上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王瑪拿西
33:1 ( 王下 21:1-9 )
瑪拿西坐位的時十二歲，佇耶路撒冷做王共五十五年。
猶大王瑪拿西
33:1 ( 王下 21:1-9 )
瑪拿西坐位的時十二歲，佇耶路撒冷作王五十五年。
33:2 伊行耶和華所看做歹的事，學外邦人所行可惡的事就是耶和華佇以色列的面前所趕出的，
33:2 伊做上主看做歹的事，學許個互上主佇以色列面前趕出的列國所做可惡的事。
33:3 因為伊的老父希西家所毀壞的山頭壇伊閣起伊，閣為許個巴力起壇，做亞斯他錄，閣敬拜天頂的萬象來服事伊，
33:3 伊重建伊的老父希西家所毀壞的山頭壇，為巴力起祭壇，造亞舍拉的柱像，閣敬拜服事天頂的萬象。
33:4 佇耶和華的殿內起幾若個壇──耶和華曾指此個殿講：「我的名欲永遠佇耶路撒冷。」
33:4 伊佇上主的殿內為著許個神明起幾若個壇；上主曾指此個聖殿，講：「我的名應該永遠佇耶路撒冷受敬奉。」
33:5 伊佇耶和華的殿二個院內為著天頂的萬象起壇，
33:5 瑪拿西佇上主的殿兩個埕內面，為著天頂的萬象起祭壇。
33:6 閣佇便欣嫩的山谷互伊的子兒經過火，閣看兆頭，用法術，做徼，用跳童者，請師公行多多耶和華所看做歹的事，激伊受氣，
33:6 伊佇欣嫩子山谷燒伊的子獻做祭，卜卦，行法術，行邪術，問牽亡的及童乩桌頭，做真多上主看做歹的事，激上主受氣。
33:7 閣佇上帝的殿內祀伊所造雕刻的像。此間殿是上帝曾對大衛及伊的子所羅門指伊來講：「此間殿及耶路撒冷就是我佇以色列眾支派中所揀的，我欲安置我的名佇遐到永遠。
33:7 瑪拿西閣佇上帝的殿內𫞼雕刻的偶像。關係此間聖殿，上帝曾對大闢及伊的子所羅門講：「此間聖殿及耶路撒冷，是我佇以色列支族中所揀選的，我的名著佇遮永遠受敬奉。
33:8 以色列人若執守來行我一切所命令𪜶的就是我託摩西所傳一切的法度、律例、禮儀，我就無閣移徙𪜶的腳離開我所定著互恁列祖的地。」
33:8 以色列人若聽趁我所有的命令，就是我通過摩西所傳一切的教示、規例，及誡命，我就無閣互𪜶對我所賞賜𪜶列祖的土地受遷徙。」
33:9 瑪拿西迷惑猶大及耶路撒冷徛起的百姓致到𪜶行歹比耶和華佇以色列人的面前所滅的列國閣卡傷重。
33:9 毋拘瑪拿西導猶大及耶路撒冷的住民做歹，比上主佇以色列人面前所毀滅的列國閣較嚴重。
瑪拿西悔改
33:10 耶和華吩咐瑪拿西及伊的百姓，總是𪜶無欲聽。
瑪拿西悔改
33:10 上主警戒瑪拿西及伊的人民，毋拘𪜶毋聽。
33:11 所以耶和華互亞述王的軍長來攻擊𪜶，用鈎鈎著瑪拿西，用銅鍊縛伊，帶到巴比倫。
33:11 所以上主互亞述王的軍長來攻擊𪜶，用鉤仔鉤瑪拿西，用銅鍊縛伊，給伊帶去巴比倫。
33:12 伊佇患難的時，就懇求耶和華──伊的上帝，閣佇伊的列祖的上帝的面前極其謙卑。
33:12 伊佇困苦的時就懇求上主 — 伊的上帝，閣佇伊列祖的上帝面前非常謙卑。
33:13 伊求叫伊，上帝准伊所求，聽伊祈禱，互伊倒來耶路撒冷，猶原坐伊的國位。瑪拿西才知耶和華是上帝。
