上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的亞瑪謝
25:1 ( 王下 14:2-6 )
亞瑪謝坐位的時二十五歲，佇耶路撒冷做王共二十九年。伊的老母名叫約耶但，是耶路撒冷人。
猶大王亞瑪謝
25:1 ( 王下 14:2-6 )
亞瑪謝坐位的時二十五歲，佇耶路撒冷作王二十九年；伊的老母叫做約耶但，是耶路撒冷人。
25:2 亞瑪謝行耶和華所看做好的事，總是心無專一。
25:2 亞瑪謝做上主看做好的事，毋拘心無專一。
25:3 伊的國權已經堅固，就刣死前刺客伊的老父猶大王許個人臣，
25:3 伊的王權一下堅固，就將刣死伊老父猶大王許個人臣處死。
25:4 總是無刣死𪜶的子，是照摩西律法的冊所記載耶和華命令講：「通因為子來刣死老父，也通因為父來刣死子，逐人著因為本身的罪來死。」
25:4 毋拘伊無刣死許個人臣的子兒，是照摩西律法的冊所記載上主的命令：毋通因為子兒的所做給老父處死，嘛毋通因為老父的所做給子兒處死；逐個人著因為家己的罪死。
及以東交戰
25:5 ( 王下 14:7 )
亞瑪謝聚集猶大人，照猶大及便雅憫的宗族設立千總、百總來導𪜶，閣算人額，對二十歲以上，得著過揀的兵會攑槍捾盾牌上陣的共三十萬；
及以東交戰
25:5 ( 王下 14:7 )
亞瑪謝召集猶大人民，照宗族佇猶大及便雅憫支族設立導一千人抑是一百人個軍官。伊點算二十歲以上特選的兵有三十萬人；𪜶攏會當攑槍，提盾牌出戰。
25:6 閣用銀一百他連得，對以色列招募大能力的勇士十萬人。
25:6 伊閣用三千四百公斤的銀，對北國以色列倩十萬個勇猛的戰士。
25:7 有上帝的奴僕來見伊，講：「王啊，莫得互以色列的軍兵及你去，因為耶和華無及以色列人就是以法蓮的後裔佇啲。
25:7 有一個上帝重用的人來見伊講：「王啊，毋通互以色列的軍兵及你做夥去；因為上主無及以色列人，就是以法蓮的後代同在。
25:8 你若一定欲去，就著奮勇爭戰！上帝欲互你敗佇對敵的面前；因為上帝有權會幫助人，也會捙倒人。」
25:8 你若一定欲按呢做，無論你按怎奮勇作戰，上帝嘛會互你刣輸；因為上帝會當互人贏，嘛會當互人輸。」
25:9 亞瑪謝問上帝的奴僕講：「我已經用銀一百他連得互以色列的軍隊，許個欲怎樣啊？」上帝的奴僕應講：「耶和華會用比諸個卡多互你。」
25:9 亞瑪謝問上帝重用的人講：「我已經用三千四百公斤的銀互以色列的軍隊，許個銀欲按怎？」
上帝重用的人應講：「上主會互你閣較多。」
25:10 對按呢亞瑪謝分別對以法蓮來的軍兵互𪜶倒去𪜶兜。所以，𪜶真受氣猶大人，氣咈咈倒去𪜶兜。
25:10 亞瑪謝就解散對北國以色列來的軍兵，叫𪜶倒去𪜶兜；𪜶對猶大人真受氣，氣沸沸倒去𪜶兜。
25:11 亞瑪謝家己奮勇，導伊的百姓出去到鹽的山谷，刣死西珥人一萬。
25:11 亞瑪謝堅強起來，導伊的軍兵出去到鹽的山谷，刣死一萬個以東人。
25:12 猶大人閣活掠一萬人帶到山崁頂，對山崁頂給𪜶捙落去，致到𪜶攏碎碎。
25:12 猶大人閣活掠一萬人，將𪜶帶到山崁頂面，對遐給𪜶捙落去，𪜶攏摔甲碎骨分屍。
25:13 亞瑪謝所差倒去許個軍隊，准𪜶及伊去交戰的，𪜶攻擊猶大許個城，對撒瑪利亞到伯‧和崙，刣死三千人，搶多多物。
25:13 許個互亞瑪謝解散的以色列軍兵，煞攻擊撒馬利亞及伯‧和崙中間的猶大城鎮，刣死三千人，閣搶真多物件。
25:14 亞瑪謝刣以東人倒來，就帶西珥族許個上帝立伊做家己的上帝，跪拜佇伊的面前燒香互伊。
25:14 亞瑪謝刣贏以東人倒來，帶𪜶的神像，𫞼做神明，給𪜶跪拜燒香。
25:15 因為按呢，耶和華大受氣亞瑪謝，就差一個先知去見伊，講：「許個百姓的上帝𣍐會救𪜶的百姓脫離你的手，你啥事求𪜶啊？」
