上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
所羅門向百姓宣告
6:1 ( 王上 8:12-21 )
彼時，所羅門講：
耶和華曾講伊欲𫢶佇黑黑暗暗的中間。
所羅門對人民講話
6:1 ( 王上 8:12-21 )
彼時所羅門講：
「上主曾講，
伊欲𫢶佇密雲的所在。
6:2 總是我已經起一間殿互你徛起，
做你永遠住的所在。
6:2 我已經起一間堂皇的殿，
做你永遠徛起的所在。」
6:3 王越轉伊的面祝福以色列的會眾，以色列會眾攏徛起來。
6:3 以色列會眾攏徛啲，所羅門王越過來給𪜶祝福。
6:4 伊講：「耶和華──以色列的上帝是應該謳咾者！因為伊親嘴對我的父大衛所應允的，親手應驗伊。
6:4 伊講：「上主 — 以色列的上帝應該得著謳咾！伊親嘴對我的老父大闢應允的，攏親手實現。
6:5 講：『對我導我的百姓出埃及地以來，我未曾佇以色列眾支派中揀一個城來起殿互我的名𫢶佇遐，也未曾揀人做我的百姓以色列的仁君；
6:5 上主有講：『對我導我的子民出埃及以來，我毋曾佇以色列眾支族中間揀一個城為我的名起聖殿，嘛毋曾選立人做我的子民以色列的領袖；
6:6 獨獨揀耶路撒冷互我的名𫢶佇遐，閣揀大衛治理我的百姓以色列。』
6:6 毋拘我有揀耶路撒冷做我欲臨在的所在，閣揀大闢治理我的子民以色列。』
6:7 「我的父大衛心內有意思欲為耶和華──以色列的上帝的名起殿，
6:7 我的老父大闢心內有意思欲為上主 — 以色列的上帝的名起聖殿。
6:8 總是耶和華對我的父大衛講：『你的心有意思欲為我的名起殿，你此個意思真好；
6:8 總是上主對我的老父大闢講：『你有意思欲為我的名起聖殿，你此個心意真好；
6:9 獨獨你通起殿，你所親生的子欲為我的名起殿。』
6:9 毋拘你毋通起，你親生的子會為我的名起聖殿。』
6:10 「今耶和華應驗伊所講的話，我照耶和華的話起來續接我的父大衛坐以色列的國位，閣為耶和華──以色列上帝的名起殿。
6:10 「今上主實現伊所講的話；我照上主的話起來續接我的老父大闢坐以色列的王位，閣為上主 — 以色列上帝的名起聖殿。
6:11 我安置約櫃佇遐，櫃內有耶和華的約，就是伊及以色列人所立的約。」
6:11 我將約櫃安置佇遐；櫃內有上主及以色列人所立的約。」
所羅門的祈禱
6:12 ( 王上 8:22-53 )
王當以色列會眾的面前，徛佇耶和華的壇前，攑起手，（
所羅門的祈禱
6:12 ( 王上 8:22-53 詩 132:8-9 )
所羅門當以色列會眾的面前，徛佇上主的祭壇前，雙手攑起來。
6:13 因為所羅門曾造一個銅台，長五肘，闊五肘，高三肘，下佇院中），就徛佇台頂，當以色列會眾的面前跪落去，攑起手向天，
6:13 所羅門有造一個銅台，長兩公尺二十公分，闊兩公尺二十公分，高一公尺三十公分，下佇埕的中央；伊徛佇台頂，佇以色列會眾面前跪落去，攑雙手向天，
6:14 講：「耶和華──以色列的上帝啊，佇天裡佇地裡無有上帝親像你！守約行慈愛佇你許個奴僕，就是盡心行佇你的面前者；
6:14 講：「上主 — 以色列的上帝，天頂地下無一個神明親像你；你對許個一心一意順服你的僕人守約施慈愛。
6:15 你對你的奴僕──我的父大衛所應允的你有守伊。你親嘴講的，親手應驗伊，照今仔日的款。
6:15 你有執守對你的僕人我的老父大闢的應允；你親嘴應允的，今仔日攏親手實現。
