上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
尼希米倒去耶路撒冷
2:1 亞達設西王二十年尼散月，有酒佇王的面前，我就進酒互王。我平素佇王的面前未曾有憂悶的面色。
尼希米轉去耶路撒冷
2:1 亞達薛西王第二十年尼散月，有酒排佇王的面前，我就奉酒互伊。我平常時佇伊的面前毋曾有憂悶的面色。
2:2 王給我講：「你無破病，怎樣面帶憂容啊？這無別項，是你心內有憂悶。」我對按呢真驚。
2:2 伊問我講：「你無破病，面色哪即歹看？你一定心情無好。」我就真驚。
2:3 我給王講：「願王萬歲！我的列祖墳墓的所在彼個城拋荒，城門攏互火燒去，我豈可無帶憂容嗎？」
2:3 我對王講：「願皇上萬歲！我的面色會即呢歹看，是因為安葬阮祖先的城拋荒，城門攏互火燒去。」
2:4 王問我講：「你愛求甚麼？」對按呢我祈禱天頂的上帝。
2:4 伊問我講：「你愛欲求什麼？」
對按呢，我對天頂的上帝祈禱。
2:5 我對王講：「王若歡喜，你的奴僕若得著恩典佇你的面前，就求你差我去猶大，到我的列祖墳墓彼個城，我通閣起伊。」
2:5 我就對王講：「皇上若看做好，你的僕人若對你得著恩典，求你差我去猶大，去安葬阮列祖的城，互我通重建彼個城。」
2:6 彼時王后及王相及坐。王給我講：「你欲行的路站著偌久？甚麼時欲倒來？」王歡喜差我去。我就及伊定著一個期限。
2:6 彼時王后坐佇王的邊仔。王給我講：「你欲去偌久？什麼時會倒來？」伊歡喜差我去，我就及伊約定一個期限。
2:7 我閣給王講：「王若歡喜，請用詔書互我帶去，交河外許個總督准我經過，到猶大；
2:7 我閣對伊講：「皇上若看做好，請發詔書互我帶去交互河西省許個省長，准我過境去猶大；
2:8 閣用詔書一封，寄互管理王的樹林的官亞薩，教伊互我柴料，通做殿邊營盤的門及城牆，及我所欲住的厝的路用。」王就准我所求的，因為我的上帝施恩的手幫助我。
2:8 閣發一封詔書互管理皇家樹林的亞薩，教伊互我柴料，通做修建聖殿邊堡壘的門、城牆，及我所欲住的厝的路用。」伊允准我的請求，因為我的上帝施恩的手幫贊我。
2:9 王派幾若個兵頭及馬兵及我去。我到河外許個總督遐，將王的詔書交互𪜶。
2:9 王派幾若個軍官及馬兵護送我去。我到河西省許個省長遐，將詔書交互𪜶。
2:10 和倫人參巴拉，及做奴才的亞捫人多比雅，聽見有人來欲為以色列人圖謀利益，就真迫腹。
2:10 和崙人參巴拉，及官員亞捫人多比雅聽見有人來欲為以色列人爭取權益，就真無歡喜。
2:11 我到耶路撒冷，𫢶遐三日。
2:11 我到耶路撒冷，佇遐三日。
2:12 我透暝起來，有幾若人及我相及；總是我的上帝感動我的心所欲為耶路撒冷做的，我並無給人講。除我騎的精牲以外，也無別隻精牲及我去。
2:12 後來，我半暝起來，有幾個人及我做夥出去。我的上帝感動我的心欲為耶路撒冷做的事，我攏無給人講；我騎的牲生以外，無帶別隻做夥去。
2:13 我透暝對山谷門出去，到龍井的頭前，也到糞埽門，觀察耶路撒冷的城牆，看見城牆拆毀，城門互火燒去。
2:13 我透暝對山谷門出去，經過龍泉到糞埽門，觀察耶路撒冷的城牆，看著城牆受拆毀，城門互火燒去。
2:14 我閣進前，去到水泉的門及王的池，總是佇遐無一位仔通互我騎的精牲過去。
2:14 我閣去到泉門及王池；毋拘遐無所在互我騎的牲生過去。
2:15 對按呢我透暝沿溪上去，觀察城牆，閣越轉身對山谷的門入去，才倒來。
2:15 我就透暝沿溪上去，觀察城牆，然後照原路，經過山谷門倒來。
2:16 許個官長知我去叨落，做甚麼事。我猶未有給猶大的百姓、祭司、貴族、官長，及其餘做工的人講。
2:16 許個官長毋知我去叨位，做什麼代誌；我猶未給猶太的人民、祭司、貴族、官長，及其他欲參與此個工作的人講。
2:17 後來，我給𪜶講：「咱所抵著的患難，耶路撒冷怎樣拋荒，城門互火燒，恁攏看見。來啊，咱閣起耶路撒冷的城牆，免得咱閣受凌辱！」
2:17 後來我給𪜶講：「咱所抵著的災難，耶路撒冷按怎拋荒，城門互火燒去，恁攏有看著。來！咱來重建耶路撒冷的城牆，才免咱閣受凌辱。」
2:18 我給𪜶講我的上帝的手怎樣幫助我，及王對我講甚麼話。𪜶講：「咱起來起造！」對按呢𪜶奮勇做此個好的工。
2:18 我閣給𪜶講我的上帝的手按怎幫贊我，及王對我講什麼話。
𪜶就講：「咱起來重建！」對按呢，𪜶堅強起來，做此個好的工程。
2:19 總是和倫人參巴拉，及做奴僕的亞捫人多比雅及亞拉伯人基善聽見就恥笑阮，看輕阮，講：「恁所做是甚麼？欲背叛王嗎？」
2:19 毋拘，和崙人參巴拉及官員亞捫人多比雅，以及阿拉伯人基善聽見，就恥笑阮，看輕阮，講：「恁是啲做什麼？是欲背叛王是無？」
2:20 我應𪜶講：「天頂的上帝伊欲互阮興起。阮做伊的奴僕者，欲起來起造；總是恁佇耶路撒冷無份、無權、無名字。」
2:20 我應𪜶講：「天頂的上帝會互阮成功。阮是伊的僕人，欲起來重建；恁佇耶路撒冷無分，無權，無人會給恁記念。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。