上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王希西家
29:1 ( 王下 18:1-3 )
希西家坐位的時二十五歲，佇耶路撒冷做王共二十九年。伊的老母名叫亞比雅，是撒迦利雅的查某子。
猶大王希西家
29:1 ( 王下 18:1-3 )
希西家坐位的時二十五歲，佇耶路撒冷作王二十九年；伊的老母叫做亞比雅，是撒迦利亞的查某子。
29:2 伊行耶和華所看做好的事，照伊的祖大衛一切所行的。
29:2 希西家做上主看做好的事，照伊的祖先大闢一切的所做。
清氣聖殿
29:3 佇元年正月，開耶和華殿的門，修理伊。
潔淨聖殿
29:3 希西家作王彼年的正月，伊開上主聖殿的門，進行整修的工作。
29:4 伊召許個祭司及利未人來，聚集佇東勢闊的所在，
29:4 伊召集許個祭司及利未人來聖殿東旁的廣場，
29:5 給𪜶講：「利未人啊，著聽我講：今恁著清氣家己，也著清氣耶和華──恁列祖的上帝的殿，對聖所傾出許個污穢。
29:5 對𪜶講：「利未人，聽我講。恁著家己聖化歸上主，嘛著將上主 — 恁列祖的上帝的殿分別作聖，將聖殿所有的污穢摒清氣。
29:6 因為咱的列祖有犯罪，行耶和華──咱的上帝所看做歹的事，離開伊，越轉伊的面，背耶和華徛起的所在，
29:6 因為咱的祖先有犯罪，做上主 — 咱的上帝看做歹的事，棄拺伊，無致意上主徛起的所在。
29:7 𪜶閣關鎖兩廊的門，拍熄燈火，無佇聖所燒香，獻燒祭互耶和華──以色列的上帝。
29:7 𪜶閣關聖殿走廊的門，無點燈火，無佇聖所燒香，無獻燒化祭互上主 — 以色列的上帝。
29:8 所以，耶和華受氣臨到猶大及耶路撒冷，互𪜶漂流，互人卬愕、恥笑，親像恁親目所看見的。
29:8 所以上主的大受氣臨到猶大及耶路撒冷，互𪜶受人恥笑，互人驚惶，感覺恐怖，親像恁親目看著的按呢。
29:9 因為按呢阮的父公受刀刣，阮的子查某子及阮的某也互人掠去。
29:9 所以，咱的祖先互人刣死，咱的某子嘛互人掠去。
29:10 今我的心欲及耶和華──以色列的上帝立約，互伊的大受氣越轉離開咱。
29:10 現在，我決定欲及上主 — 以色列的上帝立約，互伊無閣對咱發大受氣。
29:11 我諸個子啊，今通貧憚；因為耶和華揀恁徛佇伊的面前服事伊，擔當責任燒香互伊。」
29:11 我的子啊，毋通閣放外外，因為上主有揀選恁徛佇伊的面前服事，對伊燒香獻祭。」
29:12 對按呢，利未人哥轄族亞瑪賽的子瑪哈，亞撒利雅的子約珥；米拉利族亞伯底的子基士，耶哈利勒的子亞撒利雅；革順族薪瑪的子約亞，約亞的子伊甸；
29:12 對按呢，下面諸個利未人攏起來：
哥轄宗族：亞瑪賽的子瑪哈及亞撒利雅的子約珥
米拉利宗族：亞伯底的子基士及耶哈利勒的子亞撒利雅
革順宗族：薪瑪的子約亞及約亞的子伊甸
29:13 以利撒反的族申利及耶利；亞薩族撒迦利雅及瑪探雅；
29:13 以利撒反宗族：申利及耶利
亞薩宗族：撒迦利亞及瑪他尼
29:14 希幔族耶歇及示每；耶杜頓族示瑪雅及烏設攏起來；
29:14 希幔宗族：耶歇及示每
耶杜頓宗族：示瑪雅及烏薛
29:15 聚集𪜶的兄弟，清氣家己，照王趁耶和華的話所命令的，入去洗清耶和華的殿。
29:15 𪜶招集𪜶的親族潔淨家己，照王的命令，根據上主的話，入去潔淨上主的殿。
29:16 祭司入耶和華殿的內面欲洗清伊，將耶和華殿內所有的污穢帶出去到耶和華殿的院，利未人接伊，帶去外面到汲淪溪。
29:16 祭司就入去潔淨上主的聖殿，將殿內所有污穢的物帶出去上主聖殿的埕；利未人搬諸個物去㧒佇汲淪溪谷。
29:17 對正月初一日起手行清氣的事，彼月的初八日才到耶和華的兩廊，八日久清氣耶和華的殿，到正月十六日就明白。
29:17 潔淨聖殿的工作對正月初一開始，初八清到上主聖殿的走廊。𪜶閣用八日繼續潔淨上主的殿，到正月十六就完成。
重新奉獻聖殿
29:18 對按呢，𪜶入去見希西家王，講：「阮已經將耶和華的歸間殿及燒祭的壇以及伊的器具，排列餅的桌，及伊的器具攏洗清；
重新奉獻聖殿
29:18 對按呢，利未人就去報告希西家王，講：「阮已經將上主歸間聖殿，獻燒化祭的祭壇及壇所有的器具，囥獻祭的餅的桌及所有的器具，攏潔淨完成。
