上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
以色列人承認𪜶的罪
9:1 此月二四日，以色列人聚集禁食，穿麻衫，摻火灰。
以色列人認罪
9:1 仝彼月二四日，以色列人聚集禁食，穿麻衫，糝土粉。
9:2 以色列的後裔就及一切外邦人隔開，徛啲認家己的罪惡及𪜶列祖的罪過。
9:2 以色列的後代及所有的外族人斷絕關係；𪜶攏徛啲認家己的罪，及𪜶列祖的罪過。
9:3 𪜶徛佇𪜶的所在用彼日的時間四份一讀耶和華──𪜶的上帝律法的冊，閣用時間的四份一認罪，敬拜耶和華──𪜶的上帝。
9:3 𪜶徛啲，用三點鐘讀上主 — 𪜶的上帝律法的冊，閣用三點鐘認罪，敬拜上主 — 𪜶的上帝。
9:4 耶書亞、巴尼、甲篾、示巴尼、布尼、示利比、巴尼、基拿尼徛佇利未人的台頂，大聲求叫耶和華──𪜶的上帝。
9:4 利未人耶書亞、巴尼、甲篾、示巴尼、布尼、示利比、巴尼，及基拿尼徛佇台頂，大聲哀求上主 — 𪜶的上帝。
9:5 利未人耶書亞、甲篾、巴尼、哈沙尼、示利比、荷第雅、示巴尼、毗他希雅講：「恁著徛起來謳咾耶和華──恁的上帝，對永遠到永遠。耶和華啊，你榮光的名是應該謳咾的！𨃟過一切的稱呼謳咾。」
9:5 利未人耶書亞、甲篾、巴尼、哈沙尼、示利比、荷第雅、示巴尼、比他希雅講：
「著起來，稱讚上主 — 恁的上帝，
直到永永遠遠！
上主啊，願你榮光的名得著謳咾，
超過一切的頌讚及謳咾。
認罪的祈禱
9:6 「你，獨獨你是耶和華！你創造天及諸個天的天，及天頂的萬軍，地及地上的萬物，海及海中的萬物，這一切攏是你所保存的。天軍也敬拜你。
9:6 「上主啊，只有你是上主！
你創造天、天頂的天，及天頂的萬象，
閣創造地及地上的萬物，
海及海中所有的；
你賞賜性命互萬物；
天軍嘛敬拜你。
9:7 耶和華啊，你是上帝，曾揀選亞伯蘭，導伊出迦勒底的吾珥，賞賜伊名叫亞伯拉罕。
9:7 你是主上帝，有揀選亞伯蘭，
導伊出巴比倫的吾珥，
給伊改名做亞伯拉罕。
9:8 你看伊的心盡忠佇你的面前，就及伊立約，應允將迦南人、赫人、亞摩利人、比利洗人、耶布斯人、革迦撒人的地互伊的後裔、閣有應驗你的話，因為你是公義者。
9:8 你知伊對你忠實，
及伊立約，
應允將迦南人、赫人、亞摩利人、比利洗人、耶布斯人、革迦撒人的土地互伊的後代，
閣實現你的話；
因為你是公義的。
9:9 「你曾看見阮的列祖佇埃及所受的困苦，聽𪜶佇紅海邊的哀求，
9:9 「你有看見阮的列祖佇埃及受苦，
聽見𪜶佇紅海海邊的哀求；
9:10 就行神蹟奇事責罰法老及伊的眾人臣，以及伊國內的眾百姓。因為你知𪜶驕傲款待阮的列祖，你就為家己得著名聲，親像今仔日一樣。
9:10 你知埃及人壓迫阮的列祖；
你行神跡奇事，攻擊法老、伊的人臣，及伊國內的人民；
你就得著名聲，親像今仔日按呢。
9:11 你佇𪜶的面前分開海，互𪜶對海中行乾地過去，追趇𪜶者你㧒𪜶佇深海，親像㧒石頭佇大水中；
9:11 你佇阮的列祖面前給海分開，
互𪜶對海中行焦地過去；
你將追趇𪜶的，㧒佇深海，
親像給石頭㧒落大湧。
9:12 又閣日時你用雲柱導𪜶，暝時你用火柱照光𪜶所行的路。
9:12 日時你用雲柱導𪜶，
暝時你用火柱照光𪜶著行的路。
9:13 你也降臨佇西奈山，對天裡及𪜶講話，賞賜𪜶正直的法度、真實的法度、好的律例及誡命，
9:13 你降臨佇西奈山，
對天頂及𪜶講話，
賞賜𪜶正直的命令、
真實的律法、好的規例及誡命；
