上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
備辦守𨃟過節
30:1 希西家差人到以色列及猶大遍地，閣寫批互以法蓮及瑪拿西，愛𪜶到耶路撒冷耶和華的殿，守𨃟過節服事耶和華──以色列的上帝；
準備守𨃟過節
30:1 希西家派人去以色列及猶大逐所在，閣寫批互以法蓮及瑪拿西的人，邀請𪜶來耶路撒冷上主的聖殿守𨃟過節，服事上主 — 以色列的上帝。
30:2 因為王及伊的首領，及佇耶路撒冷的會眾，已經相及議論欲佇二月守𨃟過節。
30:2 因為王及伊的官員，及佇耶路撒冷的會眾，已經參詳好，欲佇二月守𨃟過節。
30:3 彼時𪜶𣍐會守；因為家己清氣的祭司猶無夠額，百姓也無有聚集佇耶路撒冷；
30:3 正月𪜶𣍐當守節，因為潔淨家己的祭司的人數猶無夠額，人民嘛猶未聚集佇耶路撒冷。
30:4 王及會眾攏看此個代誌做好。
30:4 王及會眾攏贊成此個計劃，
30:5 就定著命令，宣佈佇以色列全地，對別是巴到但，互𪜶攏來，佇耶路撒冷守𨃟過節服事耶和華──以色列的上帝；因為百姓平素無多多人照所寫的規例來守伊。
30:5 就佇以色列全地，對別是巴到但宣告，請人民攏來耶路撒冷守𨃟過節，服事上主 — 以色列的上帝；因為過去照所寫的律法來守節的人無赫呢多。
30:6 走文書的帶王及伊許個首領的批，遍行以色列及猶大地。照王的命令講：「以色列人啊，恁著閣歸向亞伯拉罕、以撒、以色列的上帝──耶和華，伊就欲歸向恁就是脫離亞述許個王的手所剩的百姓。
30:6 送批的人帶王及伊許個官員的批，去以色列及猶大全地，宣讀王的命令，講：
「以色列人，著歸向上主 — 亞伯拉罕、以撒、雅各的上帝，伊就欲轉向恁，就是恁諸個脫離亞述諸王的手所賰的人民。
30:7 恁通親像恁的列祖及恁的兄弟；𪜶干犯耶和華──𪜶列祖的上帝，致到伊互𪜶抵著滅無，親像恁所看見的。
30:7 恁毋通親像恁的列祖及恁的同胞。照恁所知，𪜶得罪上主 — 𪜶列祖的上帝，致到伊給𪜶消滅。
30:8 今通親像恁的列祖來硬頷頸，著獻家己互耶和華，入伊的聖所，就是伊永遠分別做聖者；閣著服事耶和華──恁的上帝，通互伊的大受氣越轉離開恁。
30:8 今毋通親像恁的列祖硬心固執；著歸順上主，進入伊永遠分別作聖的聖殿，閣著服事上主 — 恁的上帝，互伊無閣對恁發大受氣。
30:9 因為恁若歸向耶和華，就恁的兄弟及恁的子兒欲佇掠𪜶的人的面前得著憐憫，通閣倒來此所在，因為耶和華──恁的上帝是慈悲、憐憫。恁若歸向伊，伊的確無越伊的面看恁。」
30:9 恁若歸向上主，恁的同胞及恁的兒女會對掠𪜶的人得著憐憫，閣倒來此個所在，因為上主 — 恁的上帝是慈悲憐憫。恁若歸向伊，伊一定會接納恁。」
30:10 走文書的一城過一城，遍行以法蓮、瑪拿西，到西布倫。若是許個人恥笑𪜶，譏刺𪜶。
30:10 送批的人一城過一城，行透以法蓮、瑪拿西，直到西布倫諸個地區，毋拘許個人給𪜶恥笑，侮辱。
30:11 總是亞設、瑪拿西、西布倫的中間也有人家己謙卑，來到耶路撒冷。
30:11 亞設、瑪拿西、西布倫中間有一寡人家己謙卑，來到耶路撒冷。
30:12 上帝也感動猶大人，互𪜶一心趁王及許個首領照耶和華的話所出的命令。
30:12 上帝嘛感動猶大人，互𪜶同心一意順趁上主的話，照王及許個領袖的命令去做。
守𨃟過節
30:13 二月，有多多人聚集佇耶路撒冷，成做真大的會，欲守除酵節。
守𨃟過節