29:19 閣亞哈斯王坐位犯罪的時所棄拺的器具，阮攏備辦，閣清氣伊。看啊，今攏佇耶和華的壇前。」
29:19 亞哈斯作王犯罪的時所棄拺的器具，阮攏重新款好勢，聖化歸上主。現在攏排佇上主祭壇的頭前。」
29:20 希西家王透早起來，聚集城內的首領攏上耶和華的殿；
29:20 希西家王透早起來，召集城內的領袖攏來上主的殿。
29:21 𪜶牽七隻牛牨，七隻羊牨，七隻綿羊仔，七隻山羊牨，欲為國、為聖所、為猶大獻做贖罪的祭。王命令亞倫的子孫許個祭司，獻𪜶佇耶和華的壇，
29:21 𪜶牽七隻牛、七隻綿羊、七隻羊羔、七隻山羊，欲為著國家、聖殿，及猶大人民獻做贖罪祭。王命令亞倫的後代許個祭司，將諸個牲生獻佇上主的祭壇。
29:22 𪜶就刣牛牨，祭司接彼個血灑佇壇裡，也刣羊牨，用血灑佇壇裡，閣刣綿羊仔，也用血灑佇壇裡；
29:22 祭司先刣牛，才刣綿羊，閣刣羊羔，將每一隻的血灑佇壇裡。
29:23 用許個做贖罪祭的山羊牨牽到王及會眾的面前，𪜶就按手佇彼頂面。
29:23 最後，𪜶將欲獻做贖罪祭的山羊，牽來王及會眾的面前；王及會眾就按手佇彼頂面。
29:24 祭司刣伊，用𪜶的血做贖罪的祭佇壇裡，為以色列眾人贖罪，因為王命令著用燒祭及贖罪祭為以色列眾人來獻。
29:24 祭司刣許個山羊，用𪜶的血做贖罪祭獻佇壇裡，為以色列眾人贖罪；按呢𪜶照王的命令為以色列眾人獻燒化祭及贖罪祭。
29:25 王閣派利未人佇耶和華的殿提鈸，瑟琴，照大衛及王的先見迦得，及先知拿單所命令的，因為耶和華有託仗伊許個先知命令𪜶按呢。
29:25 希西家照上主通過大闢王、王的先見迦得，及先知拿單的指示，就是照上主通過眾先知所吩咐的，派利未人提鈸、琴、瑟佇上主的殿。
29:26 利未人提大衛的樂器，祭司攑號頭，相及啲徛。
29:26 利未人提大闢的樂器，祭司攑喇叭，做夥徛啲。
29:27 希西家命令獻燒祭佇壇裡，燒祭一下獻，就唱謳咾耶和華的歌，用號頭，閣用以色列王大衛的樂器來和伊。
29:27 希西家命令佇祭壇獻燒化祭。燒化祭一下獻，𪜶就唱稱讚上主的歌，用喇叭，用以色列王大闢的樂器伴奏。
29:28 會眾攏敬拜，唱歌的唱伊，歕號頭的歕伊，按呢到燒祭獻明白。
29:28 會眾攏敬拜，唱歌的吟詩，歕喇叭的伴奏，一直到獻燒化祭結束。
29:29 獻明白，王及一切相及佇啲的人攏俯頭敬拜。
29:29 獻祭結束，王及所有在場的人攏向上主仆拜。
29:30 希西家王及許個首領閣命令利未人用大衛及先見亞薩的詩謳咾耶和華；𪜶就歡喜吟詩謳咾，俯頭敬拜。
29:30 希西家王及許個領袖閣命令利未人，用大闢及先見亞薩的詩稱讚上主；𪜶就歡歡喜喜頌讚，俯頭敬拜上主。
29:31 希西家就應講：「恁已經家己分別歸互耶和華，著近前來帶祭物及謝恩祭到耶和華的殿。」會眾就帶祭物及謝恩祭來，見若甘心樂意的也帶燒祭來。
29:31 希西家對會眾講：「恁已經聖化歸上主，著進前來，帶祭物及謝恩祭到上主的殿。」會眾就帶祭物及謝恩祭來；嘛有人甘心樂意帶燒化祭來。
29:32 會眾所獻燒祭的額計共：牛牨七十隻，羊牨一百隻，綿羊仔二百隻，諸個攏是做燒祭獻互耶和華的；
29:32 會眾所獻的燒化祭有牛七十隻、綿羊一百隻、羊羔兩百隻，諸個攏做燒化祭獻互上主。
29:33 閣有分別做聖的物，牛牨六百隻，綿羊三千隻。
29:33 閣有分別作聖的物，牛六百隻、綿羊三千隻。
29:34 總是祭司甚少，𣍐會一盡剝許個燒祭精牲的皮，所以𪜶的兄弟利未人幫助𪜶，到彼個代誌明白，閣聽候許個祭司家己清氣；因為利未人誠心家己清氣，贏過祭司。
29:34 毋拘祭司傷少，𣍐當剝所有燒化祭牲生的皮，所以𪜶的親族利未人幫贊𪜶到獻祭的事結束，閣聽候許個祭司潔淨家己。(對潔淨家己的事，利未人比祭司較頂真。)
29:35 燒祭及謝恩祭的油，及逐號燒祭所配的灌奠真多。按呢，耶和華殿內的事照次序排列。
29:35 燒化祭及平安祭的油，以及及燒化祭做夥獻的奠酒祭真多。按呢，上主殿內敬拜的事閣再回復。
29:36 希西家及眾百姓歡喜，因為上帝替百姓所備辦的因為此個事忽然成。
29:36 希西家及全體人民攏真歡喜，因為上帝幫贊𪜶，互𪜶真緊完成此個事。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。