上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王亞哈斯
28:1 ( 王下 16:1-4 )
亞哈斯坐位的時二十歲，佇耶路撒冷做王十六年；無親像伊的祖大衛行耶和華所看做好的事，
猶大王亞哈斯
28:1 ( 王下 16:1-4 )
亞哈斯坐位的時二十歲，佇耶路撒冷作王十六年；伊無親像伊的祖先大闢做上主看做好的事，
28:2 就是行以色列諸個王的路，閣鑄造許個巴力的像，
28:2 顛倒去行以色列許個王的路，甚至鑄造巴力的神像，
28:3 閣燒香佇便欣嫩的山谷，用伊的子兒燒佇火裡，趁外邦所行可惡的事就是耶和華佇以色列人的面前所趕逐的；
28:3 佇欣嫩子山谷燒香，燒伊的子兒獻做祭，學上主佇𪜶面前趕出的列國所做可惡的事；
28:4 閣佇山頭壇、佇山的頂面、佇逐欉青翠的樹腳獻祭燒香。
28:4 閣佇山頭壇、逐個山崙仔、逐欉青翠的樹下面獻祭燒香。
及亞蘭及以色列交戰
28:5 ( 王下 16:5 )
所以，耶和華──伊的上帝交伊佇亞蘭王的手。𪜶就拍伊，掠伊的百姓真多，帶到大馬色。閣交伊佇以色列王的手，伊刣死𪜶真多。
及敘利亞、以色列交戰
28:5 ( 王下 16:5 )
亞哈斯犯罪，上主 — 伊的上帝就將伊交佇敘利亞王的手。敘利亞王給伊拍敗，掠伊真多的人民去大馬士革。上主閣給伊交佇以色列王的手，刣死真多猶大人。
28:6 利瑪利的子比加做一日佇猶大刣死十二萬人，攏是勇士，因為𪜶離開耶和華──𪜶列祖的上帝。
28:6 利瑪利的子以色列王比加一日的中間刣死十二萬個猶大精兵；因為𪜶棄拺上主 — 𪜶列祖的上帝。
28:7 有一個以法蓮中的勇士，名叫細基利，刣王的子瑪西雅及管理王宮的押斯利甘，及宰相以利加拿。
28:7 有一個以色列的勇士細基利，刣死王的子瑪西雅、管理王宮的亞斯利干，及宰相以利加拿。
28:8 以色列人掠𪜶的兄弟，連婦仁人子查某子共二十萬，閣搶多多財物，帶𪜶所搶的去撒瑪利亞。
28:8 以色列人掠𪜶的兄弟猶大人，包括婦仁人、子、查某子，共二十萬；閣搶真多戰利品，帶去撒馬利亞。
先知俄德
28:9 總是佇遐有耶和華的先知，名叫俄德，出去接許個來撒瑪利亞的軍隊，給𪜶講：「因為耶和華──恁列祖的上帝受氣猶大，所以將𪜶交佇恁的手，恁竟然受氣抵天，刣𪜶真多。
先知俄德
28:9 佇撒馬利亞，有一個上主的先知叫做俄德。伊出去迎接許個轉來撒馬利亞的軍兵，給𪜶講：「上主 — 恁列祖的上帝對猶大受氣，所以將𪜶交佇恁的手，恁竟然受氣抵天，刣死𪜶赫多人。
28:10 今恁有意思壓制猶大人及耶路撒冷人做恁的奴僕女婢，總是恁本身豈無得罪耶和華──恁上帝嗎？
28:10 今恁想欲強迫諸個猶大人及耶路撒冷人，無論男女攏做恁的奴隸，按呢恁豈毋是得罪上主 — 恁的上帝？
28:11 今恁著聽我講，恁所掠來恁的兄弟著放伊倒去，因為耶和華的大受氣臨到恁。」
28:11 著聽我講，恁掠來的是恁的兄弟姊妹，著放𪜶倒去，因為上主的大受氣已經臨到恁。」
28:12 對按呢，以法蓮的首領幾若人──就是約哈難的子亞撒利雅、米實利末的子比利家、沙龍的子耶希西家、哈得萊的子亞瑪撒──起來阻止許個對戰陣倒來者，
28:12 對按呢，有幾若個以法蓮的領袖，就是約哈難的子亞撒利雅、米實利末的子比利加、沙龍的子希西家，及哈得萊的子亞瑪撒起來阻止許個對戰場倒來的軍兵，
28:13 給𪜶講：「恁通帶所掠的人入來遮！因為恁所注意者是欲互阮得罪耶和華，加添阮的罪過阮的過失？因為阮的過失真大，已經有大受氣臨到以色列啦。」
