上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
聖殿奉獻
7:1 ( 王上 8:62-66 )
所羅門祈禱明白，就有火對天落來，一盡燒燒祭及別號的祭。耶和華的榮光充滿殿；
奉獻聖殿
7:1 ( 王上 8:62-66 )
所羅門祈禱煞，就有火對天降落，將燒化祭及所有的祭物攏燒盡；上主的榮光充滿聖殿。
7:2 因為耶和華的榮光充滿耶和華的殿，所以祭司𣍐會入耶和華的殿。
7:2 因為上主的榮光充滿上主的殿，所以祭司𣍐當入去。
7:3 彼個火降落、閣耶和華的榮光佇殿裡的時，以色列眾人看見，就佇舖石的所在仆落地敬拜，感謝耶和華講：
因為伊是好，
伊的慈惠永永佇啲！
7:3 以色列眾人看著火降落，閣上主的榮光罩佇聖殿頂面，就佇鋪石的所在仆落去敬拜，感謝上主，講：
上主至善，
伊的慈愛續到永遠。
7:4 王及眾百姓佇耶和華的面前獻祭。
7:4 王及全體人民佇上主的面前獻祭。
7:5 所羅門王用牛二萬二千隻，羊十二萬隻獻祭。按呢，王及眾百姓為著上帝的殿行獻殿的禮。
7:5 所羅門王獻牛兩萬兩千隻，羊十二萬隻做祭；按呢，王及全體人民為著上帝的殿舉行奉獻禮。
7:6 祭司照伊的職啲徛；利未人也提耶和華的樂器，就是前大衛用利未人謳咾的時，大衛王刁持造來感謝耶和華的。（因為伊的慈惠永永佇啲！）祭司佇𪜶的面前歕哨角，以色列人攏徛啲。
7:6 祭司照𪜶家己的職務徛啲侍奉；利未人提以前大闢王所造的樂器，唱大闢所作的詩，稱讚上主講：「伊的慈愛續到永遠。」祭司佇利未人的對面歕喇叭；所有的以色列人攏徛啲。
7:7 所羅門也分別耶和華殿前院中做聖，佇遐獻燒祭及謝恩祭的油，因為所羅門所曾造的銅壇無夠額容允許個燒祭、素祭及油膋。
7:7 所羅門因為伊所造的銅壇傷細，無夠通佇遐獻燒化祭、素祭，及平安祭的油，就將上主殿前的埕中央的所在分別作聖，佇遐獻燒化祭，及平安祭的油。
7:8 彼時所羅門守節期七日，以色列眾人對哈馬的路口到埃及的溪，攏來及伊守成做大的會。
7:8 彼時，所羅門及以色列人民做夥守節七日；以色列人民對哈馬隘口到埃及的溪谷來參加，成做盛況的大會。
7:9 到第八日𪜶設嚴肅會，因為𪜶守獻壇的禮七日，閣守節七日。
7:9 到第八日𪜶舉行嚴肅會；𪜶守祭壇的奉獻禮七日，閣守節七日。
7:10 七月二十三日，王差百姓倒去𪜶的布棚；逐個歡喜心快樂，是因為耶和華所施出互大衛、所羅門及伊的百姓以色列的恩惠。
7:10 七月二十三日，王給人民解散，互𪜶倒去𪜶兜。人民因為上主對大闢、所羅門，及伊的子民以色列所賞賜的恩惠，心內歡喜快樂。
上帝閣向所羅門顯現
7:11 ( 王上 9:1-9 )
對按呢所羅門起耶和華的殿及王宮完工；佇耶和華的殿及王宮見所羅門心內所愛做的，攏做到成功。
上帝閣對所羅門顯現
7:11 ( 王上 9:1-9 )
所羅門完成上主聖殿及王宮的工程；伊順利完成心內所計劃一切的建築。
7:12 暝時耶和華出現佇所羅門，給伊講：「我已經聽你的祈禱，也揀此所在做獻祭我的殿。
7:12 暝時上主對所羅門顯現，對伊講：「我有聽著你的祈禱，嘛揀此所在做向我獻祭的聖殿。
7:13 我若關密天致到無落雨，抑是命令草蜢食伊的土產，抑是互瘟疫流行佇我的百姓中，
7:13 我若給天關密無落雨，抑是命令草蜢食農作物，抑是降瘟疫佇我子民的中間，
7:14 我的百姓用我的名來稱的，若家己謙卑、祈禱，求見我的面，越轉離開𪜶的歹路，我欲對天聽𪜶，赦免𪜶的罪，醫治𪜶的地。
7:14 我的子民若謙卑，祈禱，悔改，離開𪜶的歹行為，我就欲對天頂聽𪜶的祈禱，赦免𪜶的罪，互土地閣再生產。
7:15 我欲目睭看、耳孔聽佇此所在所獻的祈禱。
7:15 我的目睭欲看，耳孔欲聽佇此所在所獻的祈禱。
7:16 因為我今已經揀此間殿，分別伊做聖，互我的名永遠佇遐，我的目睭、我的心也欲久長佇遐。
7:16 現在我已經揀此個殿，給伊分別作聖，做我永遠臨在的所在；我的目睭，我的心嘛欲永遠佇遮。
7:17 論到你若行佇我的面前親像你的老父大衛所行的，遵趁我一切所命令你的，執守我的律例我的法度，
7:17 你佇我面前的行做，若親像你的老父大闢，遵趁我的誡命，執守我的規例及命令，
7:18 我就欲堅固你的國位，親像我及你的老父大衛所立的約，講：『你的後裔欲管理以色列永無斷。』
7:18 我就欲堅固你的王位，照我及你的老父大闢所立的約，講：『你的後代會永遠統治以色列。』
7:19 「恁若越轉來棄拺我的律例我的誡命，就是我下佇恁的面前的，去服事別個上帝來敬拜伊，
7:19 「恁若越走，棄拺我頒布互恁的規例及誡命，去服事敬拜別個神明，
7:20 我就欲對我賞賜𪜶的地拔𪜶的根，閣我為家己的名所分別做聖此間殿也欲對我的面前棄拺伊，互伊佇萬國中做話柄，受譏刺。
7:20 我就欲將以色列人對我賞賜𪜶的地給𪜶拔出來，嘛欲棄拺此間分別作聖用來敬拜我的殿，互伊佇萬國中做笑談，受人恥笑。
7:21 此間殿雖然真高，將來經過的人欲卬愕講：『耶和華啥事按呢款待此個地此間殿啊？』
7:21 「此間聖殿雖然受人尊崇，到彼時，經過的人會著驚，講：『上主哪會按呢對待此個地及此間殿？』
7:22 就欲應講：『是因為𪜶棄拺耶和華──𪜶列祖的上帝，就是導𪜶出埃及地的，去結聯別個上帝，服事敬拜𪜶，所以耶和華互這一切的災禍臨到𪜶。』」
7:22 有人會應講：『是因為𪜶棄拺導𪜶出埃及地的上主 — 𪜶列祖的上帝，去信奉別個神明，敬拜服事𪜶，所以上主互諸個一切的災禍臨到𪜶。』」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。