上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
尼希米處理難題
5:1 百姓及𪜶的某大聲哮，嫌𪜶的兄弟猶大人。
尼希米處理官長的剝削
5:1 人民及𪜶的某大聲埋怨𪜶的猶太同胞。
5:2 有人講：「阮及子查某子人額多，著去得著五穀通食來得著活」；
5:2 有人講：「阮及阮的子查某子即多人，為著欲生活需要真多糧食。」
5:3 有的講：「為著飢荒，阮用阮的田園、葡萄園、厝宅，典人來得著五穀」；
5:3 有的講：「阮已經將田園、葡萄園、厝宅提去抵押，才會當度活。」
5:4 有的講：「阮已經用田、及葡萄園，借銀納王的稅。
5:4 有的講：「阮已經用田園及葡萄園借錢，給王納稅。
5:5 阮的肉體及阮的兄弟的肉體一樣；阮的子兒及𪜶的子兒一樣。今阮用阮的子查某子做人的奴僕女婢，阮的查某子有的已經做女婢；阮也無法得，因為阮的田園、葡萄園已經歸別人。」
5:5 阮及別人仝款是猶太人，阮的子兒嘛無較輸𪜶的子兒；今阮的子兒著去做人的奴隸，阮的查某子有的已經去做奴隸，阮嘛𣍐當做什麼；因為阮的田園及葡萄園已經攏互別人提去。」
5:6 我聽見𪜶的喉叫及𪜶的話，就真受氣。
5:6 我聽著𪜶的哀叫及怨言，就非常受氣。
5:7 我心內想，就大責備許個貴族及官長給𪜶講：「恁逐人對兄弟提利息！」對按呢我招集大會來誅𪜶。
5:7 我經過慎重考慮，就責備許個貴族及官長，給𪜶講：「恁逐個人竟然給同胞提重利。」
對按呢，我召集大會來處理𪜶。
5:8 我給𪜶講：「阮量阮的力來贖咱的兄弟猶大人，就是已經賣互異邦人的；恁竟然欲賣恁的兄弟嗎？抑是𪜶欲受賣互咱嗎？」𪜶靜靜，無話通應。
5:8 我給𪜶講：「阮已經盡力將賣互外邦人的猶太同胞贖回，恁竟然賣恁的兄弟，欲閣互阮給𪜶贖轉來是無？」𪜶攏恬恬，無話通應。
5:9 我閣講：「恁所做的好！因為咱的對敵就是異邦人的誹謗，恁豈著敬畏咱的上帝來行嗎？
5:9 我閣講：「恁按呢做毋著；恁做代誌應該著敬畏咱的上帝，才免互列國咱的對敵恥笑。
5:10 我及我的兄弟，我的奴僕也用錢銀五穀借互百姓；今我勸恁咱大家著免利息。
5:10 我及我的家屬，以及我的部下，嘛有將錢及糧食借互人民。現在咱閣給𪜶提利息。
5:11 今我勸恁今仔日將𪜶的田、葡萄園、橄欖園、厝宅，及恁所對𪜶抽的錢銀、五穀、酒、油，每百份的一份攏著還伊。」
5:11 今仔日恁著將𪜶抵押的田園、葡萄園、橄欖園、厝宅，以及恁對𪜶提的重利，就是錢銀、糧食、酒、油，攏還𪜶。」
5:12 𪜶講：「阮欲還，無閣對𪜶討，欲照你的話行。」我就叫祭司來，教𪜶咒誓，著照此個話行。
5:12 貴族及官長講：「阮一定還𪜶，無閣對𪜶要求什麼，欲照你的話做。」
我就叫祭司來，互貴族及官長咒誓，一定照所講的去做。
5:13 我也拂開我的衫仔帕，講：「見若無成此個話者，願上帝照按呢拂開伊離開伊的家及伊的職業，就是願伊照按呢拂到空空。」會眾攏講：「阿們！」閣謳咾耶和華。百姓就照此個話行。
5:13 我就解開腰帶，颺颺咧，講：「無照咒誓去做的人，願上帝嘛將𪜶的厝宅及𪜶勞碌得著的，颺甲空空空。」
會眾攏應講：「阿們！」𪜶閣稱讚上主。人民就攏照按呢做。
尼希米大公無私
5:14 對我受設立佇猶大地做𪜶的總督，就是對亞達設西王二十年到三十二年，共十二年的久，我及我的兄弟攏無食總督的俸祿。
尼希米疼惜人民
5:14 我受派做猶大地的省長，對亞達薛西王二十年到三十二年，共十二年久，我及我的家屬攏無食省長應得的糧食。
5:15 總是我以前舊任的總督互百姓負擔真重，提百姓的五穀及酒，及銀四十舍客勒，連𪜶的奴僕也轄制百姓；獨獨我因為敬畏上帝無按呢行。
5:15 我以前許個省長互人民的負擔真重；𪜶對人民要求五穀及酒，以及四百五十六公克的銀仔；甚至𪜶的僕人嘛壓制人民。毋拘我無按呢做，因為我敬畏上帝。
5:16 閣我專務起城牆，並無買田地；我的奴僕也攏聚集佇遐做工。
5:16 我專心做重建城牆的工程，無買田園；我所有的部下嘛攏參加重建的工作。
5:17 除去許個對四圍的外邦中來尋阮的人以外，有猶大人及官長一百五十人佇我的桌相及食。
5:17 除了許個對四圍國家來我遮的人以外，有猶太人以及官長一百五十人及我做夥食。
5:18 逐日備辦一隻牛牨，六隻肥的綿羊，閣備辦幾若隻雞；每十日一擺，備辦多多逐樣的酒。雖然按呢，我也無提總督的俸祿，因為百姓服役真重。
5:18 每一日，我著準備一隻牛，六隻肥的羊；閣準備真多隻雞；十日一遍，準備逐款的酒。雖然按呢，我嘛無領省長應得的糧食，因為人民的負擔真重。
5:19 我的上帝啊，求你記念我為著此個百姓所行一切的事，來賜福我。
5:19 我的上帝啊，求你會記得我為著人民所做一切的事，賜福我。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。