上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大國的王約沙法
17:1 亞撒的子約沙法續接伊做王，家己強盛，抵敵以色列。
猶大王約沙法
17:1 約沙法續接伊的老父亞撒做猶大王，奮發自強，對抗以色列。
17:2 安置軍兵佇猶大許個堅固的城，閣設防守的兵佇猶大地及伊的老父亞撒所取以法蓮許個城。
17:2 伊派軍隊駐在佇猶大許個堅固的城，閣佇猶大地，及伊的老父亞撒所攻取以法蓮許個城派兵防守。
17:3 耶和華及約沙法佇啲；因為伊行伊的祖大衛起頭行的路，無尋許個巴力，
17:3 上主及約沙法同在，因為伊照伊的老父初期的所做去做，無拜巴力；
17:4 獨獨尋伊的老父的上帝，行伊的誡命，無照以色列人的所行。
17:4 只有服事伊的老父的上帝，遵行伊的誡命，無照以色列諸王的所做去做。
17:5 所以耶和華堅固伊的國位，猶大眾人獻禮物互約沙法；伊就有多多貨財及榮光。
17:5 所以上主堅固約沙法的統治；猶大人民獻禮物互伊。伊就有真多財富閣真受人尊敬。
17:6 伊奮志行耶和華的道路，閣對猶大除去許個山頭壇，及許個亞舍拉。
17:6 伊勇敢行上主的道路；閣對猶大廢除山頭壇及亞舍拉女神的柱像。
17:7 伊做王第三年，就差伊的人臣便‧亥伊勒、俄巴底、撒迦利雅、拿坦業、米該亞去猶大逐個城教示百姓。
17:7 伊作王第三年派伊的人臣便‧亥伊勒、俄巴底亞、撒迦利亞、拿坦業、米該亞，去猶大逐個城教導人民。
17:8 及𪜶去的有利未人示瑪雅、尼探雅、西巴第雅、亞撒黑、示米拉末、約拿單、亞多尼雅、多比雅、駝‧巴多尼雅，閣有祭司以利沙瑪、約蘭也及𪜶去。
17:8 及𪜶做夥去的有利未人示瑪雅、尼探雅、西巴第雅、亞撒黑、示米拉末、約拿單、亞多尼雅、多比雅、駝‧巴多尼雅，以及祭司以利沙瑪及約蘭。
17:9 𪜶佇猶大教示有帶耶和華律法的冊，遍行猶大逐個城教示百姓。
17:9 𪜶帶上主律法的冊，行透猶大所有的城，教示人民。
約沙法的功績
17:10 耶和華互猶大四圍逐邦國真驚，敢及約沙法交戰。
約沙法的軍力
17:10 猶大周圍列國攏真驚上主，毋敢及約沙法交戰。
17:11 非利士人有的送禮物進貢銀互約沙法。亞拉伯人也帶歸群精牲互伊，就是綿羊牨七千七百隻，山羊牨七千七百隻。
17:11 非利士人有的進貢銀互約沙法；阿拉伯人閣送綿羊及山羊各七千七百隻。
17:12 約沙法漸漸強大到極，佇猶大起營寨及府庫的城。
17:12 約沙法愈來愈強盛，佇猶大起要塞及囤積的城。
17:13 伊佇猶大諸個城有多多工作，閣佇耶路撒冷有戰士，就是大權能的勇士。
17:13 伊佇猶大的城有做真多工程；閣佇耶路撒冷有勇猛的戰士。
17:14 𪜶的數額，照宗族，記佇下面：猶大族的千總押拿做統領，導大權能的勇士──三十萬；
17:14 𪜶的數目，照宗族記佇下面：猶大支族第一個指揮官是押拿，導勇猛的戰士三十萬；
17:15 閣落來是統領約哈難導二十八萬勇士；
17:15 第二個是約哈難，導二十八萬；
17:16 閣落來是細基利的子亞瑪斯雅（伊甘願獻家己互耶和華）導大權能的勇士──二十萬。
17:16 第三個是細基利的子亞瑪斯雅，伊甘願奉獻家己互上主，導二十萬勇猛的戰士。
17:17 便雅憫族有大權能的勇士以利雅大，導攑弓箭及捾屏牌者──二十萬；
17:17 便雅憫支族的勇猛戰士以利雅大，導攑弓箭及盾牌的戰士二十萬；
17:18 閣落來是約薩拔導備辦交戰者──十八萬。
17:18 第二個是約薩拔，導武裝戰士十八萬。
17:19 諸個攏是伺候王的，另外有王所安置佇猶大逐個堅固的城的。
17:19 諸個攏啲侍候王；另外猶有王派駐佇猶大堅固的城的軍隊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。