28:13 對𪜶講：「恁毋通將諸個俘虜帶來遮。咱已經得罪上主，恁想欲閣加添咱的罪及過失是無？咱的罪已經真重，有上主的大受氣臨到以色列啦。」
28:14 對按呢攑家私的人將𪜶所掠的人所搶的物放佇許個首領及會眾的面前。
28:14 對按呢，軍兵就佇許個領袖及會眾的面前，將掠來的人及戰利品交出來。
28:15 頂面許個記名的人就起來，互受掠的人來；其中有褪裼者，就對所搶來的物中提衫互𪜶穿，閣用鞋互𪜶，閣互𪜶飲食，用油抹𪜶；其中軟弱者，就互𪜶騎驢，送到棗樹城耶利哥𪜶的兄弟遐；後來就倒去撒瑪利亞。
28:15 頂面彼四個領袖就起來，照顧許個受掠的人；對戰利品提衫及鞋互褪裼的穿，閣互𪜶飲食，用油給𪜶抹；互行𣍐去的騎驢；將許個受掠的送去棕樹城耶利哥𪜶的同胞遐。後來以色列人就倒去撒馬利亞。
亞哈斯向亞述王求幫助
28:16 ( 王下 16:7-9 )
彼時，亞哈斯王差使者去見亞述許個王，求𪜶幫助；
亞哈斯請求亞述王援助
28:16 ( 王下 16:7-9 )
彼時，亞哈斯王派使者去見亞述許個王，請求𪜶援助，
28:17 因為以東人閣來拍猶大，掠百姓去。
28:17 因為以東人閣來拍猶大，掠真多人做俘虜。
28:18 非利士人也來侵犯低的平洋及猶大南旁許個城，取伯‧示麥、亞雅崙、基低羅，梭哥及伊的鄉社，亭納及伊的鄉社，瑾鎖及伊的鄉社，就𫢶佇遐。
28:18 非利士人嘛來侵犯西旁山埔及猶大南旁的城鎮，攻佔伯‧示麥、亞雅崙、基低羅，以及梭哥、亭拿、瑾鎖諸個城及附近的庄社，閣住佇遐。
28:19 因為耶和華為著以色列王亞哈斯的緣故，互猶大卑微，是因為亞哈斯佇猶大放肆，大得罪耶和華。
28:19 上主為著猶大王亞哈斯的緣故，互猶大衰微，因為亞哈斯佇猶大濫糝做，背逆上主。
28:20 亞述王提革拉‧毗尼色上來，無援助伊，反轉窘迫伊。
28:20 亞述王提革拉‧比列色上來，無幫贊伊，顛倒給伊欺壓。
28:21 亞哈斯對耶和華的殿及王宮，及首領的家提出財寶互亞述王，總是攏無利益伊。
28:21 亞哈斯對上主的殿、王宮，及官員的家提財寶送互亞述王，毋拘亞述王無欲來幫贊伊。
亞哈斯的罪行
28:22 此個亞哈斯王佇緊急的時，益發得罪耶和華。
亞哈斯的罪
28:22 亞哈斯此個王佇危急的時，愈得罪上主。
28:23 因為伊祭祀大馬色的上帝就是拍伊者，講：「因為亞蘭王的上帝幫助𪜶，我也祭祀伊，互伊幫助我。」總是許個上帝互伊及以色列眾人攏倒壞。
28:23 伊獻祭互拍伊的大馬士革的神明；伊講：「因為敘利亞王的神明幫贊𪜶，我嘛欲向諸個神明獻祭，互𪜶通幫贊我。」毋拘許個神明顛倒互亞哈斯及全以色列人民衰敗。
28:24 亞哈斯聚集上帝殿的器具，拍破上帝殿內的器具，閣封鎖耶和華殿的門；佇耶路撒冷逐個越角起壇，
28:24 亞哈斯將上帝聖殿的器具攏集倚來，給𪜶拍碎；伊閣將上主聖殿的門關起來，佇耶路撒冷逐條街路的斡角起祭壇。
28:25 閣佇猶大逐個城起山頭壇，燒香互別個上帝，激動耶和華──伊的列祖的上帝的受氣。
28:25 伊閣佇猶大逐個城起山頭壇，燒香互別個神明，惹上主 — 伊的列祖的上帝受氣。
28:26 亞哈斯其餘的事及伊的行做，對頭到尾攏記佇猶大及以色列諸個王的記錄。
28:26 亞哈斯其他的事蹟及伊的所做，對頭到尾攏記載佇《猶大及以色列列王史》。
28:27 亞哈斯及伊的列祖同睏，埋葬伊佇耶路撒冷城，無互伊入佇以色列諸個王的墓。伊的子希西家續接伊做王。
28:27 亞哈斯轉去伊的列祖遐，人給伊安葬佇耶路撒冷城，無葬佇以色列諸個王的墓。伊的子希西家續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。