亞西加，互𪜶死。許個互雹拍死的，比以色列人用刀刣死的卡多。
10:11 𪜶佇以色列人的面前逃走；佇伯‧和崙落崎的所在，上主對天落大雹拍𪜶，直到亞西加，給𪜶拍死。許個互雹拍死的，比互以色列人用刀刣死的較多。
10:12 當耶和華將亞摩利人交佇以色列人的日，約書亞就給耶和華講，也佇以色列人的面前講：
日頭啊，你著停佇基遍的頂面；
月啊，你著停佇亞雅崙的山谷。
10:12 上主將亞摩利人交互以色列人彼日，約書亞佇以色列人的面前對上主講：
「日啊，著停佇基遍的頂面；
月啊，著停佇亞雅崙山谷。」
10:13 日頭就停啲，月就歇啲，
聽候百姓報仇佇𪜶的對敵。
此個事豈是寫佇雅煞珥的冊嗎？日頭停佇天的中央，無緊緊落去，約略有一日的久。
10:13 日頭就定定，月就無振動，直到以色列人拍敗𪜶的對敵。此個事有記載佇《雅煞珥記》。日頭停佇天的中央，無緊緊落去，大約有一日久。
10:14 以前，以後，無有親像彼一日，得著耶和華聽人的聲，是因為耶和華替以色列人交戰。
10:14 彼一日上主聽人的祈禱，以前以後攏無閣親像按呢發生，是因為上主為以色列交戰。
10:15 約書亞及以色列眾人倒來吉甲的營內。
10:15 約書亞及以色列眾人倒來吉甲的營地。
活掠亞摩利的五個王
10:16 彼五個王逃走，匿佇瑪基大的洞內。
活掠亞摩利五個王
10:16 彼五個王逃走，匿佇瑪基大的山洞內。
10:17 有人去給約書亞講：「彼五個王已經尋著啦，攏匿佇瑪基大的洞內。」
10:17 有人去給約書亞報告，講：「彼五個王已經尋著啦，攏匿佇瑪基大的山洞內。」
10:18 約書亞講：「徙大塊石到洞口，派人𫢶遐顧守𪜶，
10:18 約書亞講：「徙大塊石給洞口塞起來，派人𫢶遐顧守；
10:19 總是恁通停腳，著追趇恁的對敵，拍𪜶的後隊，通容允𪜶入𪜶的城，因為耶和華──恁的上帝已經將𪜶交佇恁的手。」
10:19 毋拘恁著繼續追趇恁的對敵，對後面給𪜶攻擊，毋通互𪜶入𪜶的城；因為上主 — 恁的上帝已經將𪜶交佇恁的手。」
10:20 約書亞及以色列大大刣死𪜶，到一盡剿滅才息；其中剩的人攏入堅固的城。
10:20 約書亞及以色列人給𪜶拍敗，給𪜶徹底消滅；只有賰一寡人走入去堅固的城；
10:21 眾百姓就安然倒來瑪基大的營，到約書亞遐。無一人敢出聲攻擊以色列人。
10:21 以色列眾人安全倒來瑪基大的營地，到約書亞遐。以後，無一個人敢出聲反對以色列人。
10:22 約書亞講：「開洞口，掠彼五個王出洞，來我遮。」
10:22 約書亞講：「拍開洞口，給彼五個王掠出來我遮。」
10:23 𪜶就按呢行，掠彼五個王，就是耶路撒冷王、希伯倫王、耶末王、拉吉王、伊磯倫王，對洞內出來，帶到伊遐。
10:23 𪜶就將彼五個王：耶路撒冷王、希伯崙王、耶末王、拉吉王、伊磯倫王，對洞內掠出來，帶去伊遐。
10:24 掠許個王出來到約書亞遐的時，約書亞就叫以色列眾人來，對許個及伊相及去的軍長講：「恁近前來，將腳踏佇諸個王的頷頸。」𪜶就近前來，用腳踏佇𪜶的頷頸。
10:24 𪜶掠許個王出來到約書亞遐的時，約書亞叫以色列眾人來，對許個及伊做夥去的軍官講：「恁來頭前，腳踏諸個王的頷頸。」𪜶就來頭前，用腳踏佇許個王的頷頸。
10:25 約書亞對𪜶講：「恁莫得驚，也莫得愞。著勇敢壯膽，因為恁所欲攻擊一切的對敵耶和華欲按呢款待𪜶。」
10:25 約書亞對𪜶講：「恁毋通驚，毋通懍。著勇敢壯膽，因為上主會親像按呢對待所有恁欲攻擊的對敵。」
10:26 後來約書亞拍死𪜶，吊𪜶佇五欉樹。𪜶吊佇樹裡到下昏。
10:26 後來約書亞刣死彼五個王，給𪜶吊佇五欉樹頂面到黃昏。
10:27 日落的時，約書亞出令，就對樹裡收身屍落來，㧒佇𪜶所匿的洞，將幾若塊大石下佇洞口，到今猶佇啲。
10:27 日落的時，約書亞出令，對樹頂給𪜶的身屍收落來，㧒佇𪜶匿的山洞，用幾若塊大塊石頭疊佇洞口。許個石頭到今仔日猶佇遐。
