上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
對敵尼希米的陰謀
6:1 參巴拉、多比雅、亞拉伯人基善及阮其餘的對敵聽見我城牆已經起好，其中無留一隙（彼時我卻未有安門扇），
陷害尼希米的陰謀
6:1 參巴拉、多比雅、阿拉伯人基善，及阮其他的對敵聽著我已經完成城牆的重建，所有的破隙攏修補好勢；毋拘城門猶未安門扇。
6:2 參巴拉及基善就差人來見我，講：「請你來，咱佇阿羅平洋一個鄉社相會。」總是𪜶想欲害我。
6:2 參巴拉及基善就派人來給我講：「請你來，咱佇阿挪平原一個庄社見面。」其實𪜶是想欲害我。
6:3 我就差使者去見𪜶，講：「我今啲辦理大的工，𣍐會落去。豈可會離開伊落去見恁互此個工停止啊？」
6:3 我就派使者去給𪜶講：「我此陣啲進行大的工程，𣍐當去；我哪通離開遮去見恁，互此個工程受阻擋？」
6:4 𪜶按呢四擺差人來見我，我攏按呢應𪜶。
6:4 𪜶按呢四遍派人來見我，我攏用仝款的話回答𪜶。
6:5 參巴拉第五擺就差伊的奴僕來見我，手提露封的批，
6:5 參巴拉第五遍派伊的部下來見我，手提無封起來的批；
6:6 批內寫講：「外邦中有風聲，迦施慕也講，你及猶大人啲謀反，所以你起城牆，你欲做𪜶的王照諸個話；
6:6 批內按呢寫：「佇列國中有風聲，基善嘛證實講，你及猶太人想欲造反，所以你才啲修建城牆；根據諸個話，你想欲做𪜶的王。
6:7 你閣派先知佇耶路撒冷宣傳你的代誌講，佇猶大有王。今欲照諸個話奏王；所以請你來，咱相及議論。」
6:7 你閣佇耶路撒冷指派先知為著你宣傳講：『佇猶大有王。』諸個話一定會傳到王遐；所以請你來，咱做夥參詳。」
6:8 我就差人去見伊，講：「你所講此個事，一概無影，是你的心捏造的。」
6:8 我就差人去給伊講：「你講的代誌無影無跡，是你家己捏造的。」
6:9 因為𪜶攏愛互阮驚，意思講，𪜶的手欲酸軟，致到工做無成。上帝啊，求你堅固我的手。
6:9 𪜶想欲恐嚇阮，互阮的手無力通完成此個工程。我祈禱講：「上帝啊，求你互我堅強。」
6:10 後來我到米希大別的孫、第來雅的子示瑪雅的厝；彼時，伊關啲無出來。伊講：「咱著佇上帝的厝相會，佇殿裡關殿門；因為𪜶欲來刣你，就是佇暝時欲來刣你。」
6:10 有一日，我去示瑪雅的厝欲見伊，伊是米希大別的孫，第來雅的子；彼時伊家己關佇厝內。伊對我講：「咱來去上帝的厝，入去殿內，將聖殿的門關起來；因為𪜶欲來害你，欲佇暝時刣你。」
6:11 我講：「親像我此號人豈通走嗎？親像我此號人豈通入殿來保全生命嗎？我入去！」
6:11 我講：「我豈是彼款會逃閃的人？我豈通匿𫢶聖殿內保全家己的性命？我毋入去。」
6:12 我看出知上帝無差伊，是伊家己講此個先知話來攻擊我，是多比雅及參巴拉賄賂伊。
6:12 彼時我才知，上帝並無差伊，是多比雅及參巴拉給伊買收，講預言攻擊我。
6:13 賄賂的緣故，是欲互我驚，互我按呢行來犯罪，𪜶通報揚歹話來誹謗我。
6:13 𪜶買收伊的目的，是欲給我嚇驚，互我照𪜶的話去做來犯罪，留歹名聲互人恥笑。
6:14 我的上帝啊，多比雅、參巴拉、女先知羅亞底，及其餘許個先知攏是欲互我驚的，求你照𪜶的所行來記得𪜶。
6:14 我的上帝啊，求你毋通𣍐記得多比雅、參巴拉、女先知挪亞底，及其他許個先知所做給我嚇驚的代誌，毋通放𪜶煞。
工程結束
6:15 以祿月二十五日，城牆已經起好，共五十二日。
重建工程結束
6:15 經過五十二日的工作，佇以祿月二十五日，城牆的重建就完成。
6:16 阮一切的對敵聽見、四圍的外邦人攏驚，家己看是失敗；因為看見此個工做成是出佇咱的上帝。
6:16 阮四圍列國許個對敵聽著就攏著驚，感覺漏氣見笑；因為𪜶攏知此個工程會當完成，是出佇上帝的幫贊。
6:17 當許個日，猶大的貴族沓沓寄批互多比雅，多比雅也用批互𪜶。
6:17 佇彼段期間，猶大的貴族常常寫批互多比雅，多比雅嘛給𪜶回批。
6:18 因為佇猶大有多多人及伊結盟；因為伊是亞拉的子，示迦尼的子婿，閣伊的子約哈難娶比利迦的子米書蘭的查某子做某。
6:18 佇猶大有真多人及多比雅結盟，因為伊是亞拉的子示迦尼的子婿；閣多比雅的子約哈難娶比利加的子米書蘭的查某子做某。
6:19 𪜶常常佇我的面前講起伊的好所行，也將我的話傳互伊。多比雅閣常常寄批互我，欲互我驚。
6:19 𪜶常常佇我的面前講多比雅的好話，嘛將我的話傳互伊。多比雅閣常常寫批給我恐嚇。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。