30:13 二月，有真多人聚集佇耶路撒冷，成做真大的大會，欲守除酵節。
30:14 𪜶起來，一盡除去耶路撒冷所有的壇及燒香的壇，㧒佇汲淪溪。
30:14 𪜶將耶路撒冷獻祭燒香的壇攏徙走，㧒佇汲淪溪谷。
30:15 二月十四日刣𨃟過節的羊仔。祭司及利未人家己見誚，清氣家己，帶燒祭到耶和華的殿，
30:15 二月十四，𪜶刣𨃟過節的羊羔。祭司及利未人感覺見笑自責，就潔淨家己，閣帶燒化祭來上主的殿。
30:16 照上帝的奴僕摩西的律法，照例逐人徛伊的位；祭司將𪜶對利未人的手接血，來灑伊。
30:16 𪜶照上帝重用的人摩西的律法的規定，逐個人徛佇𪜶侍奉的所在；祭司將對利未人接過來的血灑佇祭壇頂。
30:17 會中有多多人無清氣家己，所以託利未人替一切無清氣的人刣𨃟過節的羊仔，互𪜶佇耶和華的面前成做清氣。
30:17 會中有真多人禮儀上無清氣，所以託利未人替𪜶刣𨃟過節的羊羔，互𪜶佇上主的面前成做清氣。
30:18 因為以法蓮、瑪拿西、以薩迦、西布倫有多多人無清氣家己，總是𪜶也食𨃟過節，無合所記載的例。
30:18 對以法蓮、瑪拿西、以薩迦、西布倫地區來的人，有真多無照規定潔淨家己，嘛食𨃟過節的祭物。希西家替𪜶祈禱，講：「懇求至善的上主赦免
30:19 因為希西家替𪜶祈禱講：「見若有決斷的心尋上帝，就是耶和華──𪜶列祖的上帝，雖然無照聖所清氣的禮家己清氣，求至好的耶和華也赦免𪜶。」
30:19 所有無照規定潔淨家己的人，因為𪜶專心尋求上帝，就是上主 — 𪜶列祖的上帝。」
30:20 耶和華聽希西家祈禱，就醫好百姓。
30:20 上主聽希西家的祈禱，就赦免人民。
30:21 住佇耶路撒冷的以色列人大大歡喜，守除酵節七日久。利未人及祭司日日謳咾耶和華，用響亮的樂器謳咾耶和華。
30:21 住佇耶路撒冷的以色列人非常歡喜，守除酵節七日久；利未人及祭司逐日用響亮的樂器稱讚上主。
30:22 希西家安慰一切𠢕服事耶和華的利未人。對按呢眾人食節筵七日，獻謝恩節，閣認罪佇耶和華──𪜶列祖的上帝的面前。
30:22 希西家鼓勵所有𠢕服事上主的利未人。眾人食宴席七日，獻平安祭，閣感謝上主 — 𪜶列祖的上帝。
閣守節
30:23 全會議論，欲閣守節七日；對按呢歡喜閣守七日。
繼續守節
30:23 大會全體會眾決定欲閣守節七日。𪜶就歡歡喜喜閣慶祝七日。
30:24 因為猶大王希西家送會眾牛牨一千隻，羊七千隻做祭物；眾首領也送會眾牛牨一千隻，羊一萬隻，閣多多祭司家己清氣。
30:24 猶大王希西家送大會牛一千隻、羊七千隻；眾領袖嘛送牛一千隻、羊一萬隻；閣有真多祭司潔淨家己。
30:25 猶大會眾及祭司、利未人，及許個對以色列來的會眾以及許個對以色列地來的出外人，及徛起佇猶大的出外人，攏歡喜快樂。
30:25 猶大會眾、祭司、利未人，及對以色列來的會眾，以及許個對以色列地來的外族人，及住佇猶大的外族人，攏歡喜快樂。
30:26 對按呢，佇耶路撒冷大歡喜，因為對以色列王大衛的子所羅門的時，佇耶路撒冷未曾有按呢。
30:26 按呢，耶路撒冷充滿歡喜快樂，因為對以色列王大闢的子所羅門以後，佇耶路撒冷毋曾即呢歡喜。
30:27 彼時，祭司、利未人起來，給百姓祝福。𪜶的聲得著聽見，𪜶的祈禱透到伊徛起的聖所，到佇天裡。
30:27 祭司及利未人起來給人民祝福；𪜶的聲上帝有聽見，𪜶的祈禱透到伊天裡的聖所。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。