上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
基遍人欺騙約書亞
9:1 約但彼旁，或是佇山地，或是佇平洋，或是佇大海黎巴嫩相對的邊仔，赫人、亞摩利人、迦南人、比利洗人、希未人、耶布斯人諸個王，一下聽見這，
基遍人騙約書亞
9:1 住佇約旦河西旁的山區、山埔，以及地中海沿岸到黎巴嫩地區的赫人、亞摩利人、迦南人、比利洗人、希未人、耶布斯人，諸個王一下聽著以色列人刣贏的消息，
9:2 就攏聚集，同心合意欲及約書亞及以色列人交戰。
9:2 就攏聚集，同心合意，欲及約書亞，以及以色列人交戰。
9:3 總是基遍徛起的百姓聽見約書亞對耶利哥及艾城所行的事，
9:3 基遍的住民聽著約書亞按怎對待耶利哥及艾城，
9:4 就設詭計，假做使者，用舊的袋及破裂閣補的舊酒袋互驢馱伊，
9:4 就設計謀，假做使者，用驢仔載貯物件的舊布袋，及補過的舊酒袋；
9:5 腳裡穿過補的舊鞋，身軀穿舊衫；𪜶所備辦的餅攏是乾，閣臭醭。
9:5 穿補過的舊鞋及舊衫，帶焦閣碎碎的餅。
9:6 𪜶到吉甲營中見約書亞，對伊及以色列人講：「阮是對真遠的所在來的，今求你及阮立約。」
9:6 𪜶來到吉甲的營地見約書亞，對伊及以色列人講：「阮是對真遠的所在來的；今請及阮立約。」
9:7 以色列人對諸個希未人講：「豈採恁是徛起佇阮中間的；欲怎樣及恁立約啊？」
9:7 以色列人對諸個希未人講：「恁可能是此所在的住民，阮哪會當及恁立約？」
9:8 𪜶對約書亞講：「阮是你的奴僕。」約書亞問𪜶講：「恁是甚麼人？是對叨落來的？」
9:8 基遍人對約書亞講：「阮是你的奴僕。」
約書亞問𪜶講：「恁是什麼人，是對叨位來的？」
9:9 𪜶對伊講：「你的奴僕對極遠的所在來，為著耶和華──你上帝的名，因為阮已經聽見伊的名聲及伊佇埃及一切所行的，
9:9 𪜶對伊講：「你的奴僕對真遠的所在來；阮有聽見上主 — 你的上帝的名聲，就是伊佇埃及一切的所做，
9:10 以及伊佇約但彼旁對亞摩利二個王，就是希實本王西宏及佇亞斯他錄的巴珊王噩一切所行的事。
9:10 以及伊佇約旦河東旁對亞摩利兩個王，希實本王西宏及住佇亞斯他錄的巴珊王噩，一切的所做。
9:11 阮的長老及阮遐徛起的百姓就給阮講：『恁手著帶路裡用的食物去迎接𪜶，對𪜶講：阮是你的奴僕；今求你及阮立約。』
9:11 阮的領袖及阮遐的人攏給阮講：『恁著帶路中需要的食物去迎接以色列人，給𪜶講：阮是恁的奴僕，請及阮立約。』
9:12 阮出來欲來恁遮的日，對厝內帶出諸個餅做路中的路用，彼時猶燒燒；看啊，今已經攏乾，閣臭醭啦。
9:12 阮出發欲來恁遮的時，帶出來的餅猶燒燒，毋拘今已經攏焦閣碎碎去啦；
9:13 諸個酒囊，阮貯酒的時猶是新的；看啊，今已經破裂。阮諸個衫及鞋，也攏穿舊，因為路真遠。」
9:13 因為路真遠，諸個酒袋，貯酒的時猶是新的，毋拘今已經破裂；阮的衫及鞋嘛攏舊去啦。」
9:14 以色列人就對𪜶的食物提淡薄，也無請問耶和華。