6:16 耶和華──以色列的上帝啊，你所應允你的奴僕──我的父大衛講：『你的子孫若謹慎𪜶的所做，行我的律法，親像你行佇我的面前，就屬佇你的欲佇我的面前坐以色列的國位永無斷。』今求你應驗伊。
6:16 上主 — 以色列的上帝，求你實現對你的僕人我的老父大闢的應允；你有講：『你的子孫若親像你佇我的面前謹慎生活，遵行我的律法，你的後代就會永遠坐以色列的王位。』
6:17 耶和華──以色列的上帝啊，你對你的奴僕大衛所講的，求你互伊成做實事。
6:17 上主 — 以色列的上帝，你對你的僕人大闢所講的，求你實現。
6:18 「上帝豈真正欲及世間人徛起地上嗎？看啊，天及諸個天的天尚且無夠額互你徛起，何況我所起此間殿啊？
6:18 「上帝啊，你豈真正欲及世間人住佇地上？天及天頂的天都無夠通互你住，何況我所起此間聖殿？
6:19 耶和華──我的上帝啊，願你俯落數念你的奴僕的祈禱懇求，來聽你的奴僕所祈禱佇你的面前的求叫祈禱。
6:19 上主 — 我的上帝，求你俯落聽你的僕人的祈禱懇求，聽你的僕人佇你面前的求叫祈禱。
6:20 願你日暝看顧此個殿，就是你所講起欲安置你的名佇遐的所在；來聽你的奴僕所欲向此所在祈禱的祈禱。
6:20 願你暝日看顧此個聖殿，就是你講你欲臨在的所在。你的僕人向此個所在祈禱的時，求你聽。
6:21 你的奴僕及你的百姓以色列向此所在祈禱的時，願你聽𪜶的祈求，願你對天你徛起的所在來聽𪜶，你聽見的時就赦免。
6:21 你的僕人及你的子民以色列向此所在祈禱的時，願你對天頂，你住的所在，聽阮的祈求，赦免阮。
6:22 「人若得罪伊的厝邊，也有人用一個咒誓教伊咒誓，伊若來此間殿，佇你的壇前咒誓，
6:22 「人若得罪厝邊，受迫著咒誓，伊來此間殿佇你的壇前咒誓伊是無辜的，
6:23 求你對天聽來辦理伊，審判你諸個奴僕，定歹人的罪，照伊所行的報應佇伊的頭殼；定義人做義，照伊的義來互伊。
6:23 求你對天頂俯落聽來辦理，審判你諸個僕人：歹人，照伊的歹給伊報應；無辜的，定伊做無罪，照伊的正直給伊報賞。
6:24 「設使你的百姓以色列因為得罪你，才刣輸佇對敵的面前，𪜶若歸向你認你的名，閣佇此間殿祈禱懇求你，
6:24 「你的子民以色列若得罪你，互對敵拍敗，𪜶若反悔歸向你，宣認你的名，閣佇此間聖殿對你祈禱懇求，
6:25 求你對天聽𪜶，來赦免你的百姓以色列的罪，互𪜶倒來你所賞賜𪜶，及𪜶列祖的地。
6:25 求你對天頂俯落聽，赦免你的子民以色列的罪，互𪜶倒來你所賞賜𪜶及𪜶列祖的地。
6:26 「設使𪜶得罪你，致到天關密無落雨，你刑罰𪜶的時，𪜶若向此所在祈禱，認你的名，離開𪜶的罪，
6:26 「𪜶若得罪你，你給天關密無落雨；你刑罰𪜶的時，𪜶若向此所在祈禱，宣認你的名，離開𪜶的罪惡，
6:27 求你佇天裡聽𪜶，赦免你的奴僕及你的百姓以色列的罪，佇你教示𪜶所著行的好路的時，閣落雨佇你的地，就是你賞賜你的百姓做業的。
6:27 求你對天頂俯落聽𪜶的祈禱，赦免你的僕人及你的子民以色列的罪，教示𪜶行正直的路，閣落雨佇你賞賜𪜶做產業的地。
6:28 「此個地若有飢荒、瘟疫、枯焦、朽爛、草蜢、剪蟲，抑是𪜶許個對敵，佇𪜶許個城的地圍困𪜶，無論有甚麼災禍甚麼破病，
6:28 「此個地若有飢荒、瘟疫、火燒風、病害、草蜢、草蜢公，抑是對敵圍困𪜶的城，無論有什麼災禍，什麼大病，
6:29 或是一人，或是你的百姓以色列的眾人，逐個知家己心內的災禍憂悶，向此間殿攑起手，無論怎樣懇求，怎樣祈禱，
