上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
約西亞守𨃟過節
35:1 ( 王下 23:21-23 )
約西亞佇耶路撒冷守𨃟過節服事耶和華。正月十四日，百姓刣𨃟過節的羊仔。
約西亞守𨃟過節
35:1 ( 王下 23:21-23 )
約西亞佇耶路撒冷守𨃟過節服事上主。正月十四，人民刣𨃟過節的羊仔。
35:2 王派諸個祭司當𪜶的職，閣勉勵𪜶做耶和華殿的工；
35:2 王派祭司執行𪜶的職務，閣勉勵𪜶辦理上主聖殿的工作。
35:3 閣對許個歸佇耶和華做聖，教示以色列人的利未人講：「恁著將聖的約櫃下佇以色列王大衛的子所羅門所起的殿內，免恁用肩頭扛。今恁著服事耶和華──恁的上帝，及伊的百姓以色列。
35:3 閣對許個聖化歸上主，教導以色列人的利未人講：「恁著將聖的約櫃下佇大闢的子以色列王所羅門所起的聖殿內面，毋免閣扛來扛去。今恁著服事上主 — 恁的上帝，及伊的子民以色列。
35:4 恁著家己備辦照恁的宗族，恁的班列，趁以色列王大衛所記的，及伊的子所羅門所記的。
35:4 著照以色列王大闢及伊的子所羅門的規定，照恁的宗族、恁的班次準備好勢。
35:5 徛佇聖的所在照恁的兄弟，就是此個百姓宗族的房頭，著有利未人宗族的一組來服事伊。
35:5 恁利未人著照宗族的房頭，分組的家庭，徛佇聖殿服務恁的兄弟。
35:6 著刣𨃟過節的羊羔，家己清氣，為著恁的兄弟備辦好勢，通照耶和華託摩西所講的來行。
35:6 著照上主通過摩西所傳的話，刣𨃟過節的羊羔，潔淨家己，為著恁的親族準備好勢。」
35:7 約西亞對歸群的中間，綿羊仔及山羊仔共三萬隻，及牛牨三千隻，互攏總相及佇啲的百姓做𨃟過節的物；諸個是對王的產業取的。
35:7 約西亞王對伊的產業提出綿羊仔及山羊仔共三萬隻，牛三千隻，互所有在場的人民做𨃟過節的祭物。
35:8 伊許個首領也歡喜出互百姓及祭司及利未人；許個管理上帝的殿的希勒家、撒迦利亞、耶歇用羊仔二千六百隻，牛三百隻，互祭司做𨃟過節的祭。
35:8 王的大臣嘛歡喜提供祭物互人民、祭司及利未人。管理上帝聖殿的希勒家、撒迦利亞、耶歇，用羊仔兩千六百隻、牛三百隻，互祭司做𨃟過節的祭物。
35:9 利未人許個頭目歌楠雅及伊的兄弟示瑪雅、拿坦業，及哈沙比雅、耶利、約撒拔用羊仔五千隻，牛五百隻，互利未人做𨃟過節的祭物。
35:9 利未人的領袖歌楠雅，及伊兩個兄弟示瑪雅及拿坦業，以及哈沙比雅、耶利、約撒拔，用羊仔五千隻、牛五百隻，互利未人做𨃟過節的祭物。
35:10 按呢，服事的代誌攏備辦便。祭司徛佇伊的位，利未人徛佇𪜶的班列，照王所命令的。
35:10 按呢，服事的代誌攏準備好勢，照王的命令，祭司徛佇𪜶的位，利未人嘛照𪜶的班次徛啲。
35:11 𪜶刣𨃟過節的羊仔，祭司對𪜶的手接血來灑；利未人剝許個皮，
35:11 利未人刣𨃟過節的羊仔，祭司對𪜶的手接血來灑；利未人給羊仔剝皮，
35:12 也將燒祭移徙伊，通照百姓宗族的房頭分互𪜶，通獻互耶和華，照摩西的冊所記的；處置許個牛也是按呢。
35:12 將燒化祭的祭物照宗族的房頭分互人民，互𪜶照摩西的冊所寫的獻互上主。獻牛做祭物嘛是按呢做。
35:13 𪜶照定著的例，用火煏𨃟過節的羊仔。許個祭物用鼎，用鍋、用鉢，煮伊；緊緊帶去互眾百姓。
35:13 𪜶照規定，用火烘𨃟過節的羊仔，其他的祭物用鍋仔、鼎、盆煮；煮了後，趕緊分互人民。
35:14 然後為家己及祭司備辦；因為祭司亞倫的子孫專務獻燒祭及油，到下昏。所以利未人為家己也為祭司亞倫的子孫，備辦伊。
35:14 以後，利未人才為家己及祭司準備肉，因為亞倫的後代做祭司的一直啲獻燒化祭及祭物的油到暗時。
