上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
及以東交戰
20:1 此霎了後，摩押人及亞捫人，閣有米烏尼人，相及來欲及約沙法交戰。
及以東交戰
20:1 過無偌久，摩押人及亞捫人，閣有一寡米烏尼人，做夥來欲攻擊約沙法。
20:2 有人來報約沙法講：「對海外對亞蘭遐有大軍隊來攻擊你，今𪜶佇哈洗遜‧他瑪，就是隱‧基底。」
20:2 有人來報告約沙法講：「對海彼旁以東遐有大軍隊來攻擊。𪜶現在佇哈洗遜‧他瑪 (就是隱‧基底)。」
20:3 約沙法就驚，定著意思懇求耶和華，佇猶大全地宣佈禁食。
20:3 約沙法非常驚，決定欲懇求上主，宣布猶大全地禁食。
20:4 對按呢猶大人聚會，求耶和華幫助。猶大逐個城攏有人出來尋耶和華。
20:4 猶大人就聚集，求上主幫贊；猶大逐個城攏有人出來尋求上主。
20:5 約沙法就佇猶大及耶路撒冷的會中，徛佇耶和華殿的新院的頭前，講：
20:5 約沙法就佇猶大及耶路撒冷的大會中，徛佇上主聖殿新的埕的頭前，
20:6 「耶和華──阮的列祖的上帝啊，你豈是佇天裡的上帝嗎？你豈是列邦萬國的主宰嗎？佇你的手有權能有氣力，無一個會抵敵你。
20:6 祈禱講：「上主 — 阮列祖的上帝，你豈毋是佇天裡的上帝？你豈毋是萬邦萬國的主宰？佇你的手有權能有氣力，無一個會當對抗你。
20:7 阮的上帝啊，你豈是曾佇你的百姓以色列人的面前趕逐此個地方徛起的百姓，將伊賞賜你的朋友亞伯拉罕的後裔到永遠嗎？
20:7 阮的上帝，你曾佇你子民以色列人的面前趕出此個地的住民，將此個地永遠賜互你的朋友亞伯拉罕的後代。
20:8 𪜶就𫢶佇此個地方，閣因為你的名佇遮給你起一間聖所，講：
20:8 𪜶就住佇此個地，閣為著榮耀你的名佇遮起聖殿，講：
20:9 『設使有災禍臨到阮，或是刀劍譴責，或是瘟疫飢荒，當患難的時，阮欲徛佇此間的頭前佇你的面前懇求你，因為你的名是𫢶佇此間殿，你欲聽來拯救。』
20:9 『若有災禍臨到阮，無論是刀劍、責罰、瘟疫、飢荒，阮欲徛佇此間聖殿的頭前，佇你的面前為著阮的患難求叫你；你欲聽來解救，因為你臨在佇此間殿。』
20:10 前以色列人出埃及地的時，你准𪜶侵犯亞捫人、摩押人，及西珥山人，就離開𪜶，無滅𪜶。
20:10 「早前，阮的祖先出埃及地的時，你不准𪜶侵犯亞捫人、摩押人，及以東人的土地，阮的祖先就踅對別條路，無給𪜶消滅。
20:11 看啊，𪜶今怎樣報應阮，來趕逐阮出你的業，就是你賞賜阮互阮承接的。
20:11 現在，𪜶來欲趕逐阮離開你賞賜互阮做產業的土地；𪜶竟然按呢回報阮。
20:12 阮的上帝啊，你無欲責罰𪜶嗎？因為阮無力通抵當此個來攻擊阮的大軍隊，阮也知著怎樣行，阮的目睭專專向你」。
20:12 阮的上帝啊，你無欲責罰𪜶是無？阮無氣力通對抗諸個來攻擊阮的大軍隊，嘛毋知著按怎做，毋拘阮欲仰望你。」
20:13 猶大眾人及𪜶的細漢囝仔、𪜶的某、𪜶的子兒攏徛佇耶和華的面前。
