上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
亞撒的改革
15:1 上帝的神臨到俄德的子亞撒利雅。
亞撒的改革
15:1 上帝的神臨到俄德的子亞撒利雅。
15:2 伊出去迎接亞撒，給伊講：「亞撒及猶大、便雅憫的眾人啊，著聽我的話：恁及耶和華佇啲，伊也及恁佇啲；恁若尋伊，伊欲互恁尋著；總是恁若棄拺伊，伊也欲棄拺恁。
15:2 伊就去見亞撒，對伊講：「亞撒及猶大、便雅憫的人民，請聽我講。恁若順趁上主，伊就及恁同在；恁若尋求伊，伊會互恁尋著；毋拘恁若棄拺伊，伊嘛會棄拺恁。
15:3 以色列人久久無真的上帝，無教示𪜶的祭司，也無律法；
15:3 以色列人已經真久無信真神，無教導的祭司，無律法，
15:4 總是𪜶佇患難的時歸向耶和華──以色列的上帝，來尋伊，伊就互伊尋著。
15:4 毋拘𪜶佇患難的時歸向尋求上主 — 以色列的上帝，伊就互𪜶尋著。
15:5 彼時，出入的人𣍐得著平安，列國徛起的百姓攏抵著大擾亂；
15:5 彼時，列國的住民抵著大擾亂，人出入無平安。
15:6 國攻擊國，城攻擊城，攏相毀壞，因為上帝用逐樣患難擾亂𪜶。
15:6 國攻擊國，城攻擊城，上帝用逐款災難擾亂𪜶。
15:7 今恁著勇健，手通軟落去，因為恁的所做欲得著報賞。」
15:7 今恁著堅強，毋通失膽，因為恁的所做會得著報賞。」
15:8 亞撒已經聽見諸個話及先知俄德的讖語，就壯膽，佇猶大便雅憫全地，及伊所取以法蓮山地許個城，除去攏總可惡的物，閣佇耶和華兩廊前新起耶和華的壇；
15:8 亞撒聽著諸個話，及俄德的子亞撒利雅的預言，就堅強起來，佇猶大及便雅憫全地，以及伊所攻取以法蓮山區許個城，廢除所有可惡的偶像，閣修建聖殿走廊頭前上主的祭壇。
15:9 閣聚集猶大、便雅憫的眾人，及以法蓮、瑪拿西、西緬出外佇𪜶中間的人。因為對以色列出來歸亞撒的真多，是為著𪜶看見耶和華──伊的上帝及伊佇啲。
15:9 伊閣聚集猶大人、便雅憫人，以及寄居佇𪜶中間的以法蓮人、瑪拿西人，及西緬人；有真多以色列人出來歸順亞撒，因為𪜶看見上主 — 伊的上帝及伊同在。
15:10 亞撒王十五年三月，𪜶攏聚集佇耶路撒冷。
15:10 亞撒王第十五年三月，𪜶攏聚集佇耶路撒冷。
15:11 彼日𪜶佇所帶來許個搶的物的中間，用牛七百隻、羊七千隻獻互耶和華。
15:11 彼日，𪜶對帶來的戰利品中間，奉獻七百隻牛及七千隻羊做祭互上主。
15:12 𪜶就立約，欲盡心盡性尋耶和華──𪜶列祖的上帝。
15:12 𪜶立約，欲全心全意尋求上主 — 𪜶列祖的上帝；
15:13 見若無尋耶和華──以色列的上帝的，無論大細、男女，著互伊死。
15:13 所有無尋求上主 — 以色列的上帝的人，無論男女大細，攏著處死。
15:14 𪜶就用大聲用歡喜來喝，用號頭用哨角，來對耶和華咒誓。
15:14 𪜶就大聲歡呼，歕哨角及喇叭，對上主咒誓。
15:15 猶大眾人為著所咒的誓歡喜；因為𪜶盡心咒誓，閣盡意尋耶和華，耶和華也互𪜶尋著，就佇𪜶四境賞賜𪜶平安。
15:15 猶大人民攏真歡喜，因為𪜶全心對上主咒誓，閣全意尋求上主，上主就互𪜶尋著，賞賜𪜶四境平安。
15:16 亞撒王貶伊的媽瑪迦太后的位，因為伊為亞舍拉曾裝可惡的像。亞撒剉伊的像，搥伊到碎碎，燒伊佇汲倫溪邊。
15:16 亞撒王廢除伊的阿嬤瑪迦太后的位，因為瑪迦有造亞舍拉可惡的神像。亞撒將神像剉掉，破互碎碎，佇汲淪溪谷放火燒。
15:17 獨獨許個山頭壇猶未對以色列中除去，總是亞撒的心一世人專一。
15:17 雖然許個山頭壇猶未對以色列中除去，毋拘亞撒一生完全順服上主。
15:18 亞撒將伊的老父所分別做聖、及伊本身所分別做聖的金銀及器具攏帶入上帝的殿。
15:18 伊將伊的老父及伊本身分別作聖的金、銀，及器具，攏帶入上帝的聖殿。
15:19 對此時到亞撒三十五年無閣有交戰的事。
15:19 對彼時到亞撒作王第三十五年，攏無閣有戰爭。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。