上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
尼希米記
尼希米關心耶路撒冷
1:1 哈迦利亞的子尼希米的記錄：
當二十年基斯流月，我佇書珊的王宮。
1:1 下面是哈迦利亞的子尼希米的話：
尼希米關心耶路撒冷
亞達薛西作波斯皇帝第二十年基斯流月，我佇波斯的京城書珊。
1:2 彼時，我的兄弟一人名叫哈拿尼，及幾若個猶大人來。我對𪜶問到許個逃脫的猶大人，就是受掠的中間所剩的及耶路撒冷的事情。
1:2 有一日，我一個兄弟哈拿尼，及幾若個對猶大來的人來尋我；我對𪜶探聽許個流放巴比倫倒轉去的猶太人，及耶路撒冷的情形。
1:3 𪜶給我講：「許個受掠的倒來所剩留啲的人佇省內抵著大患難，受凌辱；閣耶路撒冷的城牆拆毀，城門互火燒燎去。」
1:3 𪜶給我講：「許個流放倒轉去的人，佇猶大省遐抵著大災難，受凌辱，閣耶路撒冷的城牆受拆毀，城門互火燒去。」
1:4 我聽見諸個話，就坐啲啼哭悲哀幾若日，禁食祈禱佇天頂的上帝的面前，講：
1:4 我聽著諸個話就坐落來，啼哭，哀傷幾若日；佇天頂的上帝面前禁食祈禱，講：
1:5 「天頂的上帝──耶和華，至大通驚畏的上帝啊，守約行仁愛佇疼伊、遵趁伊的誡命者。
1:5 「上主，佇天頂至大通驚畏的上帝啊，你對許個疼你，遵守你誡命的人守約施仁愛。
1:6 我今求你，願你耳孔聽，目睭看，聽你的奴僕此霎日暝為你的奴僕以色列人來祈禱佇你面前的祈禱，認以色列人的罪就是阮所得罪你的；我及我的老父的家攏有罪。
1:6 懇求你俯耳孔聽，開目睭看，聽你的僕人此陣為著以色列人暝日佇你面前的祈禱，認阮以色列人背叛你的罪；我及我的祖先攏有罪。
1:7 阮對你所行的盡在腐敗，無遵守你託你的奴僕摩西所命令的誡命、律例、法度。
1:7 阮惡意反抗你，無遵守你通過你的僕人摩西所頒布的誡命、規例、命令。
1:8 求你記得你所命令你的奴僕摩西的話，講：『恁若犯罪，我就欲四散恁佇列國中；
1:8 求你會記得你對你的僕人摩西應允的話，講：『恁若對我無忠實，我就欲將恁分散去列國；
1:9 總是恁若歸佇我，守我的誡命來行伊，就恁受趕逐的人雖然佇天邊，我也欲對遐聚集𪜶，導𪜶到我所揀欲安置我的名的所在。』
1:9 毋拘恁若歸向我，遵行我的誡命，恁就是受趕散去天邊海角，我嘛欲對遐給恁聚集倚來，導恁到我所揀選互人來敬拜我的所在。』
1:10 今諸個攏是你的奴僕、你的百姓，就是你用你的大氣力及大權能的手所救贖的。
1:10 「𪜶是你的僕人，你的子民，是你用大氣力、大權能的手救贖的。
1:11 主啊，求你俯耳孔聽你的奴僕的祈禱，及許個意愛歡喜敬畏你的名許個奴僕的祈禱，閣求你互你的奴僕今仔日亨通，佇此人的面前得著恩典。」
彼時我做王的酒政。
1:11 主啊，求你俯耳孔聽你的僕人及許個意愛敬畏你的名的僕人的祈禱；閣求你互你的僕人今仔日亨通，對王得著恩典。」
彼時，我做王的酒政。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。