20:13 猶大眾人，及𪜶的細漢囝仔、𪜶的某、𪜶的子兒，攏徛佇上主的面前。
20:14 彼時，耶和華的神佇公會中臨到雅哈悉，伊是利未人亞撒的後裔──瑪探雅的元孫，耶利的曾孫，比拿雅的孫，撒迦利雅的子。
20:14 彼時，上主的神佇大會中臨到雅哈悉；伊是利未人亞薩的後代，瑪他尼的元孫，耶利的曾孫，比拿雅的孫，撒迦利亞的子。
20:15 伊講：「猶大眾人、耶路撒冷徛起的百姓，及約沙法王你，攏著聽耶和華對恁按呢講：『莫得因為此個大軍隊來驚來愞；因為此個交戰是在佇恁，就是在佇上帝。
20:15 伊講：「猶大眾人、耶路撒冷的住民，及約沙法王，著注意聽！上主對恁按呢講：『毋免因為此個大軍隊驚惶失膽，因為戰爭的勝敗不在佇恁，是在佇上帝。
20:16 明仔日恁著落去接陣，𪜶對洗斯山坪上來，恁欲佇耶魯伊勒曠野頭前的山谷口抵著𪜶。
20:16 明仔載恁著落去迎戰；𪜶對洗斯山坪上來，恁會佇耶魯伊勒曠野頭前的山谷口抵著𪜶。
20:17 此擺恁免交戰，猶大及耶路撒冷啊，恁著排陣徛啲，看耶和華拯救恁。免驚，免愞。明仔日著出去𪜶遐，因為耶和華及恁佇啲。』」
20:17 猶大及耶路撒冷人，此遍恁毋免出手交戰；恁只有排陣徛啲，看上主按怎解救恁。毋免驚惶，毋免失膽！明仔載出去迎戰，上主會及恁同在。』」
20:18 約沙法就俯頭仆佇地裡，猶大眾人及耶路撒冷徛起的百姓也仆佇耶和華的面前，敬拜耶和華。
20:18 約沙法俯頭仆佇土腳；猶大眾人及耶路撒冷的住民嘛仆佇上主的面前，敬拜上主。
20:19 哥轄族及可拉族的利未人攏徛起來，用極大的聲謳咾耶和華以色列的上帝。
20:19 哥轄宗族及可拉宗族的利未人攏徛起來，用極大的聲稱讚上主 — 以色列的上帝。
20:20 隔日𪜶早早起來，出去提哥亞的曠野。出去的時，約沙法徛啲講：「猶大人及耶路撒冷徛起的百姓啊，著聽我：恁著信耶和華──恁的上帝就欲徛在；信伊的先知就欲亨通。」
20:20 隔日𪜶早早起來，出去提哥亞的曠野；出去的時，約沙法徛啲，講：「猶大人及耶路撒冷的住民，聽我講，恁著信上主 — 恁的上帝，就會徛在；信伊的先知就會得勝。」
20:21 伊已經及百姓議論，就設立唱歌謳咾耶和華的，互𪜶穿聖閣媠的衫，行佇軍隊的頭前謳咾耶和華講：「著感謝耶和華，因為伊的慈愛永遠佇啲！」
20:21 伊及人民參詳了後，就設立唱歌稱讚上主的人，互𪜶行佇軍隊的頭前稱讚聖潔尊貴的上主，講：「著感謝上主，因為伊的慈愛續到永遠。」
20:22 𪜶抵仔唱歌謳咾的時，耶和華就派埋伏的兵攻擊許個來攻擊猶大的亞捫、摩押，及西珥山的人，𪜶就受拍。
20:22 𪜶一下唱歌歡呼的時，上主派埋伏的兵攻擊許個來攻打猶大的亞捫、摩押，及以東人；諸個對敵就受拍敗。
20:23 因為亞捫及摩押人起來，攻擊𫢶佇西珥山的人，一盡刣來滅𪜶；一盡滅𫢶佇西珥的人了後，𪜶逐個分旁相剿滅。
20:23 亞捫及摩押人攻擊以東人，將𪜶全部剿滅；剿滅以東人了後，𪜶兩族閣互相殘殺。
20:24 猶大人到曠野守望的樓，看見許個大軍隊，看啊，身屍倒佇地裡，無一個走離。
