上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王烏西雅
26:1 ( 王下 14:21-22 15:1-7 )
猶大眾百姓設立烏西雅續接伊的老父亞瑪謝做王，彼時伊十六歲。（
猶大王烏西亞
26:1 ( 王下 14:21-22 15:1-7 )
猶大的人民設立烏西亞續接伊的老父亞瑪謝作王，彼時伊十六歲。
26:2 亞瑪謝王及伊的列祖同睏了後，烏西雅去以祿，互伊猶原歸猶大管轄。）
26:2 亞瑪謝王轉去伊的列祖遐了後，烏西亞收回以祿歸屬猶大國，閣給伊修建。
26:3 伊坐位的時十六歲，佇耶路撒冷做王共五十二年。伊的老母名叫耶可利雅，是耶路撒冷人。
26:3 烏西亞坐位的時十六歲，佇耶路撒冷作王五十二年；伊的老母叫做耶可利雅，是耶路撒冷人。
26:4 烏西雅行耶和華所看做好的事，照伊的老父亞瑪謝一切所行的；
26:4 烏西亞做上主看做好的事，照伊的老父亞瑪謝的所做去做。
26:5 當通達上帝啟示的，撒迦利亞佇啲的日，烏西雅定著意思欲尋上帝；伊尋耶和華的時，上帝就互伊亨通。
26:5 教導人敬畏上帝的撒迦利亞在世的時，烏西亞王尋求上主。伊尋求上主的年日，上帝互伊亨通繁榮。
26:6 伊出去攻擊非利士人，拆毀迦特的城牆、雅比尼的城牆，及亞實突的城牆；佇非利士人的中間，佇亞實突境內，起幾若個城。
26:6 伊出去攻擊非利士人，拆毀迦特、雅比尼，及亞實突的城牆，佇亞實突地區及佇非利士人的中間起幾若個城。
26:7 上帝幫助伊攻擊非利士人及𫢶佇姑珥‧巴力的亞拉伯人，以及米烏尼人。
26:7 上帝幫贊伊拍敗非利士人，及住佇姑珥‧巴力的阿拉伯人，以及米烏尼人。
26:8 亞捫人進貢烏西雅。伊的名聲傳到埃及的交界，因為伊盡在強盛。
26:8 亞捫人給烏西亞進貢；烏西亞的名聲透到埃及，因為伊非常強盛。
26:9 烏西雅佇耶路撒冷的角門及山谷門，及城牆轉彎的所在，起城樓，閣真堅固；
26:9 烏西亞佇耶路撒冷的角門、山谷門，及城牆斡角的所在，起堅固的城樓。
26:10 閣起守更樓佇曠野，閣開多多井佇低的地及平洋，因為伊有精牲真多；閣佇山地及好的田，伊有作穡人及料理葡萄園者，因為伊歡喜種作的事。
26:10 伊佇曠野起守望台，閣挖真多水池，因為伊佇山埔及平原有真多牲生；閣佇山區及肥的土地倩人種作及整理葡萄園，因為伊真愛種作。
26:11 烏西雅閣有戰士一隊，照書記耶利及首領瑪西雅所點算的，佇王軍長的一個哈拿尼雅的手下，分隊出去交戰。
26:11 烏西亞有真多訓練有素的軍隊；𪜶攏經過書記耶利及副官瑪西雅點算，受王的將軍哈拿尼雅指揮，會當隨時分隊出去作戰。
26:12 族長就是大能力的勇士，伊的總額共二千六百人，
26:12 諸個勇猛戰士的族長有兩千六百人。
26:13 佇𪜶的手下有過練的軍隊共三十萬七千五百人，攏是大能力，𠢕爭戰幫助王攻擊對敵的。
26:13 佇𪜶的手下有軍兵三十萬七千五百人，攏是勇猛的戰士，𠢕相戰，幫贊王攻擊對敵。
26:14 烏西雅為著𪜶就是伊的全軍備辦盾牌、槍、頭盔、戰甲，及弓，以及通甩的石，
26:14 烏西亞為著全軍準備盾牌、槍、頭盔、戰甲，及弓，以及欲挕的石。
26:15 閣佇耶路撒冷做機器，是奇巧的師傅所發明的，安佇城樓及城壔址來射箭發出大塊石。烏西雅的名聲傳到遠遠；因為伊得著非常的幫助，致到真強盛。
26:15 伊閣佇耶路撒冷請𠢕的師傅設計機器，安佇城樓及城牆的斡角，用來射箭，挕大塊石。烏西亞的名聲傳到真遠，國家真強盛，因為上帝幫贊伊。
烏西雅因為驕傲受罰
26:16 伊已經強盛，心就驕傲，致到腐敗，干犯耶和華──伊的上帝，因為伊入耶和華的殿，欲佇香壇燒香。
烏西亞受刑罰
26:16 烏西亞強盛了後心就驕傲，致到衰敗，得罪上主 — 伊的上帝。伊入去上主的聖殿，欲佇香壇燒香。
26:17 祭司亞撒利雅導耶和華勇敢的祭司八十人，隨伊入去。
26:17 祭司亞撒利雅導上主勇敢的祭司八十人隨烏西亞入去，
26:18 𪜶就阻擋烏西雅王，給伊講：「烏西雅啊，燒香互耶和華是你的代誌，就是祭司亞倫的子孫的事，𪜶受設立來燒香的。你著出聖殿！因為你已經犯罪。你行此個事，耶和華上帝無欲互你得著榮光。」
26:18 阻擋王，給伊講：「烏西亞，燒香互上主毋是你應該做的代誌，是祭司亞倫的後代受分別來做的職務。你著對聖殿出去，因為你已經犯罪，你𣍐當得著主上帝互你的尊榮。」
26:19 烏西雅就受氣，手提香爐欲燒香。伊受氣祭司的時，佇耶和華殿內香壇邊許個祭司的面前，伊的頭額忽然起癩𰣻。
26:19 烏西亞手提香爐欲燒香，一下聽著，就對徛佇上主殿內香壇邊許個祭司發受氣；彼時伊的頭額忽然起痲瘋。
26:20 祭司頭亞撒利雅及眾祭司，看見伊頭額起癩𰣻，就趕伊出殿；伊家己也緊緊出去，因為耶和華拍伊。
26:20 大祭司亞撒利雅及所有的祭司看著伊頭額起痲瘋，就給伊趕出聖殿，伊家己嘛趕緊離開，因為上主降災禍互伊。
26:21 烏西雅王起癩𰣻到伊死的日，因為伊癩𰣻另外厝徛起，及耶和華的殿絕斷。伊的子約坦管理王家，治理國民。
26:21 烏西亞王致著痲瘋到伊死的日，伊因為痲瘋受隔離，𣍐當閣進入上主的殿。伊的子約坦管理王家的事，治理國政。
26:22 烏西雅其餘的事，對頭到尾亞摩斯的子先知以賽亞記伊。
26:22 烏西亞其他的事蹟，對頭到尾有記載佇亞摩斯的子先知以賽亞的冊。
26:23 烏西雅及伊的列祖同睏；因為講，伊是癩𰣻的。人埋葬伊佇屬列王的墓地，及伊的列祖做堆。伊的子約坦續接伊做王。
26:23 烏西亞轉去伊的列祖遐；人講「伊致著痲瘋」，就將伊安葬佇列王墓園邊仔的墓地。伊的子約坦續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。