上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約書亞記
上帝命令約書亞征服迦南
1:1 耶和華的奴僕摩西死了後，耶和華吩咐嫩的子約書亞，就是跟隨摩西的，講：
上帝命令約書亞征服迦南
1:1 上主的僕人摩西死了後，上主對摩西的助手，嫩的子約書亞，講：
1:2 「我的奴僕摩西死了啦。今你著起來，及眾百姓過此個約但，去我所賞賜以色列人的地。
1:2 「我的僕人摩西已經死；今你及所有的人民著準備好勢，過約旦河，去我所欲賞賜以色列人的地。
1:3 見若恁的腳掌所踏的地，我攏賞賜恁照我對摩西所講的。
1:3 照我對摩西的應允，恁的腳踏過的地，我攏欲賜互恁。
1:4 對曠野及此個黎巴嫩，到大河就是伯拉河，赫人的全地，閣到大海向日落的所在，攏欲做恁的境界。
1:4 恁的領土欲對南旁的曠野到北旁的黎巴嫩，對東旁的大河，就是幼發拉底河，赫人的全地，直到日落彼旁的地中海。
1:5 你一世人，的確無一人會徛住佇你的面前。我怎樣及摩西佇啲，也欲按呢及你佇啲；我的確無離開你，也無放拺你。
1:5 你一世人無人會當贏過你；我按怎及摩西同在，嘛欲按呢及你同在；我一定𣍐離開你，嘛𣍐放拺你。
1:6 你著勇敢壯膽！因為你欲互此個百姓得著彼個地做業，就是我對𪜶的列祖所咒誓欲互𪜶的。
1:6 你著勇敢壯膽，因為你欲導此個人民征服我對𪜶的祖先立誓欲賜互𪜶的地。
1:7 獨獨你著勇敢，大大壯膽，執守我的奴僕摩西所命令你一切的律法來行伊，通離開來偏左偏右，互你無論叨落去，攏得著亨通。
1:7 你一定著勇敢壯膽，遵行我的僕人摩西所命令你一切的律法，毋通偏左偏右。按呢，你無論去叨位攏會事事順利。
1:8 此個律法的冊通離開你的嘴，的確著暝日想伊，互你執守來行此個冊內所記載一切的話。按呢，就會互你的路平坦，你也得著大亨通。
1:8 你著常常讀此個律法的冊，暝日亦讀亦想，互你遵行此本冊所記一切的話；按呢你的路就會平坦，事事亨通。
1:9 我豈無命令你嗎？你著勇敢壯膽！莫得驚，也莫得愞；因為你無論叨落去，耶和華──你的上帝及你佇啲。」
1:9 我命令你：著勇敢壯膽，毋通驚，毋通懍；因為你無論去叨位，上主 — 你的上帝一定及你同在。」
約書亞吩咐百姓準備過河
1:10 對按呢，約書亞命令百姓的官長講：
約書亞準備過約旦河
1:10 對按呢，約書亞命令人民的官長，
1:11 「恁著遍行營中，命令百姓講：『恁著備辦食物；因為三日內恁欲過此個約但，入去得著耶和華──恁上帝所欲互恁得著的地。』」
1:11 去營中逐所在吩咐人民，講：「著準備糧食，因為三日內，恁欲過約旦河，入去承接上主 — 恁的上帝欲賜互恁的地。」
1:12 約書亞吩咐流便人、迦得人，及瑪拿西半支派講：
1:12 約書亞吩咐呂便人、迦得人，及瑪拿西半支族的人，講：
1:13 「恁著記得耶和華的奴僕摩西所命令恁的話講：『耶和華──恁上帝已經互恁平安，也欲將此個地賞賜恁。』
1:13 「恁著會記得上主的僕人摩西命令恁的話：上主 — 恁的上帝欲將恁佇遮安穩徛起的地賞賜恁。
1:14 恁的某，恁的囝仔，恁的精牲攏著住佇約但此旁、摩西所互恁的地；獨獨恁中間一切大氣力的勇士攏著帶軍器佇恁兄弟的頭前過去，幫助𪜶，
1:14 恁的某、囝仔，及恁的牲生，攏通住佇約旦河東旁，摩西分配互恁的地；毋拘恁中間所有強猛的勇士，攏著帶軍器，做恁同胞的先鋒過河，及𪜶做夥作戰，
1:15 到耶和華互恁的兄弟得著平安親像恁一樣，到𪜶也得著耶和華──恁上帝所賞賜𪜶的地，彼時恁才通倒去恁所得著的地，承接伊來做業，就是耶和華的奴僕摩西佇約但此旁、向日出的所在所互恁的。」
1:15 直到上主互恁的同胞及恁像款，得著上主 — 恁的上帝賞賜𪜶安穩徛起的地。彼時恁才通倒來恁所得著做產業的地，就是上主的僕人摩西分配互恁佇約旦河東旁的地。」
1:16 𪜶應約書亞講：「見你所命令阮的，阮欲行；你所差阮的，阮攏欲去。
1:16 𪜶應約書亞講：「你吩咐阮的，阮攏欲照按呢做；你派阮去叨位，阮攏欲去；
1:17 阮前佇一切的事怎樣聽趁摩西，今也欲按呢聽趁你；獨獨願耶和華──你的上帝及你佇啲，親像伊前及摩西佇啲一樣。
1:17 阮以前按怎順趁摩西，嘛欲按呢順趁你。願上主 — 你的上帝及你同在，親像及摩西同在仝款。
1:18 無論甚麼人違背你的命令，聽你的話照你一切所命令的，就欲互伊死。獨獨你著勇敢壯膽！」
1:18 無論什麼人違背你的命令，無欲順趁你的話，著互伊死。你一定著勇敢壯膽！」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。