上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯拉記
以斯拉到耶路撒冷
7:1 諸個事以後，佇波斯王亞達設西坐位的時，有一個以斯拉，伊是西萊雅的子，西萊雅是亞撒利雅的子，亞撒利雅是希勒家的子，
以斯拉到耶路撒冷
7:1 諸個事以後，波斯皇帝亞達薛西坐位的時，以斯拉對巴比倫轉來；伊是西萊雅的子，西萊雅是亞撒利雅的子，亞撒利雅是希勒家的子，
7:2 希勒家是沙龍的子，沙龍是撒督的子，撒督是亞希突的子，
7:2 希勒家是沙龍的子，沙龍是撒督的子，撒督是亞希突的子，
7:3 亞希突是亞瑪利雅的子，亞瑪利雅是亞撒利雅的子，亞撒利雅是米拉約的子，
7:3 亞希突是亞瑪利雅的子，亞瑪利雅是亞撒利雅的子，亞撒利雅是米拉約的子，
7:4 米拉約是西拉希雅的子，西拉希雅是烏西的子，烏西是布基的子，
7:4 米拉約是西拉希雅的子，西拉希雅是烏西的子，烏西是布基的子，
7:5 布基是亞比書的子，亞比書是非尼哈的子，非尼哈是以利亞撒的子，以利亞撒是祭司頭亞倫的子。
7:5 布基是亞比書的子，亞比書是非尼哈的子，非尼哈是以利亞撒的子，以利亞撒是大祭司亞倫的子。
7:6 此個以斯拉對巴比倫上來，對佇耶和華──以色列的上帝賞賜摩西的律法，伊是敏捷的經學士。王准伊一切所求的，是照耶和華──伊的上帝的手幫助伊的。
7:6 以斯拉對巴比倫上來；伊是經學教師，對上主 — 以色列的上帝所賞賜摩西的律法非常精通。因為上主 — 伊的上帝賜福互伊，伊對皇帝的請求，攏得著允准。
7:7 亞達設西王第七年，以色列人、祭司、利未人、唱歌者、顧門者、尼提寧，各有幾若人上耶路撒冷。
7:7 亞達薛西作王第七年，有一寡以色列人、祭司及利未人、獻詩的、聖殿守衛、聖殿的工人，轉來耶路撒冷。
7:8 王第七年五月，以斯拉到耶路撒冷。
7:8 彼年的五月，以斯拉轉來到耶路撒冷；
7:9 正月初一日，伊對巴比倫起身；五月初一日就到耶路撒冷，因為伊的上帝施恩的手幫助伊。
7:9 正月初一，伊對巴比倫起身，五月初一就到耶路撒冷，因為伊的上帝施恩的手幫贊伊。
7:10 因為以斯拉已經決意欲講究耶和華的律法來行伊，閣將律例法度來教示以色列人。
7:10 以斯拉專心研究閣實行上主的律法，將規例命令教導以色列人。
亞達設西王互以斯拉的文件
7:11 祭司以斯拉是經學士是通達耶和華誡命的話及伊所賞賜以色列的律例的經學士。亞達設西王賜伊諭旨，彼個文記佇下底講：
亞達薛西互以斯拉的文件
7:11 祭司以斯拉是經學教師，精通上主互以色列的誡命及規例。下面是亞達薛西王互以斯拉的詔書：
7:12 「列王的王亞達設西，寄互祭司以斯拉通達天頂上帝的律法的經學士，完全者，云云。
7:12 列王的王亞達薛西寫互祭司以斯拉，精通天頂上帝律法的經學教師，願你平安。
7:13 𫢶佇我的國內的以色列人、祭司、利未人，見若甘願上去耶路撒冷者，我降旨互𪜶及你去。
7:13 我國內的以色列人、祭司及利未人，若有人願意轉去耶路撒冷，我下令，允准𪜶及你做夥去；
7:14 你既然是王及伊七個謀士所差的，照你手內上帝的律法查察猶大及耶路撒冷；
7:14 我及七個參謀指派你，著照上帝交託你的律法視察猶大及耶路撒冷。
7:15 閣帶王及伊的謀士所歡喜獻的金銀，欲互以色列的上帝，就是住佇耶路撒冷的，
7:15 你著帶我及我的參謀甘心獻互住佇耶路撒冷的以色列上帝的金銀；
