上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯拉記
5:1 彼時，有先知人就是先知哈該及易多的孫撒迦利亞奉以色列上帝的名對猶大及耶路撒冷的猶大人傳先知的話互𪜶。
5:1 彼時有先知哈該，及易多的孫先知撒迦利亞，奉以色列上帝的名，對猶大及耶路撒冷的猶太人傳達上帝的話。
5:2 對按呢撒拉鐵的子所羅巴伯及約薩達的子耶書亞攏起來動工起造上帝的殿佇耶路撒冷，有上帝的先知及𪜶佇遐幫助𪜶。
5:2 撒拉鐵的子所羅巴伯，及約薩達的子耶書亞，就攏起來著手重建耶路撒冷上帝的聖殿；有上帝的先知及𪜶做夥，幫贊𪜶。
5:3 當時河外的總督達乃及示他‧波斯乃，及𪜶的同伴來問講：「是誰出令互恁起此個殿，成此個牆啊？」
5:3 像彼時，河西省的總督達乃，及示他‧波斯乃，以及𪜶的同事，來問講：「啥人下令互恁起此間殿，完成此個工程？」
5:4 阮就按呢給𪜶講起此間殿的人叫甚麼名。
5:4 𪜶閣討起造聖殿的人的名單。
5:5 上帝的目睭看顧猶大的長老，許個人無互𪜶停工，聽候此個代誌到大利烏，得著文書來回覆此個事。
5:5 毋拘上帝看顧猶大的長老，互𪜶免受阻擋停工。許個官員將此個代誌上奏大流士，聽候伊的回復。
5:6 河外的總督達乃及示他‧波斯乃，及伊的同伴，就是𫢶佇河外的亞法薩迦人，奏大利烏王的表章記佇下底。
5:6 河西省的總督達乃，及示他‧波斯乃，以及伊的同事，就是河西省的官員，上奏大流士王的批記佇下面：
5:7 𪜶奏王的表章內有講：「願大利烏王萬事平安。
5:7 願皇帝大流士萬事順利。
5:8 王著知，阮去猶大省，到至大上帝的殿，此個殿是用大塊石起造的。楹仔插入牆內，做工真緊，𪜶的所做亨通。
5:8 願皇上查明。阮去猶大省，發見偉大上帝的聖殿抵啲重建。此個殿用大塊石起造，樑插入牆內，工程進行真緊閣順利。
5:9 彼時阮問許個長老給𪜶講：『是誰出令互恁起此個殿，成此個牆啊？』
5:9 彼時，阮問許個長老：「啥人下令互恁起此間殿，完成此個工程？」
5:10 閣問𪜶的名，欲記𪜶的首領的名，通奏互王知。
5:10 閣問𪜶的首領的名，通上奏互皇上知。
5:11 𪜶按呢應阮講：『阮是天地的上帝的奴僕，閣再起多多年前所起的殿，就是以色列的一位大君王所起所成的。
5:11 𪜶按呢應阮講：「阮是天地的主宰上帝的僕人。阮現在啲重建的聖殿，是真多年前以色列一位偉大的王起造的。
5:12 獨獨因為阮的列祖惹天頂的上帝的受氣，伊將𪜶交佇迦勒底人巴比倫王尼布甲尼撒的手，王就拆毀此間殿，掠百姓到巴比倫。
5:12 毋拘阮的列祖惹天頂的上帝受氣，伊將𪜶交佇迦勒底人巴比倫王尼布甲尼撒的手；王就拆毀此間殿，掠人民去巴比倫。
5:13 當巴比倫王古列元年，古列王出令著起此間上帝的殿。
5:13 塞魯士做巴比倫皇帝第一年，下令重建此間上帝的殿。
5:14 上帝殿內金、銀的器具，就是尼布甲尼撒對耶路撒冷的殿內提出來，帶去下佇巴比倫的廟的，古列王對巴比倫的廟內提出來，交互伊所設立的總督，名叫設巴薩，
5:14 以前尼布甲尼撒對耶路撒冷上帝的聖殿搶去下佇巴比倫神廟的金銀器具，塞魯士王將許個提出來，交互伊所設立的猶大省長設巴薩，
5:15 給伊講著帶諸個器具去，下佇耶路撒冷的殿，也著起上帝的殿佇伊的原位。
5:15 對伊講：『著帶諸個器具去下佇耶路撒冷的殿，嘛著佇原位起上帝的殿。』
5:16 對按呢此個設巴薩來下耶路撒冷上帝殿的地基。此間殿對彼時到今起猶未好。』
5:16 對按呢，設巴薩就來下耶路撒冷上帝聖殿的地基；此間殿重建的工程對彼時到現在猶未完成。
5:17 今王若掠做好，請查考王佇巴比倫的國庫，看古列王果然有降詔佇耶路撒冷起上帝此間殿抑無？請王佇此個事降旨來指示阮。」
5:17 「今，皇上若看做妥當，請查明巴比倫的皇家記錄，看塞魯士王有下令佇耶路撒冷重建上帝的聖殿抑無。關係此個事，請皇上裁決，降旨指示阮。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。