6:29 你的子民以色列中若有人知家己的災禍苦痛，向此個聖殿攑手迫切懇求，
6:30 願你對天裡你所徛起的所在來聽伊，來赦免伊。你知𪜶的心，照𪜶逐人的行做來款待𪜶（因為世間人的心只有你知若定），
6:30 求你對天頂，你徛起的所在，俯落聽來赦免𪜶；因為你知𪜶的心，嘛只有你知世間人的心，願你照𪜶逐個人的行做對待𪜶，
6:31 互𪜶佇你賞賜阮列祖的地一世人敬畏你，行你的道路。
6:31 互𪜶佇你賞賜阮列祖的地，一世人敬畏你，行你的道路。
6:32 「論到外邦人是屬你的百姓以色列的，為著你的大名大權能的手，伸出的手骨，對遠遠的所在來，𪜶若來向此間殿祈禱，
6:32 「若有外國人，毋是屬你的子民以色列的，因為聽著你的大名、大權能的作為，及你救助的手骨，對真遠的所在來，向此個殿祈禱，
6:33 願你對天你徛起的所在來聽𪜶，照外邦人一切所對你求的來行，互天下萬百姓攏識你的名，敬畏你，親像你的百姓以色列一樣，閣互𪜶知我所起此間殿是用你的名來稱的。
6:33 求你對天頂，你徛起的所在，聽𪜶的祈求，照外國人一切對你懇求的來做，互天下萬民攏會親像你的子民以色列像款，識你的名，敬畏你；閣互𪜶知此個聖殿是敬拜求叫你的所在。
6:34 「你的百姓若出去你所差𪜶去的路，及對敵交戰，向你所揀此個城及我為著你的名所起的殿來祈禱你，
6:34 「你的子民奉你的命令，無論出去什麼所在及對敵交戰的時，若向你所揀選的城，及我為著你的名起的殿對你祈禱，
6:35 願你對天來聽𪜶的祈禱懇求，來保護𪜶的義。
6:35 求你對天頂聽𪜶的祈禱懇求，互𪜶得勝。
6:36 「你的百姓若得罪你（因為無有無犯罪的人），你受氣𪜶，將𪜶交互對敵，致到𪜶掠𪜶到或是遠或是近的地；
6:36 「世間無一個人無犯罪，毋拘你的子民若得罪你，你對𪜶受氣，將𪜶交互對敵，給𪜶掠去外地，無論遠抑是近，
6:37 𪜶若佇所掠去的地，心內倒轉想來反悔，閣佇掠𪜶的人的地，懇求你講：『阮有罪，阮有悖逆，阮有做歹』；
6:37 𪜶若佇互人掠去的地回心轉意，閣佇𪜶受掠的地悔改，對你哀求：『阮有罪，阮背逆，阮做歹。』
6:38 𪜶若佇受掠去的地就是對敵掠𪜶去的地，盡心盡性歸服你，閣向本地，就是你賞賜𪜶列祖的地及你所揀的城，以及我為著你的名所起的殿來祈禱你，
6:38 𪜶若佇對敵掠𪜶去的地，全心全意歸順你，閣向你賞賜𪜶列祖的地，及你所揀選的城，以及我奉你的名起的殿，對你祈禱，
6:39 願你對天你所徛起的所在聽𪜶的祈禱懇求，來保護𪜶的義，閣赦免你的百姓得罪你的。
6:39 求你對天頂，你徛起的所在，聽𪜶的祈禱懇求，照公道對待𪜶，閣赦免許個得罪你的子民。
6:40 「我的上帝啊，今我求你目睭看，耳孔聽佇此所在所獻的祈禱。
6:40 「我的上帝啊，今求你開目睭看，俯耳孔聽佇遮所獻的祈禱。
6:41 耶和華上帝啊，求你起來，
你及你能力的櫃入你安息的所在。
耶和華上帝啊，願你的祭司穿救恩；
願你許個聖的百姓得著福氣來歡喜。
6:41 主上帝，求你起來；
你及你有氣力的約櫃做夥入去你歇睏的所在。
主上帝，願你的祭司用救恩做衫穿；
願你聖的子民因為得著福氣歡喜快樂。
6:42 耶和華上帝啊，求你莫得拒絕你受抹油者，
著記念你施互你的奴僕大衛的慈愛。」
6:42 主上帝，求你毋通棄拺你抹油揀選的君王；
著帶念你施落互你的僕人大闢的慈愛。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。