上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王約西亞
34:1 ( 王下 22:1-2 )
約西亞坐位的時八歲，佇耶路撒冷做王共三十一年。
猶大王約西亞
34:1 ( 王下 22:1-2 )
約西亞坐位的時八歲，佇耶路撒冷作王三十一年。
34:2 伊行耶和華所看做好的事，行伊的祖大衛一切的路，無偏左右。
34:2 伊做上主看做好的事，行伊的祖先大闢的路，無偏左偏右。
約西亞攻擊外邦的崇拜
34:3 伊做王第八年，猶久少年，起頭尋伊的祖大衛的上帝。到十二年起頭清氣猶大及耶路撒冷，除去山頭壇，及許個亞舍拉，雕刻的像及鑄造的像。
約西亞掃除偶像崇拜
34:3 約西亞作王第八年，猶少年就尋求伊的祖先大闢的上帝；四年後，開始潔淨猶大及耶路撒冷，掃除山頭壇、亞舍拉柱像、雕刻的像，及鑄造的像。
34:4 𪜶佇伊的面前毀壞許個巴力的壇，伊剉斷壇頂高高的日像，閣拍碎許個亞舍拉及雕刻的像，及鑄的偶像搥伊做粉，撒佇曾祭祀伊的的墓，
34:4 人民照伊的命令毀壞巴力的壇，斬斷壇頂高高的香台；伊閣將亞舍拉柱像、雕刻的像，及鑄造的像拍碎，研做粉，撒佇許個曾獻祭互偶像的人的墓；
34:5 將𪜶的祭司的骨頭燒佇𪜶的壇頂，清氣猶大及耶路撒冷；
34:5 將外邦神明的祭司的骨頭下佇𪜶的祭壇頂燒，用按呢潔淨猶大及耶路撒冷。
34:6 佇瑪拿西、以法蓮、西緬、到佇拿弗他利許個城及四圍破壞的所在，攏也按呢行；
34:6 約西亞閣佇瑪拿西、以法蓮、西緬，及拿弗他利地區許個荒廢的城，
34:7 閣拆毀祭壇，拍碎亞舍拉，及雕刻的像成做粉，剉斷以色列遍地所有的日像，就倒去耶路撒冷。
34:7 拆毀祭壇，拍碎亞舍拉柱像及雕刻的像，研做粉，斬斷以色列逐所在的香台，就倒去耶路撒冷。
發現律法書
34:8 ( 王下 22:3-20 )
約西亞王十八年，清氣地清氣殿以後，就差亞薩利雅的子沙番、城守瑪西雅、史官約哈斯的子約亞去修理耶和華──伊的上帝的殿。
發見律法書
34:8 ( 王下 22:3-20 )
約西亞作王第十八年，土地及聖殿潔淨了後，伊派亞薩利雅的子沙番、市長瑪西雅、約哈斯的子史官約亞，去整修上主 — 伊的上帝的殿。
34:9 𪜶就去見祭司頭希勒家，將所有獻佇上帝殿的銀交伊；此個銀是顧門的利未人對瑪拿西、以法蓮，及一切以色列剩的人，以及猶大、便雅憫眾人，及耶路撒冷徛起的百姓收來的。
34:9 𪜶就去見大祭司希勒家，將所有獻佇上帝聖殿的銀交互伊；諸個銀是聖殿門口的守衛利未人對瑪拿西、以法蓮，及以色列所有賰落來的人，以及猶大、便雅憫，及耶路撒冷的人民收來的。
34:10 𪜶將彼個銀交互管理耶和華殿做工人的手，轉交耶和華殿做工的人修理殿互伊好勢，
34:10 𪜶將許個銀交互管理上主聖殿的人，互𪜶轉交上主殿內的工人，就是作木師傅及建築工人，去買拍好的石，做樑及柱的木材，通修理聖殿內面互許個猶大王損壞的所在。
34:11 就是交互木匠、起造的，互𪜶買過拍的石及連絡的柴料，修理猶大王所毀壞許個厝。
34:11 併於上節
34:12 許個人盡忠做工，督工者是利未人米拉利的子孫雅哈、俄巴底；督催者是哥轄的子孫撒迦利亞、米書蘭；閣有作樂的利未人。
34:12 許個人做代誌誠實；監工的是利未人米拉利的子孫雅哈及俄巴底亞，督工的是哥轄的子孫撒迦利亞及米書蘭，閣有真𠢕奏樂的利未人。
34:13 𪜶也管理許個擔壓的人，督催一切做工的，無論做甚麼工。利未人有的做書記、做有司、做管門者。
34:13 𪜶管理許個運搬的工人，嘛監督所有做逐款工作的人；利未人有的做書記，做官員，及守衛。
34:14 𪜶將所有獻佇耶和華殿的銀帶出去的時，祭司希勒家偶然得著摩西所傳耶和華律法的冊。
34:14 𪜶將獻佇上主聖殿的銀搬出去的時，大祭司希勒家發見摩西所傳上主律法的冊。
34:15 希勒家應書記沙番講：「我佇耶和華殿內偶然得著律法的冊。」希勒家就將冊交互沙番。
34:15 希勒家對書記沙番講：「我佇上主聖殿內面發見一卷律法的冊。」希勒家將冊交互沙番。
34:16 沙番就帶冊去王遐，閣回覆王講：「見若你所託仗你的奴僕的𪜶啲做伊。
34:16 沙番就帶此卷冊去王遐，給王報告講：「王交託你的僕人的工作，𪜶攏有啲做。
34:17 所得著佇耶和華殿的銀攏傾出來，交互督工者及做工人的手。」
34:17 奉獻佇上主聖殿的銀攏摒出來，交互督工及工人。」
34:18 書記沙番閣對王講：「祭司希勒家有提一本冊互我。」沙番佇王的面前摘讀伊。
