上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
及外邦人分開
13:1 彼日，人讀摩西的冊互百姓聽，抵著冊內有記講，亞捫人及摩押人永遠𣍐得通入上帝的會；
將外族人分開
13:1 彼日，有人讀摩西的律法書互人民聽，讀著內面有按呢記載：亞捫人及摩押人永遠𣍐用得加入上帝的會，
13:2 因為𪜶無用食物及水來迎接以色列人，反轉請巴蘭來咒詛𪜶，總是阮的上帝互彼個咒詛變做祝福。
13:2 因為𪜶毋若無用食物及水迎接以色列人，顛倒倩巴蘭去咒詛以色列人；毋拘咱的上帝互彼個咒詛變做祝福。
13:3 𪜶聽見律法了後，就對以色列中分開許個雜族的人。
13:3 𪜶聽著此段律法了後，就將以色列人及許個有外族血統的人分開。
尼希米的改革
13:4 此個代誌以前，管理阮上帝殿內的房間的祭司以利亞實及多比雅結盟，
尼希米的改革
13:4 此個代誌以前，管理咱上帝聖殿府庫的祭司以利亞實，及亞捫人多比雅真有交情，
13:5 就為著伊備辦一間大間房，前佇彼間收囥素祭，乳香、器具，及照例供給利未人、唱歌者、顧門者、五穀、新酒，及油的十份一，及歸互祭司舉祭的物。
13:5 就為著伊準備一間大間房。此間房間以前啲收囥素祭、乳香、聖殿的器具，以及照規定供給利未人、獻詩的、守衛的五穀、新酒，及新油的十分一，以及攑高獻互上主，歸互祭司的物。
13:6 當彼時我無佇耶路撒冷；因為巴比倫王亞達設西三十二年，我越去王遐。過幾若日，我對王告假。
13:6 此個代誌發生的時，我無佇耶路撒冷；因為巴比倫王亞達薛西三十二年，我倒去王遐；過無偌久我閣對王請假。
13:7 我到耶路撒冷，就知以利亞實為多比雅所行的歹代佇上帝殿的院內為伊備辦一間房。
13:7 我到耶路撒冷才知以利亞實所做的歹代；伊為著多比雅佇上帝聖殿的埕準備一間房。
13:8 我就真迫腹，將多比雅一切的家器攏對房內㧒出去，
13:8 我就真受氣，將多比雅所有的家具攏㧒出去；
13:9 我出命令人就清氣許個房間，然後我將上帝殿內的器具及素祭、乳香閣搬入來。
13:9 閣命令人去潔淨房間，然後將上帝聖殿的器具、素祭，及乳香閣搬入去。
13:10 我也知利未人所應該得著的份額無互𪜶，致到擔當職的利未人及唱歌者逐個倒去𪜶的田園。
13:10 我嘛發見利未人應得的份額無互𪜶，當職的利未人及獻詩的煞著倒去家己的田園作穡。
13:11 我就出力責備許個官長給𪜶講：「上帝的殿啥事放荒廢啊？」我就聚集利未人，復倒𪜶的原任。
13:11 我就責備許個官長，給𪜶講：「是按怎上帝的殿放互荒廢？」我就聚集利未人，互𪜶回復職務。
13:12 對按呢猶大的眾人將五穀、新酒，及油的十份一帶入庫房。
13:12 對按呢，猶大人民將五穀、新酒，及新油的十分一帶入府庫。
13:13 我設立祭司示利米雅、經學士撒督，及利未人毗大雅做庫房的官管理庫房；副官是哈難。哈難是撒刻的子；撒刻是瑪他尼的子。因為看此幾人是盡忠，𪜶的職份是分發物互𪜶的兄弟。
13:13 我指派祭司示利米雅，經學教師撒督，及利未人比大雅管理府庫；閣派瑪他尼的孫，撒刻的子哈難做助手。𪜶攏真忠實，盡職將物件分發互𪜶的同事。
13:14 我的上帝啊，求你因為此個事著紀念我，莫得擦消我為著上帝的殿及其中許個典禮所行的好事。
13:14 我的上帝啊，求你記念我所做諸個事，毋通擦消我為著上帝的殿及服事伊所做的好事。
13:15 當許個日，我佇猶大看見人佇安息日踏酒窟，搬稻稛閣互驢載，閣用酒、葡萄、無花果，及逐樣的擔佇安息日擔入耶路撒冷，我就佇𪜶賣食物彼日責備𪜶。
13:15 佇彼段期間，我佇猶大看著人佇安歇日踏酒窟，搬麥捆互驢載，閣佇安歇日將酒、葡萄、無花果，及逐款貨物運入去耶路撒冷；我就佇𪜶買賣彼日責備𪜶。
13:16 閣有推羅人𫢶佇彼中間；帶魚及逐樣的貨物，佇安息日賣互猶大人佇耶路撒冷。