9:14 閣互𪜶知你安息的聖日，也託你的奴僕摩西用誡命、律例、法度、命令𪜶。
9:14 你互𪜶知你安歇的聖日，
通過你的僕人摩西用誡命、規例，及律法教示𪜶。
9:15 為著𪜶枵就對天賞賜米糧，為著𪜶嘴乾就對石磐出水，閣命令𪜶去承接你所咒誓欲互𪜶的地。
9:15 「𪜶枵的時，你對天賞賜米糧；
𪜶嘴焦的時，你互石磐出水；
閣叫𪜶著去承接你立誓欲互𪜶的土地。
9:16 「總是𪜶及阮的列祖行代誌驕傲，硬𪜶的頷頸無聽趁你的誡命；
9:16 但是，阮的列祖驕傲自大，
硬心毋肯悔改，無聽趁你的誡命；
9:17 肯順趁，也無記念你佇𪜶中間所行的奇事，竟然硬𪜶的頷頸，佇悖逆中，家己設立首領，欲越倒去𪜶做奴才的地。總是你是歡喜赦免人，有恩典，憐憫，無快快受氣，有滿滿慈愛的上帝，也無放拺𪜶。
9:17 𪜶毋肯順趁，
無記念你佇𪜶中間所做的奇事，
竟然硬心毋肯悔改，家己設立領袖，
存心背逆，想欲越倒去𪜶做奴才的地。
總是，你是歡喜赦免人，
有恩典，有憐憫，
無快受氣，有滿滿慈愛的上帝；
嘛無放拺𪜶。
9:18 𪜶雖然鑄一隻牛仔，閣講『這是你的上帝曾導你出埃及者』，按呢大大激動受氣；
9:18 𪜶雖然鑄一隻牛仔，講
『這是導恁出埃及的上帝』，按呢大大褻瀆你；
9:19 你猶久大施憐憫，無放拺𪜶佇曠野。日時，雲柱無離開𪜶，導𪜶行路；暝時，火柱也無離開𪜶，照光𪜶及𪜶所著行的路。
9:19 毋拘你有極大的憐憫，
無放拺𪜶佇曠野；
日時，雲柱無離開𪜶，導𪜶行路；
暝時，火柱嘛無離開𪜶，照光𪜶著行的路。
9:20 你也賞賜你好的神來教示𪜶；你的嗎哪猶原互𪜶食無息，為著𪜶嘴乾賞賜𪜶水。
9:20 你賞賜你良善的神來教示𪜶，
無收回你的嗎哪互𪜶無物件通食；
𪜶嘴焦的時，猶原賞賜𪜶有水通飲。
9:21 佇曠野四十年，你養飼𪜶，𪜶就無欠缺一項：𪜶的衫無破，𪜶的腳無肨泡。
9:21 佇曠野四十年久你養飼𪜶，
互𪜶無欠半項；
𪜶的衫無破，
𪜶的腳無膨泡。
9:22 你將列邦及許個百姓互𪜶，分派𪜶佇逐角頭，𪜶就得著西宏的地、希實本王的地，及巴珊王噩的地。
9:22 「你將列邦及許個人民交互𪜶，
將周圍的土地分互𪜶；
𪜶得著希實本王西宏的地
及巴珊王噩的地。
9:23 你加添𪜶的子孫親像天星的多，導𪜶到彼個地就是你給𪜶的列祖講𪜶欲入去承接的。
9:23 你互𪜶的子孫親像天頂的星赫呢多，
導𪜶到你應允𪜶列祖欲互𪜶承接的地。
9:24 按呢，𪜶的子孫入去承接彼個地，你佇𪜶的面前制壓彼所在徛起的百姓，就是迦南人；將𪜶及𪜶的君王，及彼所在的百姓，攏交佇𪜶的手，互𪜶出在意思來款待𪜶。
9:24 𪜶的子孫入去承接彼個地，
你佇𪜶的面前制伏彼所在的住民迦南人，
將彼個地的君王及住民攏交佇𪜶的手，
出在𪜶的意思對待許個人。
9:25 𪜶取堅固的城、肥的土地、得著充滿逐樣好物的厝宅、開便便的水井、葡萄園、橄欖園，果子樹多多。𪜶得著食飽，身體肥，因為你的大恩，心內快樂。
9:25 𪜶攻取堅固的城、肥的土地，
得著囥滿逐款好物的厝宅，及開便便的水井、
葡萄園、橄欖園，及真多果子樹。
𪜶得著食飽，身軀肥；
因為你的大恩心內快樂。
9:26 「總是，𪜶順趁，竟然悖逆你，將你的律法㧒佇尻脊後，你的先知勸戒𪜶欲互𪜶歸向你，𪜶就刣死𪜶，大大激動受氣。
9:26 「毋拘𪜶竟然毋順趁，背逆你，
將你的律法㧒佇尻脊後；
𪜶刣死苦勸𪜶歸向你的先知，
大大褻瀆你。