20:24 猶大人到曠野的守望台，欲看許個大軍隊；一下看，看著身屍倒甲滿四界，無一個逃脫。
20:25 約沙法及伊的百姓來搶𪜶的財物，佇𪜶中間尋著多多財物、衣服、寶貝，𪜶剝做家己的多到帶𣍐去；𪜶搶物到三日，因為真多。
20:25 約沙法及伊的軍兵來抄戰利品，尋著真多牲生、財物、衣服、寶貝，多甲帶𣍐去。𪜶搶三日，因為物件真多。
20:26 第四日𪜶聚集佇比拉迦的山谷，因為佇遐謳咾耶和華。所以彼所在名叫比拉迦山谷，到佇今仔日。
20:26 第四日，𪜶聚集佇比拉迦的山谷；𪜶佇遐稱讚上主，所以彼所在叫做比拉迦山谷，到今仔日。
20:27 𪜶就倒去，就是猶大及耶路撒冷的人，約沙法佇𪜶的頭前，大家歡喜倒去耶路撒冷；因為耶和華及𪜶刣贏對敵，來歡喜快樂。
20:27 約沙法導猶大及耶路撒冷的人歡歡喜喜倒去耶路撒冷，因為上主互𪜶刣贏對敵。
20:28 𪜶彈琴、彈瑟、歕號頭來耶路撒冷，到耶和華的殿。
20:28 𪜶彈琴，彈瑟，歕喇叭，來到耶路撒冷，進入上主的聖殿。
20:29 列邦諸個國聽見耶和華刣贏以色列的對敵，就驚上帝。
20:29 周圍列國聽見上主刣贏以色列的對敵，就真驚上帝。
20:30 按呢，約沙法的國太平，因為伊的上帝賞賜伊四圍平安。
20:30 按呢約沙法的國太平，因為伊的上帝賜伊四境平安。
約沙法死
20:31 ( 王上 22:41-50 )
約沙法做猶大王，坐位的時三十五歲，佇耶路撒冷做王歷過二十五年。伊的老母名叫阿蘇巴，就是示利希的查某子。
約沙法統治結束
20:31 ( 王上 22:41-50 )
約沙法坐位的時三十五歲，佇耶路撒冷做猶大王二十五年；伊的老母叫做阿蘇芭，是示利希的查某子。
20:32 約沙法行伊的老父亞撒的路，無偏歪，行耶和華所看做好的事。
20:32 約沙法行伊老父亞撒的路，攏無偏離，做上主看做好的事。
20:33 總是山頭壇猶未廢無，閣百姓也未有定著心意歸向𪜶列祖的上帝。
20:33 毋拘山頭壇猶未廢除，人民嘛猶未堅心決意歸向𪜶列祖的上帝。
20:34 約沙法其餘的事，對頭到尾攏記佇哈拿尼的子耶戶的冊，彼個冊也列佇以色列列王的冊。
20:34 約沙法其他的事蹟，對頭到尾攏記載佇哈拿尼的子耶戶的冊；此本冊嘛收佇《以色列列王史》。
20:35 彼時了後，猶大王約沙法及以色列王亞哈謝結交；亞哈謝行歹到極。
20:35 後來，猶大王約沙法及作惡多端的以色列王亞哈謝結盟。
20:36 二個王相及造船欲去他施，就佇以旬‧迦別造船。
20:36 兩個王做夥佇以旬‧迦別造船欲去他施。
20:37 彼時瑪利沙人、多大瓦的子以利以謝用讖語攻擊約沙法講：「因為你結交亞哈謝，耶和華破壞你的所做。」對按呢船就破，𣍐會去他施。
20:37 彼時，瑪利沙人多大瓦的子以利以謝，講預言攻擊約沙法：「因為你及亞哈謝結盟，上主欲破壞你造的船。」船果然失事，𣍐當去他施。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。