35:15 唱歌者亞撒的子孫，徛佇𪜶的位，照大衛、亞薩、希幔，及王的先見者耶杜頓所命令，顧門的人顧守逐個門，𪜶免離開𪜶的工，因為𪜶的兄弟利未人替𪜶備辦。
35:15 亞薩的後代負責唱歌的人，照大闢、亞薩、希幔，及王的先見耶杜頓的規定，照𪜶的職位徛啲；顧門的守衛看守逐個門；𪜶毋免離開𪜶的職務，因為𪜶的親族利未人替𪜶準備祭物。
35:16 當彼日，服事耶和華的代誌攏備辦，也守𨃟過節，也獻燒祭佇耶和華的壇，照約西亞王所命令。
35:16 彼日，服事上主的代誌攏準備好勢，照約西亞王的命令守𨃟過節，佇上主的壇獻燒化祭。
35:17 彼時相及佇遐的以色列人守𨃟過節，也守除酵節歷過七日。
35:17 彼時，在場的以色列人做夥守𨃟過節，閣守除酵節七日。
35:18 對先知撒母耳的日以後，佇以色列中無有親像此霎所守的𨃟過節；閣以色列列王也攏無守𨃟過節，親像約西亞、及祭司、及利未人，以及相及佇啲的猶大，及以色列人，及耶路撒冷徛起的百姓所守的。
35:18 對先知撒母耳的時代以來，以色列毋曾即呢盛大守𨃟過節；以色列的列王嘛攏毋曾按呢守𨃟過節，親像約西亞、祭司及利未人，以及在場的猶大及以色列人，及耶路撒冷的住民按呢守節。
35:19 佇約西亞做王十八年就守此個𨃟過節。
35:19 此遍的𨃟過節佇約西亞作王第十八年舉行。
約西亞死
35:20 ( 王下 23:28-30 )
諸個代誌以後，約西亞已經修整殿明白，有埃及王尼哥上來，欲拍伯拉河邊的迦基米施；約西亞出去抵當伊。
約西亞死
35:20 ( 王下 23:28-30 )
約西亞整修聖殿了後，埃及王尼哥上來，欲攻打幼發拉底河河邊的迦基米施。約西亞王出去迎戰。
35:21 伊差使者來見約西亞，講：「猶大王啊，我及你甚麼干涉？我今仔日來是欲攻擊你，就是欲攻擊及我交戰的家，閣上帝吩咐我著趕緊，你莫得插上帝的事，免得伊剿滅你，因為上帝及我佇啲。」
35:21 尼哥派使者來見約西亞，講：「猶大王，我及你有什麼關係？我今仔日來毋是欲攻擊你，是欲攻擊及我交戰的國家；上帝命令我著趕緊做此個事。你毋通反對及我同在的上帝，才免伊給你毀滅。」
35:22 總是約西亞肯越轉離開伊，改裝欲及伊交戰，聽上帝託尼哥所講出的話，就來到米吉多的山谷交戰。
35:22 毋拘約西亞毋聽上帝通過尼哥所講的話，堅持欲及伊交戰。約西亞變裝來到米吉多平原，及尼哥交戰。
35:23 射箭的人射著約西亞王。王對伊的人臣講：「帶我出去，因為我受重傷啦！」
35:23 射箭的人射著約西亞王；王對伊的人臣講：「我受重傷啦！載我離開戰場。」
35:24 伊的人臣扶伊出彼張車，下佇伊第二張車，載伊到耶路撒冷，伊就死，埋葬伊佇伊的列祖許個墓。猶大及耶路撒冷攏為著約西亞悲哀。
35:24 伊的人臣扶伊出彼台車，互伊坐第二台車，載伊倒去耶路撒冷；伊就死，人將伊安葬佇伊列祖的墓。猶大及耶路撒冷的人攏為著約西亞哀傷。
35:25 耶利米為約西亞哀傷。許個唱歌的男女佇𪜶的哀詞，攏有講起約西亞，到佇今仔日；閣佇以色列中用諸個做定著的例。看啊，許個攏記佇哀詞中。
35:25 耶利米為著約西亞作哀歌；所有唱歌的男女到今仔日猶啲唱諸個哀歌記念約西亞；此個嘛成做以色列的慣例。諸個哀歌攏收集佇《哀歌集》。
35:26 約西亞其餘的事及伊照耶和華律法所記來行的好事，
35:26 約西亞其他的事蹟，包括伊對上主律法的忠誠，
35:27 及伊對頭到尾所行的事，看啊！攏記佇以色列及猶大列王的記錄。
35:27 及伊一生所做的事，攏記載佇《以色列及猶大列王史》。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。