上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
亞述人圍困耶路撒冷
32:1 ( 王下 18:13-17 19:14-19,35-37 賽 36:1-22 37:8-38 )
諸個代誌，伊實心行伊以後，亞述王西拿基立上來，來侵入猶大，紮營圍困諸個堅固的城，想欲取做家己的。
亞述威脅耶路撒冷
32:1 ( 王下 18:13-37 19:14-19, 35-37 賽 36:1-22 37:8-38 )
希西家忠誠做諸個代誌以後，亞述王西拿基立上來侵略猶大，圍困堅固的城，想欲攻取諸個城。
32:2 希西家看見西拿基立已經來，定著意思欲攻擊耶路撒冷，
32:2 希西家看見西拿基立已經來，知影伊一定欲攻打耶路撒冷，
32:3 就及伊許個首領以及勇士參詳，欲塞密城外的水源；𪜶就幫助伊。
32:3 就及許個首領以及勇士參詳，欲塞密城外的水源；𪜶攏支持伊。
32:4 對按呢多多百姓聚集，塞密一切的水源，及流過彼所在的溪，講：「亞述許個王來，啥事互伊得著多多水啊？」
32:4 真多人民聚集，塞密所有的水源及流過彼地區的溪，講：「哪著互亞述許個王有真多水通飲？」
32:5 希西家強伊的心志，起彼個倒壞的城牆，高到守更樓；閣起一鑆牆佇城外，閣堅固大衛城的米羅，閣製造多多戰器、及屏牌；
32:5 希西家奮發，修建損壞的城牆，起造城樓，佇城外閣起一座牆，加強大闢城的米羅，閣製造真多軍器及盾牌。
32:6 設立軍長管理百姓，聚集𪜶到伊遐，佇城門寬闊的所在，用話安慰𪜶，講：
32:6 希西家有設立軍事將領管理人民；伊召集𪜶來城門的廣場，激勵𪜶，講：
32:7 「強恁的心壯恁的志，莫得因為亞述王及隨伊的大軍隊來愞、來驚；因為及咱佇啲者，比及𪜶佇啲者卡大。
32:7 「著堅強勇敢，毋通因為亞述王及伊的大軍隊驚惶失膽；因為及咱同在的，比及𪜶同在的較強；
32:8 及伊佇啲者是肉體的手，及咱佇啲者是耶和華──咱的上帝，伊欲幫助咱替咱交戰。」百姓就安然，靠猶大王希西家的話。
32:8 及𪜶同在的是肉體的手骨，及咱同在的是上主 — 咱的上帝，伊欲幫贊咱，替咱交戰。」人民因為猶大王希西家的話得著真大的鼓勵。
32:9 後來，亞述王西拿基立及伊的全軍攻擊拉吉的時，就差伊的奴僕到耶路撒冷見猶大王希西家及一切佇耶路撒冷的猶大人，講：
32:9 後來，亞述王西拿基立及伊的全軍攻打拉吉的時，派伊的人臣去耶路撒冷見猶大王希西家及所有耶路撒冷的猶大人，講：
32:10 「亞述王西拿基立按呢講：『恁倚靠甚麼，才𫢶佇耶路撒冷受圍困啊？
32:10 「亞述王西拿基立按呢講：『恁啲靠什麼，耶路撒冷受圍困，恁猶啲守？
32:11 希西家講「耶和華──咱的上帝欲救咱脫離亞述王的手」，這豈是引誘恁，互恁枵嘴乾來死嗎？
32:11 希西家講，上主 — 恁的上帝會救恁脫離亞述王的手。伊按呢是啲騙恁，結局會害恁枵死，嘴焦死。
32:12 此個希西家豈是廢無耶和華的山頭壇及伊許個壇，命令猶大及耶路撒冷的人講「恁著佇此個壇前敬拜，燒香佇彼頂面」？
32:12 此個希西家豈毋是有廢除上帝的山頭壇及祭壇，閣給猶大及耶路撒冷的人講：恁一定著佇耶路撒冷此個祭壇敬拜燒香？
32:13 我及我的列祖對列國的百姓所行的，恁豈知嗎？列邦的上帝彼時豈會救家己的國脫離我的手嗎？
32:13 恁豈毋知我及我的列祖按怎對付列國的人民？萬國的眾神明豈曾救家己的國脫離我的手？
32:14 我的列祖所滅無許個國，𪜶許個上帝的中間是誰會救伊的國脫離我的手？就恁的上帝豈會救恁脫離我的手嗎？
32:14 我的列祖消滅的國家，𪜶的神明叨一個有救伊的人民脫離我的手？按呢，恁的上帝哪會當救恁脫離我的手頭？
32:15 所以莫得互希西家按呢騙恁引誘恁，也莫得信伊；因為無一邦一國的上帝會救伊的百姓脫離我的手脫離我的列祖的手，何況恁的上帝豈會救恁脫離我的手？』」
32:15 所以，毋通互希西家騙去，給恁迷惑，嘛毋通相信伊；因為無任何一個國家的神明會救伊的人民脫離我及我的列祖的手；恁的上帝，伊嘛一定𣍐當救恁脫離我的手！』」
32:16 西拿基立的人臣猶閣講誹謗耶和華上帝及伊的奴僕希西家的話。
32:16 西拿基立的人臣講真多褻瀆主上帝及伊的僕人希西家的話。
32:17 閣寫批謗瀆耶和華──以色列的上帝，譏刺伊講：「列邦的百姓的上帝既然𣍐會救伊的百姓脫離我的手，希西家的上帝也𣍐會救伊的百姓脫離我的手。」
