上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王亞哈謝
22:1 ( 王下 8:25-29 9:21-28 )
耶路撒冷徛起的百姓設立耶和蘭的煞尾子亞哈謝續接伊做王；因為隨亞拉伯人到營的軍隊有刣死伊許個大子。按呢，猶大王耶和蘭的子亞哈謝做王。
猶大王亞哈謝
22:1 ( 王下 8:25-29 9:21-28 )
耶路撒冷的住民設立約蘭的煞尾子亞哈謝續接伊作王；因為及阿拉伯人做夥來攻城的軍隊，將亞哈謝的兄哥攏刣死。按呢猶大王約蘭的子亞哈謝就作王。
22:2 亞哈謝坐位的時四十二歲，佇耶路撒冷做王一年。伊的老母名叫亞她利雅，是暗利的查某孫。
22:2 亞哈謝坐位的時二十二歲，佇耶路撒冷作王一年。伊的老母叫做亞她利雅，是以色列王暗利的查某孫。
22:3 伊也行亞哈的家的路；因為伊的老母指揮伊行歹。
22:3 伊嘛行亞哈家的路；因為伊的老母教伊做歹。
22:4 伊行耶和華所看做歹的事，親像亞哈的家一樣；因為伊的老父死了後有亞哈家的人來給伊指揮，致到敗壞。
22:4 伊親像亞哈家做上主看做歹的事；因為伊的老父死了後，亞哈家的人來教伊做歹致到伊滅亡。
22:5 伊聽趁𪜶的計謀，及以色列王亞哈的子耶和蘭相及去基列的拉末，及亞蘭王哈設交戰；亞蘭人拍傷耶和蘭。
22:5 伊接受𪜶的計策，及以色列王亞哈的子約何蘭做夥去基列的拉末，及敘利亞王哈薛交戰；敘利亞人拍傷約何蘭。
22:6 伊倒去耶斯列，欲醫治伊的傷就是伊佇拉末及亞蘭王哈設交戰的時所受著的，猶大王耶和蘭的子亞撒利雅落去耶斯列欲覓亞哈的子耶和蘭，因為伊有破病。
22:6 約何蘭倒去耶斯列，欲醫治伊佇拉末及敘利亞王哈薛交戰的時所受的傷。約蘭的子猶大王亞哈謝落去耶斯列，探訪亞哈的子約何蘭，因為伊破病。
22:7 亞哈謝來看約蘭就抵著陷害，這是出佇上帝的意思；因為伊來，就及耶和蘭出去抵著寧示的孫耶戶。就是耶和華所抹油、互伊剪除亞哈的家的。
22:7 亞哈謝來看約何蘭，煞抵著陷害，這是出佇上帝的意思。伊佇遐的時，及約何蘭出去，抵著寧示的孫耶戶；上主有選立耶戶，欲互伊消滅亞哈家。
22:8 耶戶辦亞哈家的罪的時，抵著猶大許個首領及亞哈謝兄弟的子啲服事亞哈謝的，伊就刣死𪜶。
22:8 耶戶啲執行上帝的審判，刑罰亞哈家的時，抵著猶大許個領袖，及亞哈謝兄哥的子 — 𪜶攏是啲侍候亞哈謝；耶戶將𪜶攏刣死。
22:9 亞哈謝匿佇撒瑪利亞、耶戶尋伊，人掠伊，帶伊到耶戶遐，刣死伊，人埋葬伊；因為𪜶講，伊是彼個專心尋耶和華的約沙法的子。按呢，亞哈謝的家無有權力通保守國位的。
22:9 亞哈謝匿佇撒馬利亞，耶戶派人去掠伊；人尋著伊，給伊帶去耶戶遐，將伊刣死。人給伊埋葬，因為𪜶講：「伊是彼個專心尋求上主的約沙法的孫。」按呢，亞哈謝的家無人有能力維持王權。
猶大國的女王亞他利雅
22:10 ( 王下 11:1-3 )
亞哈謝的老母亞她利雅看見伊的子已經死，就起來一盡剿滅猶大的王親。
亞她利雅篡位
22:10 ( 王下 11:1-3 )
亞哈謝的老母亞她利雅一下知伊的子受殺害，就起來剿滅猶大王室所有的後代。
22:11 總是王的查某子約示巴將亞哈謝的子約阿施對許個受刣的王子中偷抱出來，將伊及伊的奶母囥佇睏房裡。約示巴是耶和蘭王的查某子，亞哈謝的姊妹，祭司耶何耶大的某。伊對亞她利雅蓋密伊，互伊無刣死伊。
22:11 毋拘約蘭王的查某子約示芭，將亞哈謝的子約阿施，對許個受刣的王子中偷抱出來，將伊及伊的奶母藏佇聖殿的睏房，無互亞她利雅知，互約阿施免受殺害。約示芭是亞哈謝的小妹，祭司耶何耶大的某。
22:12 後來及𪜶相及囥佇上帝的殿歷過六年久；亞她利雅管理彼個地方。
22:12 亞她利雅治理猶大國的時，約阿施及伊的奶母做夥匿佇上帝的殿六年久。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。