7:16 也帶你佇巴比倫全省見所得著的金、銀及百姓、祭司所歡喜獻的禮物就是𪜶為著耶路撒冷──𪜶上帝的殿所歡喜獻的。
7:16 閣帶你佇巴比倫全省所得著的金銀，以及人民及祭司歡喜為著耶路撒冷𪜶的上帝的聖殿奉獻的禮物。
7:17 所以你著致意用諸個金銀，買牛牨仔、綿羊牨、綿羊仔，及𪜶的素祭，𪜶的灌奠，獻佇耶路撒冷──恁上帝殿的壇。
7:17 你著善用諸個金銀，買牛仔、綿羊、羊羔、五穀，及酒，獻佇耶路撒冷恁的上帝殿的祭壇。
7:18 所剩的金銀，你及你的兄弟看做好的，就按呢用伊，攏著照恁上帝的旨意。
7:18 賰的金銀，著照恁的上帝的旨意，用佇你及你的同事看做好的所在。
7:19 所交代你的器具，做你的上帝殿內的路用的，你著交佇耶路撒冷的上帝的面前。
7:19 所有交互你，欲佇你的上帝殿內做服事的器具，著攏下佇耶路撒冷的上帝面前。
7:20 恁上帝的殿若猶有欠用甚麼你所應該著用的，你通對王的府庫提伊。
7:20 你的上帝的殿若猶欠用什麼，需要你設法的，通對皇帝的府庫支出。
7:21 「我──亞達設西王本身閣降詔互河外一切管府庫的官，講：『通達天頂上帝的律法的經學士祭司以斯拉，無論對恁討甚麼，恁著致意行伊，
7:21 我亞達薛西閣下令河西省所有管府庫的官員：精通天頂上帝律法的經學教師，祭司以斯拉，伊無論對恁要求什麼，恁攏著確實辦理；
7:22 供給伊銀到一百他連得，麥到一百柯珥，酒到一百罷特，油到一百罷特，鹽無限額。
7:22 數量最高通到銀三千四百公斤、麥一萬公斤、酒兩千公升、油兩千公升、鹽無限。
7:23 見若天頂的上帝所命令的，著為著天頂的上帝的殿斟酌做伊。啥事互受氣臨到王以及王的子的國啊？
7:23 天頂的上帝所命令的，恁著為天頂上帝的聖殿切實去做，才免上帝的大受氣臨到我及我的子孫的國。
7:24 我閣命令恁，見若祭司、利未人、唱歌者、顧門者，及尼提寧，及佇上帝的殿做差用的人，通收𪜶的進貢，關稅，錢糧。』
7:24 我閣命令恁，祭司及利未人、獻詩的、聖殿的守衛及工人，以及佇上帝的殿侍奉的人，攏毋通要求𪜶進貢，納稅，繳糧食。
7:25 「以斯拉啊，照你的上帝賞賜你的智慧設立士師、審判官，治理河外的百姓，就是一切識你的上帝律法的，許個未識者，恁著教示伊。
7:25 以斯拉，照你的上帝賞賜你的智慧，指派許個識上帝律法的人做審判官及官員，治理河西省的人民，教導猶毋識律法的人。
7:26 見若無欲趁你的上帝的律法及王的律法，就著小心定伊的罪，或是互伊死，或是充軍，或是抄家，或是關監。」
7:26 若有人無欲遵守你的上帝的律法及王的命令的人，著嚴嚴給𪜶定罪；給𪜶判死刑，流放，財產充公，抑是關監。
以斯拉謳咾耶和華
7:27 「謳咾咱列祖的上帝──耶和華！因為伊下此個意思佇王的心加添榮光佇耶路撒冷耶和華的殿，
以斯拉稱讚上帝
7:27 以斯拉講：「上主 — 咱列祖的上帝應該受稱讚！因為伊互皇帝有此款的心意，互耶路撒冷上主的聖殿得著尊榮。
7:28 閣互我佇王及伊的議士，及王一切有權勢的首領的面前得著恩典。耶和華──我的上帝的手幫助我，我就勇敢，聚集以色列許個頭人，及我上來。」
7:28 伊閣互我對王、伊的參謀，及所有有權的官員得著幫贊。上主 — 我的上帝賜我勇氣，互我會當召集以色列的首領，及我做夥轉來。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。