33:13 伊求叫上帝，上帝就聽伊的懇求，互伊倒來耶路撒冷，回復伊的統治。瑪拿西才知上主是上帝。
33:14 此霎了後，瑪拿西起牆佇大衛的城外，佇基訓的西旁佇山谷內到魚門的門口，圍踅俄裴勒，牆起真高；閣設立軍長佇猶大許個堅固的城內；
33:14 後來，瑪拿西佇大闢城的城外，對基訓泉附近的山谷，向北到魚門及俄斐勒地區，起真高的城牆，閣設立軍長防守猶大許個堅固的城。
33:15 閣對耶和華的殿除去許個外邦的上帝及偶像，閣佇耶和華殿的山及耶路撒冷所起許個壇攏㧒佇城外；
33:15 伊廢除上主聖殿內面許個外族的神明及偶像，拆毀伊佇上主聖殿的山及耶路撒冷起的壇，將諸個攏㧒佇城外。
33:16 閣起耶和華的祭壇，佇壇頂獻謝恩祭、感謝祭，命令猶大人服事耶和華──以色列的上帝。
33:16 伊閣修建上主的祭壇，佇壇頂獻平安祭、謝恩祭，命令猶大人服事上主 — 以色列的上帝。
33:17 總是百姓猶原佇山頭壇獻祭，獨獨獻互耶和華──伊的上帝若定。
33:17 人民猶原佇山頭壇獻祭，毋拘只有獻互上主 — 𪜶的上帝。
瑪拿西死
33:18 ( 王下 21:17-18 )
瑪拿西其餘的事及伊祈禱上帝的話，及先見奉耶和華──以色列的上帝的名對伊講許個話，攏記佇以色列諸個王的記錄。
瑪拿西死
33:18 ( 王下 21:17-18 )
瑪拿西其他的事蹟，伊對上帝的祈禱，及先見奉上主 — 以色列的上帝的名對伊警戒的話，攏記載佇《以色列列王史》。
33:19 伊的祈禱，及上帝怎樣允准伊，伊未謙卑以前的罪過過失，及起山頭壇設立許個亞舍拉及雕刻偶像許個所在，攏記佇何賽的史記。
33:19 伊的祈禱，及上帝對伊的應答，以及伊猶未悔改以前的罪過過失，及伊佇什麼所在起山頭壇，𫞼亞舍拉柱像及偶像，攏記載佇何賽的冊。
33:20 瑪拿西及伊的列祖同睏，埋葬佇家己的宮內。伊的子亞們續接伊做王。
33:20 瑪拿西轉去伊的列祖遐，人將伊安葬佇伊家己的宮內。伊的子亞們續接伊作王。
猶大國的王亞們
33:21 ( 王下 21:19-26 )
亞們坐位的時二十二歲，佇耶路撒冷做王歷過二年。
猶大王亞們
33:21 ( 王下 21:19-26 )
亞們坐位的時二十二歲，佇耶路撒冷作王兩年。
33:22 伊行耶和華所看做歹的事，學伊的老父瑪拿西所做的，亞們祭祀伊的老父瑪拿西所造許個雕刻的偶像來服事伊，
33:22 伊做上主看做歹的事，親像伊的老父瑪拿西所做的。亞們對伊的老父瑪拿西所造的偶像獻祭，閣服事𪜶。
33:23 無家己謙卑佇耶和華的面前，親像伊的老父瑪拿西的家己謙卑。此個亞們愈久愈犯罪。
33:23 伊無親像伊的老父瑪拿西佇上主的面前家己謙卑。此個亞們犯罪愈來愈嚴重。
33:24 伊的人臣背叛伊，刣死伊佇王宮內。
33:24 伊的人臣背叛伊，佇王宮內面給伊刣死。
33:25 總是國民刣死許個背叛亞們王的人，國民就設立伊的子約西亞續接伊做王。
33:25 毋拘國內的人民將許個背叛亞們王的人刣死，設立伊的子約西亞續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。