上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
先知米該警告亞哈王
18:1 ( 王上 22:1-28 )
約沙法有多多貨財及榮光，就及亞哈結親。
先知米該雅警告亞哈
18:1 ( 王上 22:1-28 )
約沙法有真多財富閣真受尊敬；伊及以色列王亞哈結親。
18:2 過幾若年，伊落去撒瑪利亞見亞哈；亞哈為著伊及隨伊的百姓刣多多牛羊，勸伊及伊相及去基列的拉末。
18:2 過幾若年，伊落去撒馬利亞拜訪亞哈；亞哈為著伊及伊的跟隨，刣真多牛、羊，說服伊做夥去攻打基列的拉末。
18:3 以色列王亞哈給猶大王約沙法講：「你欲及我去基列的拉末抑？」應講：「我親像你，我的百姓親像你的百姓，阮欲及你去交戰。」
18:3 以色列王亞哈對猶大王約沙法講：「你欲及我做夥去攻打基列的拉末無？」
約沙法應講：「我的就是你的，我的人民就是你的人民，阮欲及你做夥去交戰。」
18:4 約沙法給以色列王講：「請你代先問耶和華的意思。」
18:4 約沙法閣對以色列王講：「請你先問上主的意思。」
18:5 以色列王就聚集先知四百人，問𪜶講：「阮著上去基列的拉末來交戰，抑是著息啊？」𪜶應講：「通上去，因為上帝欲用𪜶交佇王的手。」
18:5 以色列王就召集先知四百人，問𪜶講：「阮通去攻打基列的拉末，抑是毋通？」
𪜶應講：「通去攻打；上帝欲將此個城交佇王的手。」
18:6 約沙法講：「佇遮豈無猶有耶和華的先知，互咱通對伊來問嗎？」
18:6 約沙法講：「遮豈無閣有上主的先知互咱通問？」
18:7 以色列王給約沙法講：「猶有一人，咱通對伊來問耶和華。總是我怨恨伊；因為伊所讖語我的，無一項好，只有常常講災禍若定。此人是音拉的子米該雅。」約沙法講：「請王莫得按呢講。」
18:7 以色列王給約沙法講：「猶有一個人，是音拉的子米該雅，咱通對伊請問上主；毋拘我怨恨伊，因為伊對我講的預言無一項好，常常只有講災禍。」
約沙法講：「請王毋通按呢講。」
18:8 以色列王就召一個官員來，講：「你去叫音拉的子米該雅緊緊來。」
18:8 以色列王就召一個官員來，講：「你趕緊去叫音拉的子米該雅來。」
18:9 以色列王及猶大王約沙法逐個坐伊的座位，穿禮服坐佇撒瑪利亞城門口闊的所在，眾先知逐個佇𪜶的面前讖語。
18:9 以色列王及猶大王約沙法佇撒馬利亞城門口的五穀場，穿禮服，坐佇𪜶的寶座；所有的先知攏佇𪜶的面前講預言。
18:10 基拿拿的子西底家做鐵角，講：「耶和華按呢講：『你欲用諸個觸亞蘭人，到𪜶滅無。』」
18:10 基拿拿的子西底家做鐵的角，講：「上主按呢講：『你欲用諸個鐵角觸敘利亞人，觸甲𪜶攏消滅。』」
18:11 眾先知攏按呢讖語講：「通上去基列的拉末，欲得勝，因為耶和華欲將伊交佇王的手。」
18:11 所有的先知攏按呢預言講：「通去攻打基列的拉末，一定得勝，上主欲將此個城交佇王的手。」
18:12 彼個去叫米該雅的使者給伊講：「看啊，眾先知攏講一樣話對王講好事，求你所講的及𪜶相同，平平講好話。」
18:12 彼個去叫米該雅的使者給伊講：「你看，所有的先知攏對王講好話。請你嘛及𪜶像款講好話。」
18:13 米該雅講：「我指永活的耶和華咒誓來講，我的上帝講甚麼，我欲講伊。」
18:13 米該雅講：「我指永活的上主咒誓，我的上帝講什麼，我就對王講什麼。」
18:14 米該雅到王的面前，王問伊講：「米該雅啊，阮著上去基列的拉末來交戰，抑是著息啊？」伊應講：「通上去，欲得勝，因為𪜶欲受交付佇恁的手」。
18:14 米該雅來到王的面前，王問伊講：「米該雅，阮通去攻打基列的拉末，抑是毋通？」
伊應講：「好啊，做你去攻打，一定會勝利；此個城會交佇恁的手。」
18:15 王對伊講：「我著幾擺教你咒誓，你託耶和華的名只有著用真實給我講。」
18:15 王對伊講：「我著叫你咒誓幾遍，你才會奉上主的名對我講實在話？」
18:16 米該雅講：「我看見以色列眾百姓四散佇山裡，親像無牧者的羊一般。耶和華按呢講：『諸個無主人，𪜶逐個通平安倒去𪜶的家。』」
18:16 米該雅講：「我看見以色列眾人親像無牧者的羊四散佇山裡；上主按呢講：『諸個人無主人；逐個人通平安倒去𪜶兜。』」