32:17 西拿基立閣寫批謗瀆上主 — 以色列的上帝，譏刺伊講：「列邦的神明既然𣍐當救𪜶的人民脫離我的手，希西家的上帝嘛𣍐當救伊的人民脫離我的手。」
32:18 伊許個人臣用猶大的腔口大聲叫許個佇城牆頂的耶路撒冷人，欲互𪜶驚，擾亂𪜶，通取彼個城。
32:18 西拿基立的人臣用猶大話，大聲對城牆頂的耶路撒冷人講話，給𪜶恐嚇，擾亂𪜶的心，通攻取此個城。
32:19 𪜶講論耶路撒冷的上帝親像講論世上許個百姓的上帝，人的手所造的一樣。
32:19 𪜶談論耶路撒冷的上帝，親像啲講世間人的手所造的神明仝款。
32:20 希西家王及亞摩斯的子先知以賽亞因為按呢祈禱，向天求叫。
32:20 希西家王及亞摩斯的子先知以賽亞為著此個事祈禱，向上帝求叫。
32:21 耶和華就差一個使者入亞述王的營中，一盡滅許個大能力的勇士，以及許個首領軍長。亞述王滿面見誚倒去本國，入伊的上帝的廟內，有伊親生的子佇遐用刀刣死伊。
32:21 上主就差一個使者入亞述王的營中，消滅許個強猛的戰士、官長，及將領。亞述王滿面見笑倒去伊的本國。有一日，伊入去伊的神明的廟，互伊幾個親生子用刀給伊刣死。
32:22 按呢，耶和華救希西家及耶路撒冷徛起的百姓脫離亞述王西拿基立的手，也脫離一切對敵的手，閣互𪜶四圍平安。
32:22 按呢，上主解救希西家及耶路撒冷的住民脫離亞述王西拿基立及所有對敵的手，閣互𪜶四境平安。
32:23 有多多人帶禮物到耶路撒冷獻互耶和華，閣將寶物送猶大王希西家。此霎了後，希西家互列邦看伊做尊大。
32:23 此個代誌了後，希西家得著列國的尊敬。有真多人帶禮物來耶路撒冷，獻互上主，閣帶寶貝送猶大王希西家。
希西家的病及驕傲
32:24 ( 王下 20:1-3,12-19 賽 38:1-3 39:1-8 )
彼時希西家破病得欲死，就祈禱耶和華，耶和華給伊講，閣互伊一個兆頭。
希西家破病及驕傲
32:24 ( 王下 20:1-3, 12-19 賽 38:1-3 39:1-8 )
彼個時陣，希西家病甲啲欲死，就對上主祈禱；上主給伊應允，閣互伊一個兆頭。
32:25 總是希西家無照伊所得著的恩典來報答；因為伊心內驕傲，所以有受氣到佇伊及猶大及耶路撒冷。
32:25 毋拘希西家因為驕傲，無照伊所得著的恩典報答上主；所以上主的審判臨到伊、猶大，及耶路撒冷。
32:26 總是希西家及耶路撒冷徛起的百姓，因為心驕傲就家己謙卑，致到耶和華的受氣佇希西家佇啲的日無到佇𪜶。
32:26 後來，希西家及耶路撒冷的住民為著𪜶的驕傲謙卑認罪，上主就無佇希西家活啲的日給𪜶審判。
希西家的財富及尊榮
32:27 希西家有多多貨財及大榮光，為家己起府庫，收囥金銀、寶石、香料、屏牌，及逐樣的寶器，
希西家的財富及尊榮
32:27 希西家有真多財富，閣真受人尊敬。伊為著家己起府庫，收囥金銀、寶石、香料、盾牌，及逐款貴重的物件；
32:28 閣為著所出的五榖、新酒，及油起庫房，閣為著逐樣的精牲搭草棚起羊；
32:28 伊閣起倉庫收囥五穀、新酒，及油，嘛為著牲生搭牛椆及羊椆。
32:29 閣為家己起城，閣有多多牛群羊群，因為上帝賞賜伊財產真多。
32:29 伊閣起幾若個城，嘛有真多牛群、羊群，因為上帝有賞賜伊真多財富。
32:30 此個希西家也塞密基訓頂面的水泉，引水互伊落來，流到大衛城的西旁。希西家見所行的無亨通。
32:30 希西家佇基訓泉的出口截水，給水引落來到大闢城的西旁。希西家所做的逐項攏順利。
32:31 總是巴比倫許個首領差使者來伊遐，欲問國內所有的奇事；佇此個事上帝離開伊，欲試驗伊，通知伊心內一盡所有的。
32:31 毋拘，巴比倫許個領袖差使者來伊遐，欲了解猶大國所發生的奇事；佇此個事，上帝離開伊，欲考驗伊，愛知伊的心思意念。
希西家死
32:32 ( 王下 20:20-21 )
希西家其餘的事及伊的好所行攏記佇亞摩斯的子先知以賽亞默示的冊，及猶大以色列諸個王的記錄。
希西家死
32:32 ( 王下 20:20-21 )
希西家其他的事蹟，及伊對上主的忠誠，攏記載佇《猶大及以色列列王史》及亞摩斯的子先知以賽亞的《默示書》。
32:33 希西家及伊的列祖同睏，埋葬佇大衛的子孫墳墓卡高的所在。伊死的時猶大人及耶路撒冷徛起的百姓攏尊敬伊。伊的子瑪拿西續接伊做王。
32:33 希西家轉去伊的列祖遐，安葬佇大闢子孫的墓地較高的所在。伊死的時，猶大人及耶路撒冷的住民攏為著伊哀傷，給伊致敬。伊的子瑪拿西續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。