13:16 閣有住佇遐的泰爾人，帶魚及逐種貨物，佇安歇日，佇耶路撒冷賣互猶太人。
13:17 我就出力責備猶大許個貴族給𪜶講：「恁行此號歹干犯安息日是啥事啊？
13:17 我就責備猶大許個貴族，給𪜶講：「恁是按怎做此款歹代誌干犯安歇日？
13:18 前恁的列祖豈無按呢行，咱的上帝豈無將此個一切的災禍臨到咱及此個城嗎？今恁猶久犯著安息日，互受氣臨到以色列益發傷重！」
13:18 以前恁的祖先豈毋是嘛按呢做，互咱的上帝將這一切的災禍降落佇咱及此個城？現在恁猶久干犯安歇日，一定會互上帝對以色列發閣較大的受氣！」
13:19 佇安息日前，耶路撒冷城門黃昏的時，我就命令人關門，閣命令安息日未過身通開。我派我幾若個奴僕管理城門，免得有人佇安息日擔甚麼擔入來。
13:19 佇安歇日開始，黃昏的時，我命令人關耶路撒冷的城門，到安歇日過去以前𣍐用得開。我派幾若個部下管理城門，才免有人佇安歇日擔貨物入城。
13:20 對按呢生理人及販賣逐項貨物的，一二擺歇暝佇耶路撒冷的城外。
13:20 對按呢，生理人及販賣逐項貨物的人，有一兩遍佇耶路撒冷的城外過暝。
13:21 我就責備𪜶講：「恁啥事歇暝佇城門口啊？若閣按呢，我欲下手掠恁。」對此霎以後，𪜶佇安息日無閣來。
13:21 我就警告𪜶，講：「恁是按怎佇城牆外過暝？若閣按呢，我欲下手掠恁。」對彼時以後，𪜶佇安歇日就無閣來。
13:22 我命令利未人清氣家己，來顧守城門，互安息日做聖。我的上帝啊，求你因為此個事來紀念我，照你的大慈悲來疼惜我。
13:22 我命令利未人潔淨家己來顧守城門，互安歇日分別作聖。
我的上帝啊，求你記念我所做諸個事，照你豐盛的慈愛憐憫我。
13:23 當許個日，我也看見猶大人娶亞實突、亞捫、摩押的查某子做某。
13:23 佇彼段期間，我閣看著猶太人娶亞實突人、亞捫人、摩押人的查某子做某。
13:24 𪜶的子兒講話，一半講亞實突的話，𣍐曉講猶大的話，所講的就是照逐族的腔。
13:24 𪜶的子兒有一半講亞實突話，抑是別族的話，毋拘𣍐曉講猶大話。
13:25 我就大大責備𪜶，罵𪜶，拍𪜶幾若人，掇𪜶的頭毛，教𪜶指上帝來咒誓，講，恁通用家己的查某子嫁互𪜶的子，也通為恁的子恁本身娶𪜶的查某子。
13:25 我就責備𪜶，給𪜶咒詛，拍幾若個人，惙𪜶的頭毛，教𪜶指上帝咒誓，無欲閣將𪜶的查某子嫁互外族人的子，𪜶及𪜶的子嘛無欲娶外族人的查某子。
13:26 「以色列王所羅門豈是佇此號事犯罪嗎？佇多多國的中間無一個王親像伊，閣得著伊的上帝疼伊，上帝設立伊做以色列全國的王；總是外邦的查某子尚且互伊犯罪。
13:26 我給𪜶講：「以色列王所羅門豈毋是為著此款代誌犯罪？佇列國中，無一個王親像伊得著上帝的疼，閣得著上帝給伊設立做以色列全國的王；毋拘外族的某互伊犯罪。
13:27 按呢，阮豈聽恁行此號大歹，娶外邦的女子干犯咱的上帝嗎？」
13:27 按呢，阮哪通出在恁做此款嚴重的歹代，娶外族的女子，忤逆咱的上帝？」
13:28 祭司頭以利亞實的孫、耶何耶大的子，有一個是和倫人參巴拉的子婿，我就趕伊離開我。
13:28 大祭司以利亞實的孫，耶何耶大的子，有一個是和崙人參巴拉的子婿；我就將耶何耶大對我遮趕出去。
13:29 我的上帝啊，求你記得𪜶；因為𪜶拍垃墋祭司的職，背祭司利未人的約。
13:29 我的上帝啊，求你會記得𪜶所做的歹代；因為𪜶拍垃墋祭司的職務，違背利未人做祭司的的約。
13:30 按呢，我給𪜶除去一切外邦人的款，閣設立祭司及利未人的班，各盡𪜶的職。
13:30 按呢，我給𪜶潔淨，互𪜶脫離外族人一切的污穢，閣分派祭司及利未人的班次，互𪜶執行家己的職責，
13:31 料理定著期燒祭的柴以及起頭熟的土產。我的上帝啊，求你紀念我，賞賜我福氣。
13:31 定期奉獻柴料及初熟的果子。
我的上帝啊，求你記念我，施恩互我。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。