25:15 因為按呢，上主對亞瑪謝發大受氣，就差一個先知去見伊，講：「許個外族的神明都𣍐當救𪜶的人民脫離你的手，你是按怎求問𪜶？」
25:16 伊及伊講的時，王給伊講：「阮豈設立你做王的謀士啊？你恬恬！啥事討拍啊？」先知就恬恬，閣講：「我知上帝定著意思欲滅你，因為你做此個，聽我的勸戒。」
25:16 伊及王講話的時，王給伊截話講：「恬去！啥人設立你做王的參謀？你愛死噢？」
先知就恬去，毋拘閣講：「我知上帝決定欲給你消滅，因為你做此個代誌，閣毋聽我的勸戒。」
及以色列爭戰
25:17 ( 王下 14:8-20 )
彼時猶大王亞瑪謝參詳，差使者去見耶戶的孫、約哈斯的子、以色列王約阿施，講：「來啊，咱二人相見面佇戰場。」
及以色列交戰
25:17 ( 王下 14:8-20 )
彼時，猶大王亞瑪謝及伊的參謀參詳了，派使者去見耶戶的孫，約哈斯的子，以色列王約華施，講：「來，咱來戰場拼輸贏。」
25:18 以色列王約阿施差使者去見猶大王亞瑪謝，講：「黎巴嫩的草茦差使者去見黎巴嫩的柏香樹，講：『用你的查某子互我的子做某。』後來黎巴嫩有一隻野獸經過，𧿬踏彼個草茦。
25:18 以色列王約華施派使者去給猶大王亞瑪謝講：「黎巴嫩的草刺差使者去見黎巴嫩的柏香樹，講：『你的查某子互我的子做某！』後來黎巴嫩有一隻野獸經過，給草刺踐踏。
25:19 今你講：『你已經拍贏以東』，你的心就驕，致到你誇口。你佇家內安然徛起就好，啥事起事惹災禍互你本身及猶大國相及倒壞啊？」
25:19 你已經刣贏以東，心就驕傲聳勢。你𫢶恁兜享受你的榮光就好，哪欲惹災禍，互你本身及猶大國做夥滅亡？」
25:20 總是亞瑪謝肯聽。因為此個事是出佇上帝，欲將𪜶交佇對敵的手，因為𪜶尋以東許個上帝。
25:20 毋拘亞瑪謝聽𣍐落去；此個代誌是出佇上帝，欲將𪜶交互對敵，因為𪜶求問以東的神明。
25:21 對按呢以色列王約阿施上來，佇猶大的伯‧示麥及猶大王亞瑪謝相見面佇戰場。
25:21 對按呢，以色列王約華施上來，佇猶大的伯‧示麥及猶大王亞瑪謝交戰。
25:22 猶大刣輸佇以色列的面前，逐人走倒去𪜶的布棚。
25:22 猶大互以色列拍敗，逐個人走倒去𪜶兜。
25:23 以色列王約阿施佇伯‧示麥掠著約哈斯的孫、約阿施的子、猶大王亞瑪謝，帶伊到耶路撒冷，閣拆毀耶路撒冷的城牆，對以法蓮門到角門，共四百肘；
25:23 以色列王約華施佇遐掠著猶大王亞瑪謝，伊是約哈斯的孫，約阿施的子，給伊帶到耶路撒冷，閣拆毀耶路撒冷的城牆，對以法蓮門到角門，約兩百公尺。
25:24 取上帝殿內俄別‧以東所顧守的金銀器具，及王宮的財寶，閣掠人做准當，就倒去撒瑪利亞。
25:24 約華施將王宮的財寶，及俄別‧以東的後代所顧守上帝聖殿的金、銀、器具攏提去，閣掠人做人質，才倒去撒馬利亞。
25:25 以色列王約哈斯的子約阿施死了後，猶大王約阿施的子亞瑪謝猶活十五年。
25:25 約哈斯的子以色列王約華施死了，約阿施的子猶大王亞瑪謝閣再活十五年。
25:26 亞瑪謝其餘的事，對頭到尾豈無攏記佇猶大及以色列諸個王的記錄嗎？
25:26 亞瑪謝其他的事蹟，對頭到尾攏記載佇《猶大及以色列列王史。》
25:27 對亞瑪謝偏離無隨耶和華了後，佇耶路撒冷有人結黨欲害伊，伊就走到拉吉；𪜶差人趇伊到拉吉，佇遐刣死伊。
25:27 對亞瑪謝偏離無隨上主了後，佇耶路撒冷有人計謀欲害伊，伊就逃走去拉吉。𪜶派人趇到拉吉，佇遐給伊刣死。
25:28 人就用馬載伊倒來，及伊的列祖埋葬佇猶大的城。
25:28 人用馬載伊的屍體倒來，將伊安葬佇猶大的城，列祖的墓地。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。