上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
約書亞派偵探入耶利哥
2:1 嫩的子約書亞對什亭暗靜差二人做偵探，吩咐𪜶講：「恁去看彼個地及耶利哥。」𪜶就去，到一個娼妓喇合的厝，就歇佇遐。
約書亞派偵探入耶利哥
2:1 嫩的子約書亞對什亭暗中派兩個偵探，給𪜶講：「恁去探查彼個地，特別是耶利哥。」𪜶就去，到一個娼妓喇合的厝，就歇佇遐。
2:2 有人報耶利哥王講：「看啊，今暗有以色列人來遮偷看此個地。」
2:2 有人去給耶利哥王通報講：「今暗有以色列人來探查咱此個地。」
2:3 耶利哥王差人去喇合遐講：「許個來你遮、入你的厝的人，你著導𪜶出來，因為𪜶來，是欲偷看此個全地。」
2:3 耶利哥王就派人去喇合遐，講：「許個來恁厝的人，你著給𪜶交出來；𪜶來是欲探查咱的土地。」
2:4 婦仁人將彼二人囥密，就應講：「真正有人來我遮；總是𪜶對叨落來我知。
2:4 喇合將彼兩個人藏起來，就應講：「確實有人來我遮，毋拘𪜶對叨位來，我毋知；
2:5 日暗、欲關城門的時，許個人出去，𪜶去叨落我知。恁緊緊去趇，就會趇著。」（
2:5 日暗欲關城門的時，𪜶出去，去叨位我嘛毋知。恁趕緊去趇，就會趇著。」
2:6 總是婦仁人已經導𪜶上厝頂，將所排佇厝頂的麻稿來蓋𪜶。）
2:6 毋拘，婦仁人已經給彼兩個人導上厝頂，用排佇厝頂的麻稿給𪜶蓋啲。
2:7 許個人就按約但彼條路趇伊。到路頭趇𪜶的人一下出去，城門就關。
2:7 許個人就對欲去約旦河彼條路趇𪜶，趇到渡口；趇𪜶的人一下出去，城門就關起來。
2:8 二人猶未去睏，婦仁人就上厝頂，到𪜶遐，
2:8 彼兩個人猶未去睏，婦仁人上厝頂去尋𪜶，
2:9 對𪜶講：「我知耶和華已經將此個地賞賜恁，閣因為恁的緣故阮攏驚。此所在一切徛起的百姓佇恁的面前攏失膽；
2:9 對𪜶講：「我知上主已經將此個地賞賜恁，阮及此所在的住民一下聽著恁，攏驚甲破膽。
2:10 因為阮有聽見恁出埃及的時，耶和華怎樣佇恁的頭前互紅海的水乾去，閣恁怎樣款待約但彼旁二個亞摩利王西宏及噩，就是恁所毀滅的。
2:10 因為阮有聽著恁出埃及的時，上主按怎為著恁互紅海的水焦去；閣恁按怎對付約旦河東旁兩個亞摩利王，西宏及噩，給𪜶毀滅。
2:11 阮一下聽見諸個事，就失膽。因為恁的緣故，逐個神不附體。因為耶和華──恁的上帝佇天頂地下做上帝。
2:11 阮一下聽著諸個代誌就失膽，因為恁的緣故驚甲神不附體；因為上主 — 恁的上帝是天頂地下的上帝。
2:12 今我已經好款待恁，請恁指耶和華對我咒誓，欲好款待我老父的家，續互我一個實在的記號，
2:12 今，我有好款待恁，請恁指上主對我咒誓，欲好款待阮老父的家；閣互我一個確實的保證，
2:13 欲救活我的老父老母、我的兄弟、姊妹，及一切屬𪜶所有的，拯救阮的生命免死。」
2:13 通保護我的老父老母，我的兄弟姊妹，及阮家族的性命，互阮免死。」
2:14 二人應伊講：「你若無漏洩阮此個事，阮甘願用阮的生命替恁。到耶和華將此個地賞賜阮的時，阮欲用慈愛誠實款待你。」
2:14 彼兩個人應伊講：「阮用阮的性命保證。你若無漏洩阮的行蹤，到上主將此個地賞賜阮的時，阮欲用真誠仁慈款待你。」
2:15 對按呢伊用索對窗仔給𪜶墜落去；因為伊的厝起佇城牆，伊也徛起佇牆頂。
2:15 喇合就用索仔給𪜶對窗仔縋落去；因為伊的厝起佇城牆，伊嘛住佇城牆頂。
2:16 伊對𪜶講：「恁著上去山裡，驚了追趇的人抵著恁，著佇遐匿三日，聽候追趇的人倒來，然後才通行恁的路。」
2:16 伊對𪜶講：「恁著向山彼旁去，才免互追趇的人抵著；佇遐匿三日，聽候追趇的人倒來，才通倒轉去。」
2:17 二人對伊講：「你教阮所咒誓的，阮的確無為著彼個來犯罪。
2:17 彼兩個人對伊講：「阮一定會照你教阮咒誓的去做，毋拘你著照阮的話做。
2:18 阮若到此所在的時，你著將此條朱紅的索縛佇墜阮落去的窗仔裡，也著聚集你的老父老母、兄弟、及你的老父全家攏𫢶你的厝內。
2:18 阮來攻擊此所在的時，你著將此條朱紅色的索縛佇你給阮縋落去的窗仔，嘛著叫你的老父老母，兄弟姊妹，及你的家族攏聚集來你的厝內。
2:19 見若出你的家的門去街路的，伊的死是自取的，無阮的罪。見若及你佇厝內的，若有人下手害伊，就伊的死是阮的罪。
2:19 若有人對你的厝出去街路，互人刣死，是伊家己做得來的，無阮的責任；毋拘，佇你的厝內若有人互人刣死，此個罪就歸佇阮。
2:20 總是你若漏泄阮此個事，就你所教阮咒誓的及阮無干涉。
2:20 總是你若漏洩阮的行蹤，你教阮咒誓的就及阮無關係。」
2:21 伊講：「通照恁的話來行！」對按呢伊差𪜶去，𪜶就去，伊用朱紅的索縛佇窗仔。
2:21 喇合答應𪜶，然後送𪜶離開。伊就用朱紅色的索縛佇窗仔。
2:22 二人去到山裡，𫢶遐三日，聽候追趇的人倒去。追趇的人沿路尋𪜶，也尋無著。
2:22 彼兩個人去到山裡，佇遐匿三日，聽候追趇的人倒去；追趇的人沿路尋𪜶，嘛尋無。
2:23 二人就落山倒來，過河，到嫩的子約書亞遐，對伊講起𪜶所抵著一切的事；
2:23 彼兩個人落山，過河，到嫩的子約書亞遐，對伊報告𪜶所抵著一切的事。
2:24 閣對約書亞講：「耶和華果然用彼個全地交佇咱的手；彼所在一切徛起的百姓佇咱的面前攏失膽。」
2:24 𪜶閣對約書亞講：「上主真正將彼個地攏交佇咱的手；彼所在所有的住民，一下聽著咱，攏驚甲破膽。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。