上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
亞干犯罪
7:1 總是以色列人佇應該獻的物有犯罪；因為猶大的支派中，謝拉的曾孫，撒底的孫，迦米的子亞干提應該獻的物；耶和華就受氣以色列人。
亞干犯罪
7:1 以色列人佇應該毀滅獻互上主的物有犯罪。猶大支族中，謝拉的曾孫，撒底的孫，迦米的子亞干提應該毀滅的物；上主就對以色列人發受氣。
7:2 約書亞對耶利哥差人去伯特利東勢、倚近伯‧亞文的艾城，吩咐𪜶講：「恁上去偷看彼個地。」𪜶就上去偷看艾的城。
7:2 約書亞對耶利哥派人去伯特利東旁，伯‧亞文附近的艾城，吩咐𪜶，講：「恁去探查彼個地。」𪜶就去探查艾城。
7:3 𪜶倒來到約書亞遐，給伊講：「免互眾百姓上去，大約二三千人上去拍艾城就好；免勞動眾百姓去到遐，因為遐的人少少。」
7:3 𪜶倒來約書亞遐，對伊講：「毋免互所有的人民攏去，干焦兩三千人去拍艾城就好；毋免勞動所有的人民，因為遐的人真少。」
7:4 對按呢百姓中約略三千人上去遐，竟然佇艾城的人的面前逃走。
7:4 所以大約有三千人去攻打，毋拘煞互艾城的人拍敗。
7:5 艾城的人刣死𪜶約略三十六人，𪜶對城門前追趕𪜶，到示巴琳，佇𪜶落低的所在拍死𪜶；眾百姓就失膽，軟弱親像水。
7:5 艾城的人對城門前追趇𪜶，到示巴琳落崎的所在拍死約略三十六個人。以色列人就攏驚甲神不附體。
7:6 約書亞就拆裂衫；伊及以色列的長老佇耶和華的櫃前仆佇土腳，到下昏，也用塵埃摻佇頭殼。
7:6 約書亞就拆裂衫；伊及以色列的長老佇上主約櫃的頭前仆佇土腳，閣用土粉糝頭殼，到下昏。
7:7 約書亞講：「唉啊！主耶和華啊，你啥事導諸個百姓過此個約但，將阮交佇亞摩利人的手，互阮滅無啊？可惜阮無掠𫢶佇約但彼旁做夠額。
7:7 約書亞講：「唉啊，至高的上主，你是按怎導諸個人民過約旦河，將阮交互亞摩利人，互𪜶給阮消滅？阮寧可留𫢶約旦河彼旁。
7:8 主啊，以色列人已經佇對敵的面前越轉身走，我猶有甚麼通講啊？
7:8 主啊，以色列人既然佇對敵面前越轉身逃走，我猶有什麼話通講？
7:9 因為迦南人及此所在一切徛起的百姓聽見就欲圍困阮，除滅阮的名佇地上。彼時你為著你的大名欲怎樣啊？」
7:9 迦南人及此所在的住民若聽著，一定會來包圍阮，給阮的名對地上除去；彼時你欲按怎維護你的大名？」
7:10 耶和華給約書亞講：「起來！你啥事按呢仆佇地裡啊？
7:10 上主給約書亞講：「起來，你是按怎仆佇土腳？
7:11 以色列犯罪，違背我所命令𪜶的約，取應該獻的物；也偷提，也行詭詐，囥佇𪜶的家器中。
7:11 以色列人犯罪，違背我命令𪜶的約，提應該毀滅獻互我的物；𪜶偷提，欺騙，藏佇𪜶的器具內。
7:12 因為按呢，以色列人佇對敵的面前徛𣍐住。𪜶佇對敵的面前越轉身走，是因為𪜶成做受咒詛；恁若無將應該獻的物對恁中間除去，我就無閣及恁相及佇啲。
7:12 因為按呢，以色列人刣𣍐贏對敵；𪜶佇對敵的面前越轉身逃走，是因為𪜶成做應該毀滅的。恁若無將應該毀滅獻互我的物，對恁中間除去，我就無閣及恁同在。
7:13 你起來，互百姓清氣，給𪜶講：『恁著家己清氣，備辦明仔日，因為耶和華──以色列的上帝按呢講：以色列啊，恁猶未交出彼個物，就佇對敵的面前恁欲徛𣍐住！』
7:13 起來！著互人民分別作聖，給𪜶講：『恁著家己分別作聖，為著明仔載準備。上主 — 以色列的上帝按呢講：以色列人，恁中間有應該毀滅的物，若無交出來，恁一定𣍐當抵抗對敵。』