9:27 所以你交𪜶佇對敵的手，受𪜶的苦楚。𪜶抵著苦難的時哀求你，你就對天俯落聽，照你的大憐憫互𪜶有拯救的人，救𪜶脫離對敵的手。
9:27 所以你將𪜶交佇對敵的手，互𪜶受苦楚；
𪜶抵著苦難的時哀求你，
你就對天頂俯落聽，
照你極大的憐憫，互𪜶有拯救者，
救𪜶脫離對敵的手。
9:28 總是𪜶得著平安了後，閣佇你的面前行歹，所以你放拺𪜶佇對敵的手，互對敵管轄𪜶。𪜶越倒轉哀求你的時，你猶原對天俯落聽，沓沓照你的憐憫拯救𪜶，
9:28 𪜶享受太平，煞閣佇你的面前做歹；
你棄拺𪜶，給𪜶交佇對敵的手，受對敵管轄；
𪜶越倒轉求叫你的時，
你猶原對天頂俯落聽，
照你的憐憫一遍閣一遍解救𪜶。
9:29 閣勸戒𪜶，愛欲引導𪜶歸向你的律法。總是𪜶行代誌驕傲，聽趁你的誡命，干犯你許個法度（人若行伊欲對伊得著活的），越轉肩頭，硬頷頸，肯聽趁。
9:29 你勸戒𪜶，愛𪜶越轉順趁你的律法；
毋拘𪜶驕傲自大，毋聽趁你的誡命，
違背你的命令 — 人若遵行，就會得著活命 —
肩頭越走，硬心固執，毋肯聽趁。
9:30 總是你多多年寬容𪜶，閣用你的神託你許個先知來對𪜶做干證，𪜶猶原聽趁，所以你將𪜶交佇列國的百姓的手。
9:30 你寬容𪜶真多年，
你的神通過你的先知勸戒𪜶，
𪜶猶原毋聽趁；
所以你將𪜶交佇列國人民的手。
9:31 總是你對你的大憐憫，無一盡滅𪜶，也無放拺𪜶；因為你是有恩典，有憐憫的上帝。
9:31 毋拘照你極大的憐憫，你無消滅𪜶，無棄拺𪜶；
因為你是有恩典，有憐憫的上帝。
9:32 「今阮的上帝啊，你是至大、有權能、通驚畏、守約施慈愛的上帝。阮的君王、首領、祭司、先知、列祖，及你的眾百姓，對亞述列王的時到今仔日所抵著一切的苦難，求你莫得掠做小可。
9:32 「今，阮的上帝啊，你是至大，有權能，通驚畏，守約施仁愛的上帝；
阮的君王、領袖、祭司、先知、列祖，及你的子民，
對亞述列王的時到今仔日所受一切的苦難，求你毋通看做小可。
9:33 總是見若阮所抵著的，你是公義；因為你所行的是真實，阮所行的是歹。
9:33 你是公義，你的所做信實；
阮所做的攏是歹，所抵著的是罪該應得。
9:34 阮的君王、首領、祭司、列祖攏無遵守你的律法，聽趁你的誡命及你的干證就是你對𪜶所干證的話。
9:34 阮的君王、領袖、祭司、列祖攏無遵守你的律法，
毋聽趁你的誡命以及你勸戒的話。
9:35 𪜶佇𪜶的本國，佇你賞賜𪜶大福氣及你佇𪜶面前所賞賜闊大肥媠的地無服事你，也無越轉離開𪜶的歹所行。
9:35 𪜶佇𪜶家己的國家，享受你賜互𪜶的福氣，
住佇你所賞賜寬闊肥媠的地，
𪜶竟然無服事你，嘛無越轉離開家己的歹所行。
9:36 阮今仔日做奴僕；你所賞賜阮列祖的地，通食伊的果子以及好的物，看啊，阮佇此個地做奴僕！
9:36 阮今仔日做奴隸！
你賞賜阮列祖此塊土地，互𪜶通享受果子及好物；
阮竟然佇遮做奴隸。
9:37 此個地出多多物歸佇列王，就是你因為阮的罪你所設立來管轄阮的。𪜶出在意思管轄阮的身軀及阮的精牲，阮抵著大患難。」
9:37 因為阮的罪，此個地出產的物攏歸佇列王；
你設立𪜶管轄阮，
出在𪜶的意思管轄阮的身軀及阮的牲生。
阮佇患難中真艱苦！」
9:38 因為這一切的事，阮立確實的約，寫明伊。阮的首領、利未人，及祭司攏蓋印。
會眾立約簽名
9:38 諸個代誌了後，阮慎重立約，寫做文書；阮的領袖、利未人及祭司，攏簽名蓋印。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。