約書亞攻取卡多的城
10:28 彼日，約書亞取瑪基大，用刀刣死𪜶及𪜶的王；彼內面的人一盡剿滅，無留一個。伊款待瑪基大的王，親像前款待耶利哥王一樣。
攻取閣較多亞摩利地區
10:28 像彼日，約書亞攻取瑪基大，用刀刣死城內所有的人及𪜶的王，連一個都無留啲。伊對待瑪基大的王，親像以前對待耶利哥王仝款。
10:29 約書亞及以色列眾人對瑪基大遐去到立拿，攻擊立拿。
10:29 約書亞及以色列眾人對瑪基大去攻打立拿。
10:30 耶和華將伊及伊的王交佇以色列人的手。伊用刀刣死伊，及彼內面的眾人，無留一個。伊款待伊的王，親像前款待耶利哥王一樣。
10:30 上主將此個城及伊的王交佇以色列人的手。約書亞用刀刣死彼個王及城內所有的住民，連一個都無留啲。伊對待立拿的王，親像以前對待耶利哥王仝款。
10:31 約書亞及以色列眾人對立拿遐去到拉吉，紮營佇伊的對面，來攻擊伊。
10:31 約書亞及以色列眾人對立拿去拉吉，紮營佇城的對面，欲攻打此個城。
10:32 耶和華將拉吉交佇以色列人的手。隔日就取伊，用刀刣死伊及彼內面的眾人，是照伊對立拿一切所行的。
10:32 上主將拉吉交佇以色列人的手；隔日𪜶攻取此個城，用刀刣死城內所有的住民，親像𪜶對待立拿仝款。
10:33 彼時基色的王荷蘭來欲幫助拉吉，約書亞就拍死伊及伊的百姓，攏無給伊留一個。
10:33 彼時，基色的王何蘭來欲援助拉吉；約書亞就拍死伊及伊的人民，連一個都無留啲。
10:34 約書亞及以色列眾人對拉吉去到伊磯倫，佇伊的對面紮營，攻擊伊。
10:34 約書亞及以色列眾人對拉吉去伊磯倫，佇城的對面紮營，欲攻打此個城。
10:35 彼日就取伊，用刀拍伊。佇彼日，一盡剿滅彼內面的眾人，是照伊對拉吉一切所行的。
10:35 仝彼日，𪜶攻取此個城，用刀刣死城內所有的人，親像𪜶對待拉吉仝款。
10:36 約書亞及以色列眾人對伊磯倫上去到希伯倫，攻擊伊，
10:36 約書亞及以色列眾人對伊磯倫去攻打希伯崙。
10:37 就取伊，用刀拍伊及伊的王，以及伊所屬的城，刣死彼內面的百姓，攏無留一個，是照伊對伊磯倫一切所行的，一盡剿滅伊，及彼內面的眾百姓。
10:37 𪜶攻取此個城，用刀刣死𪜶的王及城內的人，連一個都無留啲；閣攻取附近的城，剿滅𪜶所有的住民，親像𪜶對待伊磯倫仝款。
10:38 約書亞及以色列眾人倒來到底璧，攻擊伊，
10:38 約書亞及以色列眾人倒來攻打底璧。
10:39 就取伊及伊的王，以及屬伊的城，用刀拍伊一盡滅彼內面的眾人，無留一個。照伊前款待希伯倫的，今也款待底璧及伊的王，也照伊前款待立拿及伊的王一樣。
10:39 𪜶攻取此個城，掠𪜶的王，閣攻取附近的城，用刀刣死城內所有的住民，連一個都無留啲，親像以前對待希伯崙及立拿仝款。
10:40 按呢，約書亞拍全地，就是山地、南方的地、平洋、山坪，及𪜶攏總的王，無留一個。見有喘氣的一盡剿滅，照耶和華──以色列的上帝所命令的。
10:40 按呢，約書亞征服此個地區：山區、南旁的地、山埔、山坡地，以及此個地區的諸王；所有會喘氣的攏剿滅，連一個都無留啲，攏照上主 — 以色列的上帝的命令。
10:41 對加低斯‧巴尼亞到迦薩，閣歌珊全地，以及基遍，攏互約書亞拍。
10:41 對加低斯‧巴尼亞到迦薩、歌珊地區，以及基遍，攏互約書亞征服。
10:42 許個王及𪜶的地，約書亞做一時取𪜶，因為耶和華──以色列的上帝替以色列交戰。
10:42 許個王及𪜶的土地，約書亞佇一遍出征就攏給𪜶征服，因為上主 — 以色列的上帝為以色列交戰。
10:43 約書亞及以色列的眾人就倒來到吉甲的營盤。
10:43 約書亞及以色列眾人就倒來吉甲的營地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。