9:14 以色列人檢查𪜶的食物，無問上主。
9:15 約書亞就及𪜶講和，及𪜶立約，容允𪜶活；會眾的首領也對𪜶咒誓。
9:15 約書亞就及𪜶定和平條約，無刣𪜶；會眾的領袖嘛對𪜶咒誓。
9:16 及𪜶立約了後，過三日才聽見𪜶是近近，𫢶佇𪜶中間。
以色列人發見受欺騙
9:16 以色列人及𪜶立約了後，過三日，才知𪜶原來住佇附近。
9:17 以色列起身，第三日到𪜶的城，許個城就是基遍、基非拉、比錄、基列‧耶琳。
9:17 以色列人出發，第三日來到𪜶住的城；許個城就是基遍、基非拉、比錄、基列‧耶琳。
9:18 因為會眾的首領已經指耶和華──以色列的上帝對𪜶咒誓，所以以色列人無拍𪜶；全會眾就哀怨許個首領。
9:18 因為會眾的領袖已經指上主 — 以色列的上帝對𪜶咒誓，以色列人就無給𪜶刣；因為按呢，民眾就不滿𪜶的領袖。
9:19 眾首領對全會講：「阮已經指耶和華──以色列的上帝對𪜶咒誓，今咱通磕著𪜶。
9:19 許個領袖對民眾講：「阮已經指上主 — 以色列的上帝對𪜶咒誓，所以咱毋通給𪜶磕著。
9:20 咱著按呢款待𪜶，容允𪜶活啲，驚了咱為著所對𪜶咒誓的受氣到佇咱。」
9:20 咱著留𪜶的性命，才免咱因為違背咒誓，互上帝給咱刑罰。」
9:21 首領閣對𪜶講：「著容允𪜶活。」對按呢𪜶就給會眾做破柴汲水的人，照首領所給𪜶講的話。
9:21 領袖閣對𪜶講：「著互𪜶活啲。」對按呢，基遍人就照領袖講的話，為著民眾破柴汲水。
9:22 約書亞叫𪜶來，給𪜶講：「啥事騙阮講『阮離開恁真遠』啊？其實恁是𫢶佇阮中間。
9:22 約書亞叫𪜶來，給𪜶講：「恁是按怎騙阮講『阮是對真遠的所在來的』？其實恁是此所在的住民。
9:23 今恁是受咒詛的！恁中間做奴才的永無斷，給我上帝的殿做破柴汲水的。」
9:23 所以恁著受上主責罰，恁中間不斷有人會做奴隸，為著阮上帝的厝做破柴汲水的。」
9:24 𪜶應約書亞講：「因為有人確實報你的奴僕講，耶和華──你的上帝曾命令伊的奴僕摩西，將此個全地賞賜恁，也佇恁的頭前剿滅此個所在一切徛起的百姓，所以阮因為恁的緣故驚了無命，才做此個代誌。
9:24 𪜶應約書亞講：「因為確實有人給你的奴僕講，上主 — 你的上帝有應允伊的僕人摩西，欲將此個全地賞賜恁，閣佇恁的頭前剿滅此個地所有的住民；阮因為驚互恁刣死才按呢做。
9:25 今阮佇你的手頭，你看做好做正直的，照按呢行來款待阮！」
9:25 今阮佇你的手頭；你通照你看做好，看做著的對待阮。」
9:26 約書亞就按呢款待𪜶，救𪜶脫離以色列人的手，所以𪜶就無刣𪜶。
9:26 約書亞就按呢對待𪜶，救𪜶免互以色列人刣死。
9:27 當彼日約書亞互𪜶給會眾及耶和華的壇，做破柴及汲水的人佇伊所欲揀的所在，到今仔日。
9:27 對彼日起，約書亞就互𪜶佇上主所揀選的所在，為著民眾及祭壇破柴汲水，直到今仔日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。