18:17 以色列王給約沙法講：「我豈無給你講，此人所欲讖語我的，無講好話，只有災禍若定？」
18:17 以色列王對約沙法講：「我豈無給你講，此個人對我講的預言攏無好話，只有講災禍。」
18:18 米該雅講：「所以恁著聽耶和華的話。我看見耶和華坐佇寶座，天頂的萬軍徛佇伊的左右。
18:18 米該雅繼續講：「所以，著聽上主的話！我看見上主坐佇寶座，天頂的萬軍徛佇伊的正旁倒旁。
18:19 耶和華講：『是誰欲引誘以色列王亞哈互伊上去基列的拉末死佇遐啊？』此個講按呢，彼個講按呢。
18:19 上主講：『什麼人欲引誘以色列王亞哈，互伊去基列的拉末，死佇遐？』此個講按呢，彼個講按呢。
18:20 後來，有一個神出來，徛佇耶和華的面前講：『我欲引誘伊。』耶和華問伊講：『你欲用甚麼法度？』
18:20 後來有一個神出來，徛佇上主的面前，講：『我去給伊引誘。』上主問伊講：『你欲按怎給引誘？』
18:21 伊講：『我欲出去做白賊的神，佇伊眾先知的嘴。』耶和華講：『你欲引誘伊，也欲成伊！出去來做按呢！』
18:21 伊應講：『我欲出去做白賊的神，互許個先知講白賊。』上主講：『你給伊引誘，一定會成功。你去，照按呢做。』
18:22 今耶和華用白賊的神入佇你諸個先知的嘴，耶和華論到你有講災禍。」
18:22 現在上主有互白賊的神入佇你諸個先知的嘴；上主宣布欲降災禍互你。」
18:23 基拿拿的子西底家進前搧米該雅的嘴䩃，講：「耶和華的神對叨落一條路離開我來及你講啊？」
18:23 基拿拿的子西底家行進前，搧米該雅的嘴䩃，講：「上主的神什麼時離開我來對你講話？」
18:24 米該雅講：「看啊，你入內房家己匿，彼日就欲看見。」
18:24 米該雅講：「你去匿佇密房彼日就會知。」
18:25 以色列王講：「著帶米該雅去，交城首亞們及王的子約阿施，講：
18:25 以色列王講：「將米該雅掠起來，交互市長亞們及王的子約阿施，
18:26 『王按呢講：用此人關佇監裡，用艱苦的餅，艱苦的水互伊食，聽候我平安倒來。』」
18:26 給𪜶講：『王交代：將此個人關落監，互伊一屑仔餅及水就好，聽候我平安倒來。』」
18:27 米該雅講：「你若真正平安倒來，就是耶和華無託我講」；閣講：「諸個百姓啊，恁攏著聽！」
18:27 米該雅講：「你若真正平安倒來，就是上主無託我講話。」閣講：「恁大家，著會記得我講的話！」
亞哈死
18:28 ( 王上 22:29-35 )
以色列王及猶大王約沙法上去基列的拉末。
亞哈戰死
18:28 ( 王上 22:29-35 )
以色列王亞哈及猶大王約沙法去進攻基列的拉末。
18:29 以色列王給約沙法講：「我欲改裝上陣，你通穿王服。」以色列王就改裝，𪜶就上陣。
18:29 以色列王對約沙法講：「我欲改裝上戰場，你通穿你的王服。」以色列王就改裝，𪜶就上陣。
18:30 亞蘭王有吩咐伊的戰車的官長講：「無論大細，通及𪜶交戰，只有及以色列王交戰。」
18:30 敘利亞王有吩咐伊的戰車長講：「毋通及𪜶的士兵抑是官長交戰，只有及以色列王交戰。」
18:31 戰車的官長看見約沙法就講，這是以色列王，就越過去欲及伊交戰。約沙法就哮救，耶和華就幫助伊，上帝也感動𪜶離開伊。
18:31 戰車長看著約沙法就講：「此個一定是以色列王！」𪜶就斡去欲攻擊伊。約沙法一下喝救命，上主就幫贊伊。上帝互𪜶離開無閣趇伊。
18:32 戰車的官長看見是以色列王，就越轉無追伊。
18:32 戰車長一下看著伊毋是以色列王，就越走無閣追伊。
18:33 有一人偶然開弓，射入以色列王戰甲的合鑆。王給趕車者講：「你越轉手，帶我出陣，因為我著重傷啦！」
18:33 有一個敘利亞的兵仔開弓，無拍算射入以色列王戰甲的敆綴。王給駛車的講：「我著重傷。緊踅翻頭，帶我離開戰場。」
18:34 彼日交戰的勢面愈猛烈，以色列王勉強徛佇車裡抵當亞蘭人，到下昏。差不多日落的時，就死。
18:34 彼日，交戰非常猛烈。有人扶以色列王，互伊徛佇車裡，面向敘利亞人；到下昏，差不多日落的時，伊就死。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。