34:18 書記沙番閣對王講：「大祭司希勒家有提一卷冊互我。」沙番就佇王的面前大聲讀彼卷冊。
34:19 王聽見律法的話，就拆裂伊的衫，
34:19 王聽著律法的話，就拆裂伊的衫。
34:20 王吩咐希勒家及沙番的子亞希甘、米迦的子亞比頓、書記沙番，及王的近臣亞撒雅講：
34:20 王吩咐希勒家、沙番的子亞希甘、米迦的子亞伯頓、書記沙番，及王的人臣亞撒雅，講：
34:21 「恁去為我、為以色列及猶大所留的百姓，將所拾著此本冊的話問耶和華；因為耶和華的受氣大大傾落佇咱，是為著咱的列祖無守耶和華的話，無照此本冊一切所記載的去行。」
34:21 「恁去，為我，為以色列及猶大留落來的人民，將所發見此卷冊的話請問上主。因為咱的祖先無遵守上主的話，無照此卷冊所記載的教示去做，所以上主對咱發大受氣。」
34:22 對按呢，希勒家及王所託的人攏去見女先知戶勒大。伊是哈斯拉的孫、特可哈的子，管理禮服彼個沙龍的某。伊𫢶佇耶路撒冷第二區；𪜶將此個意思給伊講。
34:22 對按呢，希勒家及王所派的人做夥去見女先知戶勒大。伊是管理禮服彼個沙龍的某；沙龍是哈珥哈斯的孫，特瓦的子。戶勒大住佇耶路撒冷新的城區。𪜶給伊請教。
34:23 伊應𪜶講：「耶和華──以色列的上帝按呢講：『恁去回覆彼個差恁來見我的人講，
34:23 伊對𪜶講：「上主 — 以色列的上帝按呢講：『恁去回復差恁來見我的人，給伊講
34:24 耶和華按呢講：看啊！我欲降災禍佇此所在，以及佇遮徛起的百姓，就是𪜶讀佇猶大王面前的冊所記載許個咒詛；
34:24 上主按呢講：我欲照佇猶大王面前讀的冊所記載的咒詛，降災禍佇此個所在及遮的住民。
34:25 因為𪜶棄拺我，燒香佇別個上帝，用𪜶的手所做的激我的受氣，所以我的大受氣傾落佇此所在無息。』
34:25 因為𪜶棄拺我，給別個神明燒香，用𪜶的所做激我受氣，所以我欲將大受氣摒落佇此個所在無煞。』
34:26 總是差恁來問耶和華的猶大王，恁著按呢給伊講：『耶和華──以色列的上帝按呢講：論到你所聽見的話，
34:26 毋拘差恁來請問上主的猶大王，恁著按呢對伊講：『上主 — 以色列的上帝按呢講：你聽著
34:27 你的心就軟，家己謙卑佇上帝的面前，因為你聽見伊所講攻擊此所在及佇遮徛起的百姓的話，彼時你佇我的面前家己謙卑，閣拆裂你的衫，佇我的面前啼哭，我已經聽見你。這是耶和華講的。
34:27 我對此個所在及遮的住民警告的話，你就懺悔，佇上帝面前謙卑，閣拆裂衫，佇我的面前啼哭，我有聽著。上主講：
34:28 我欲互你歸你的列祖，你欲平安歸墓，我所欲降落佇此所在及佇遮徛起的百姓一切的災禍，你的目睭的確𣍐看見。』」𪜶就倒轉去回覆王。
34:28 我欲互你平安離開世間，轉去你的列祖遐。你𣍐看著我所欲降落佇此所在及遮的住民一切的災禍。』」
𪜶就倒去，將諸個話對王回復。
約西亞立約順趁耶和華
34:29 ( 王下 23:1-20 )
王就差人聚集猶大及耶路撒冷的眾長老。
約西亞的改革
34:29 ( 王下 23:1-20 )
約西亞王派人召集猶大及耶路撒冷的眾長老。
34:30 王就上去耶和華的殿，猶大眾人及徛起耶路撒冷的百姓，及祭司利未人，及眾百姓，無論大細，攏及伊去；王就將耶和華殿內偶然得著約的冊一切的話讀互𪜶聽。
34:30 王上去上主的殿；猶大眾人及耶路撒冷所有的住民、祭司、利未人，及所有的人民，無論大細，嘛攏上去。王就將佇上主殿內發見的約書一切的話讀互𪜶聽。
34:31 王徛佇伊的位，佇耶和華的面前立約，欲盡心盡性順趁耶和華，守伊的誡命，及干證的話，及律例，來成此本冊所記立約的話；
34:31 王徛佇伊的位，佇上主的面前立約，欲全心全意順趁上主，遵守伊的誡命、教示，及規例，實行此卷冊所寫立約的話。
34:32 伊互耶路撒冷及便雅憫所有的百姓攏承認此個約。對按呢耶路撒冷徛起的百姓照上帝的約來行，就是𪜶列祖的上帝。
34:32 伊互耶路撒冷及便雅憫所有的人民攏答應遵守此個約；耶路撒冷的住民就遵行𪜶及𪜶列祖的上帝所立的約。
34:33 約西亞將屬以色列人許個地，一切可惡的攏除去，閣互所有佇以色列的人服事耶和華──𪜶的上帝。當約西亞佇啲的日，百姓趁耶和華──𪜶列祖的上帝，攏無離開。
34:33 約西亞將國內一切可惡的偶像除去，閣互所有的以色列人攏服事上主 — 𪜶的上帝。約西亞活啲的日，人民順趁上主 — 𪜶列祖的上帝，攏無偏離。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。