上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
希西家改革宗教生活
31:1 諸個代誌攏明白，佇遐的以色列眾人出去到猶大許個城，拍碎柱像，剉斷許個亞舍拉，閣佇猶大、便雅憫、以法蓮、瑪拿西遍地拆毀山頭壇及祭壇到一盡滅伊。對按呢，以色列眾人逐個倒去𪜶的業，到𪜶的本城。
希西家的改革
31:1 諸個代誌結束了，佇遐的以色列眾人就出去，去猶大逐個城拍碎石柱像，摃斷亞舍拉女神的柱像；閣佇猶大、便雅憫、以法蓮，及瑪拿西地區，拆毀所有的山頭壇及祭壇。了後，以色列眾人就倒去家己的所在。
31:2 希西家設立祭司利未人的班列，照𪜶的班列各照𪜶的職份，祭司及利未人獻燒祭、謝恩祭，閣佇耶和華許個營的門內服事，感謝謳咾。
31:2 希西家照逐個祭司及利未人的職務重新組織𪜶的班次，互𪜶通獻燒化祭及平安祭，閣佇上主聖殿的門內服事、感謝、頌讚。
31:3 閣對伊的產業中定著王的份額做燒祭，就是早暗的燒祭及許個安息日、月的初一，及節期的燒祭，攏是照耶和華律法所記載的；
31:3 王閣對伊的產業奉獻牛羊做燒化祭；就是佇逐日早暗、安歇日、每月初一，及節期，照上主律法的規定獻燒化祭。
31:4 閣吩咐𫢶佇耶路撒冷的百姓供給祭司及利未人應該得著的份額，互𪜶專務耶和華的律法。
31:4 希西家命令耶路撒冷的住民供給祭司及利未人應該得著的份額，互𪜶專心執行上主律法的規定。
31:5 命令一下出，以色列人就帶多多起頭熟的五榖、酒、油、蜜，及田裡所出的，閣用逐項物的十份一帶真多來。
31:5 命令一下出，以色列人就帶真多頭水的五穀、酒、油、蜜，及園裡的出產來；閣帶逐項物的十分一來，數量真多。
31:6 𫢶猶大諸個城的以色列人及猶大人也牽牛羊的十份一來，閣帶分別做聖歸互耶和華──𪜶的上帝的物十份一，疊一堆一堆；
31:6 住佇猶大的城的以色列人及猶大人，嘛牽牛羊的十分一來；閣對聖化歸上主 — 𪜶的上帝的物提十分一，疊一堆一堆。
31:7 對三月起積聚許個堆，到七月才明白。
31:7 對三月起，𪜶將許個物件疊做堆，到七月才結束。
31:8 希西家及許個首領來，看許個堆，就謳咾耶和華，祝福伊的百姓以色列。
31:8 希西家及眾首領看著許個囤積的物件，就稱讚上主，祝福伊的子民以色列。
31:9 希西家對祭司及利未人查問許個堆。
31:9 希西家對祭司及利未人查問關係許個囤積的物件的代誌。
31:10 屬撒督的家祭司頭亞撒利雅應講：「對百姓帶供給的物到耶和華的殿以來，阮食夠額，閣剩真多；因為耶和華賜福伊的百姓，所剩的到即多。」
31:10 撒督的後代大祭司亞撒利雅應講：「對人民帶禮物到上主的殿以來，阮攏有夠通食，閣賰真多，因為上主賜福伊的子民，所以賰即多。」
31:11 希西家吩咐佇耶和華的殿內備辦粟倉，𪜶就備辦伊。
31:11 希西家命令著佇上主的殿內準備倉庫，𪜶就準備。
31:12 𪜶誠實心將禮物及所抽的十份一，及分別做聖的物，攏搬入來。利未人歌楠雅辦理此個事，伊的小弟示每做幫辦。
31:12 𪜶誠實將禮物及十分一的奉獻，以及聖化歸上主的物，攏搬入來。利未人歌楠雅負責此個事；伊的小弟示每做副主管。
31:13 耶歇、亞撒細雅、拿哈、亞撒黑、耶利末、約撒拔、以列、伊斯瑪基雅、瑪哈、比拿雅攏是委員，佇歌楠雅及伊的小弟示每的手下，是希西家王及管理上帝的殿的亞撒利雅所派的。
31:13 希西家王及管理上帝聖殿的亞撒利雅派耶歇、亞撒西雅、拿哈、亞撒黑、耶利摩、約撒拔、以利業、伊斯瑪基雅、瑪哈，及比拿雅，協助歌楠雅及伊的小弟示每。
31:14 顧東門的利未人音拿的子可利，掌管甘心獻互上帝的物，分發獻互耶和華的禮物及許個至聖的物。
31:14 聖殿東門的守衛利未人音拿的子可利，負責管理甘心獻互上帝的物，閣分發獻互上主的禮物及許個至聖的物。
31:15 做伊的二手的有伊甸，珉雅珉、耶書亞、示瑪雅、亞瑪利雅、示迦尼雅，佇祭司諸個城照班列用實心，分發互𪜶的兄弟，無論大細攏互𪜶。
31:15 佇祭司的城，有伊甸、米拿民、耶書亞、示瑪雅、亞瑪利雅、示迦尼諸個人做伊的助手，忠實將人民的奉獻，照𪜶的班次，無論大細，分發互𪜶的親族。
31:16 這就是佇許個記入族譜，三歲以上的查甫丁以外，就是見若入耶和華的殿者，照逐日的分所應該的，為著𪜶照班列盡伊的職來服事；
31:16 有登錄佇家譜三十歲以上的查甫人，以及逐日佇上主的殿，照𪜶的職務及班次啲服事的人，嘛分互𪜶。
31:17 閣祭司照伊的世系記佇族譜，以及利未人對二十歲以上，照𪜶的班列盡𪜶的職，
31:17 𪜶閣分互照宗族登錄佇家譜的祭司，以及二十歲以上，照班次執行職務的利未人。
31:18 閣記載佇族譜中的，𪜶的細漢者、𪜶的某、𪜶的子，𪜶的查某子佇全會中的；因為𪜶盡職分，家己清氣成聖。
31:18 𪜶閣分互全體會眾中間登錄佇家譜，有需要扶養的家屬 — 𪜶的某、兒女；因為𪜶忠實分別家己做聖。
31:19 也為著亞倫的子孫，就是𫢶佇𪜶的城外的、田地的祭司佇逐個城有記名的人，來分發𪜶應該得著的份額，互祭司的查甫丁以及見若記佇族譜的利未人。
31:19 閣為著住佇城外草埔的亞倫後代的祭司，佇逐個城有指派人，將物件分互祭司家族的查甫人，以及有登錄佇家譜的利未人。
31:20 希西家佇猶大遍地按呢辦理，行善良正直，盡忠佇耶和華──伊的上帝的面前。
31:20 希西家佇猶大全地攏按呢辦理；伊做上主 — 伊的上帝看做好、正直、忠實的事。
31:21 見若伊起手所做的，佇辦理上帝殿的事，佇律法佇誡命，來尋伊的上帝，攏專心做伊，來亨通。
31:21 伊所做的，無論辦理上帝聖殿的事，遵行律法及誡命，攏尋求伊的上帝，專心去做，就事事亨通。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。