7:14 明仔早起，恁著照恁的支派近前來；耶和華所取的支派，著照宗族近前來；耶和華所取的宗族，著照家眷近前來；耶和華所取的家眷，著照人丁，一個一個近前來。
7:14 明仔早起，恁著照支族來我遮；上主互叨一個支族抽著籤，𪜶的宗族著一個一個來我遮；上主互叨一個宗族抽著籤，𪜶的家族著一個一個來我遮；上主互叨一個家族抽著籤，𪜶的查甫人著一個一個來我遮。
7:15 受取著的人有應該獻的物佇伊遐，伊及伊所有的著受火燒；因為伊有背耶和華的約，閣因為伊佇以色列中有行戇戇的事。」
7:15 上主互伊抽著籤的人，就是有應該毀滅的物佇伊遐；伊及伊所有的攏著用火給𪜶燒滅，因為伊有違背上主的約，閣佇以色列中做愚戇的代誌。」
7:16 天光約書亞早早起來，互以色列人照支派近前來，取著的是猶大支派；
7:16 隔日，約書亞透早起來，互以色列人照支族來伊遐，抽著猶大支族；
7:17 互猶大的宗族近前來，就取著謝拉的宗族；互謝拉宗族的人丁，一個一個近前來，就取著撒底；
7:17 就互猶大照宗族來伊遐，抽著謝拉的宗族；就互謝拉照家族來伊遐，抽著撒底的家族；
7:18 互伊的家照人丁，一個一個近前來，就取著猶大支派的人謝拉的曾孫，撒底的孫，迦米的子亞干。
7:18 就互撒底家族的查甫人一個一個來伊遐，就抽著亞干；伊是猶大支族謝拉的曾孫，撒底的孫，迦米的子。
7:19 約書亞對亞干講：「我的子，我勸你著歸榮光耶和華──以色列的上帝，佇伊的面前認罪，將你所做的事給我講，通對我隱瞞。」
7:19 約書亞對亞干講：「我的子，我勸你著榮耀上主 — 以色列的上帝，佇伊的面前認罪，將你所做的代誌給我講，毋通對我隱瞞。」
7:20 亞干應約書亞講：「我實在得罪耶和華──以色列的上帝。我所做的事是按呢按呢：
7:20 亞干應約書亞講：「我實在有得罪上主 — 以色列的上帝。我所做的事是按呢：
7:21 我佇所搶的財物中看見一領示拿的媠衫，銀二百舍客勒，金一錠重五十舍客勒，我貪諸個物，就提伊。今埋佇我的布棚內的土腳下，銀佇伊的下底。」
7:21 我佇搶來的財物中看著一領巴比倫的媠衫、兩公斤的銀、半公斤的金條；我貪著諸個物，就提來。現在許個物件埋佇我布棚內面的土腳，銀佇上下底。」
7:22 約書亞就差人去，𪜶就去到伊的布棚。看啊，彼個物果然囥佇伊的布棚內，銀佇下底。
7:22 約書亞就派人走去亞干的布棚；許個物件果然藏佇伊的布棚內，銀佇上下底。
7:23 𪜶就對布棚內提出來，帶到約書亞及以色列眾人遐，下佇耶和華的面前。
7:23 𪜶就將許個物件對布棚提出來，帶來約書亞及以色列人民遐，下佇上主的面前。
7:24 約書亞及以色列眾人將謝拉的曾孫亞干及彼個銀、彼件衫、彼錠金，及伊的子查某子、牛、驢、羊、布棚，以及伊一切所有的，攏帶到亞割的山谷。
7:24 約書亞及以色列人民將謝拉的曾孫亞干，及許個銀、彼領衫、金條，及伊的子、查某子、牛、驢、羊、布棚，及伊所有的，攏帶去亞割山谷。
7:25 約書亞講：「你啥事害阮？今仔日耶和華也欲害你。」對按呢以色列眾人用石頭擲死伊，用火燒𪜶，將石頭擲𪜶。
7:25 約書亞講：「你哪會害阮抵著即呢大的災禍？今仔日上主嘛欲降災禍互你。」對按呢，以色列人民用石頭給亞干抌死，用火燒伊所有的，然後用石頭㧒佇彼頂面。
7:26 眾人佇伊的頂面疊一大堆的石，到佇今仔日。對按呢耶和華收回伊的大受氣。所以彼所在名叫亞割的山谷，到今仔日。
7:26 眾人佇亞干屍體的頂面疊一大堆石頭，到今仔日猶佇遐。對按呢，上主收回伊的大受氣。所以彼所在叫做亞割山谷，到今仔日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。