上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
立石為記
4:1 百姓已經一盡過約但，耶和華就吩咐約書亞講：
疊石頭做記號
4:1 全體人民已經過約旦河，上主吩咐約書亞，講：
4:2 「著對百姓中揀十二人，每支派一人，
4:2 「著對人民的中間揀十二人，每支族一個人；
4:3 命令𪜶講：『恁對遐，對約但河中、祭司的腳定定徛的所在，取十二塊石，帶伊及恁過去，下佇恁今暝欲歇的所在。』」
4:3 命令𪜶對約旦河中，祭司徛的所在，取十二塊石，帶過去，下佇恁今暝欲歇睏的所在。」
4:4 約書亞就照伊對以色列人中所備辦的彼十二人，每支派一人，攏叫𪜶來。
4:4 約書亞就將伊對以色列人所選出彼十二人，每支族一個，攏召集倚來。
4:5 約書亞就給𪜶講：「恁過去佇耶和華──恁上帝約櫃的頭前，到約但河中，照以色列人支派的數額，逐人取一塊石頭夯佇肩頭裡。
4:5 約書亞給𪜶講：「恁去約旦河中，到上主 — 恁的上帝約櫃的頭前，照以色列支族的數目，逐個人取一塊石頭夯佇肩頭頂；
4:6 通用此個佇恁中間做證據。日後，恁的子孫問恁講：『諸個石頭對佇恁甚麼意思？』
4:6 諸個石頭通佇恁中間做記號；將來恁的子孫若問恁：『諸個石頭對恁有什麼意思？』
4:7 恁就對𪜶講：『是因為前約但的水佇耶和華的約櫃前截斷；約櫃過約但的時，約但的水截斷。諸個石欲做以色列人永遠的紀念。』」
4:7 恁通對𪜶講：『是因為以前約旦河的水佇上主的約櫃前截斷；約櫃過約旦河的時，約旦河的水無閣流；諸個石頭欲做以色列人永遠的記念。』」
4:8 以色列人照約書亞所命令的來行，照以色列人支派的數額，對約但河中取十二塊石，攏照耶和華對約書亞所講的。𪜶就續帶𪜶過去，到𪜶歇睏的所在，就下佇遐。
4:8 以色列人聽約書亞的命令，照以色列人支族的數目，對約旦河中取十二塊石頭。𪜶照上主對約書亞的吩咐，帶許個石頭過河，下佇𪜶歇睏的所在。
4:9 約書亞另外用十二塊石竪佇約但河中，佇扛約櫃的祭司腳徛啲的所在；到今仔日，許個石猶久佇遐。
4:9 約書亞另外用十二塊石頭疊佇約旦河中，佇扛約櫃的祭司徛啲的所在；到今仔日，許個石頭猶佇遐。
4:10 扛約櫃的祭司徛佇約但河中，聽候耶和華命令約書亞對百姓講的事做明白，是照摩西所命令約書亞一切的話。
百姓就緊緊過去。
4:10 扛約櫃的祭司徛佇約旦河中，一直到上主通過約書亞對人民的命令攏完成，抵照摩西吩咐約書亞的話。
人民真緊過去。
4:11 眾百姓一盡過去，耶和華的約櫃及祭司就佇百姓的面前過去。
4:11 全體人民一下過河，上主的約櫃及祭司就佇人民的面前過去。
4:12 流便人、迦得人、瑪拿西半支派的人攏照摩西所對𪜶講的，帶軍器佇以色列人的頭前過去。
4:12 呂便人、迦得人、瑪拿西半支族的人，攏照摩西對𪜶講的話，帶軍器佇以色列人的頭前過去；
4:13 約略有四萬人攏備辦交戰，佇耶和華的面前過去，到耶利哥的平洋，便便欲交戰。
4:13 𪜶約略有四萬人帶軍器佇上主的面前過去，到耶利哥平原，準備好勢欲交戰。
4:14 當彼日，耶和華互約書亞佇以色列眾人的目睭前做大。佇伊一生的日，百姓敬畏伊，親像早前敬畏摩西一樣。
4:14 彼日，上主互以色列眾人尊約書亞做大；伊一生受人民敬畏，親像𪜶敬畏摩西按呢。
4:15 耶和華吩咐約書亞講：
4:15 上主吩咐約書亞，講：
4:16 「你命令扛法櫃的祭司對約但河上來。」
4:16 「你命令扛約櫃的祭司對約旦河起來。」
4:17 約書亞就命令祭司講：「恁對約但河上來。」
4:17 約書亞就按呢命令祭司。
4:18 扛耶和華約櫃的祭司對約但河上來，祭司的腳掌抵抵跨上乾地的時，約但河的水就流到原位，照舊漲滿雙旁的岸。
4:18 扛上主約櫃的祭司對約旦河起來；祭司的腳一下踏上岸，約旦河的水就回復原狀，親像以前漲滿雙旁岸。
4:19 正月初十日，百姓對約但上來，就安營佇吉甲，佇耶利哥東勢的界。
4:19 正月初十，以色列人民對約旦河上來，佇耶利哥東旁的吉甲紮營。
4:20 𪜶對約但所取彼十二塊石，約書亞就竪伊佇吉甲，
4:20 約書亞將𪜶對約旦河取來彼十二塊石頭，疊佇吉甲，
4:21 就對以色列人講：「日後恁的子孫問𪜶的老父講：『諸個石甚麼意思？』
4:21 然後對以色列人講：「將來恁的子孫若問𪜶的老父：『諸個石頭是什麼意思？』
4:22 彼時就著報恁的子知，講：『以色列人曾行乾地過此個約但河；
4:22 彼時著互恁的子孫知，講：『以色列人曾行焦地，過此個約旦河。』
4:23 因為耶和華──恁的上帝佇恁的頭前互約但的水乾去，聽候恁過來，親像耶和華──恁上帝前佇紅海所做一樣，就是互伊佇咱的頭前乾去，聽候咱過來，
4:23 上主 — 恁的上帝佇恁的頭前互約旦河的水焦去，聽候恁過河，親像伊早前佇紅海做的一樣，就是互河佇阮的頭前焦去，聽候阮過來；
4:24 欲互地上萬百姓攏知，耶和華的手有大能力，也欲互恁永遠敬畏耶和華──恁的上帝。』」
4:24 欲互全人類攏知，上主的手有大能力；嘛欲互恁永遠敬畏上主 — 恁的上帝。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。