上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
備辦起聖殿
2:1 ( 王上 5:1-18 )
所羅門定著意思欲為耶和華的名起殿堂，也為家己的國起皇宮。
所羅門準備起造聖殿
2:1 ( 王上 5:1-18 )
所羅門決定欲為著上主的名起聖殿，閣為家己的王國起宮殿。
2:2 所羅門就揀挑夫七萬，上山拍石的八萬，督工的三千六百。
2:2 所羅門就召集運搬的工人七萬，佇山裡拍石的八萬，督工的三千六百。
2:3 所羅門差人去見推羅王戶蘭，講：「你曾運柏香柴互我的老父大衛起厝來徛起，求你也照按呢款待我。
2:3 所羅門派人去見泰爾王希蘭，講：「你曾運柏香柴互我的老父大闢起宮殿徛起，請你嘛按呢對待我。
2:4 看啊，我欲為著耶和華──我的上帝的名起殿，分別做聖獻互伊，通佇伊的面前燒芳料的香，常常供給排列的餅，逐早暗、安息日、月的初一，及耶和華──阮的上帝所定著的節期獻燒祭。這是以色列人永遠的例。
2:4 現在，我欲為著上主 — 我的上帝的名起聖殿，分別作聖獻互伊，通照以色列人永遠的規例，佇伊的面前燒香，常常排獻祭的餅，逐早暗、安歇日、初一，及上主 — 阮的上帝所定的節期，獻燒化祭。
2:5 我所欲起的殿真大；因為阮的上帝真大，贏過攏總的上帝。
2:5 我所欲起的聖殿真大，因為阮的上帝真偉大，贏過所有的神明。
2:6 天及天頂的天，尚且無夠額通互伊徛起，是誰會為著伊起殿啊？我是甚麼號人？通給伊起殿嗎？不過佇伊的面前燒香若定。
2:6 天及天頂的天都無夠通互伊徛起，啥人會當為著伊起聖殿？我算什麼通為著伊起聖殿？我不過是起一間會當佇伊面前燒香獻祭的殿若定。
2:7 今求你差一人到我遮，就是𠢕做金、銀、銅、鐵、及紫色、朱紅色、藍色的料的，也精工佇逐項雕刻的工，通及許個及我佇猶大耶路撒冷𠢕的師傅相及做工，就是我的老父大衛所備辦的；
2:7 今請你派一個真𠢕用金、銀、銅、鐵，及紫色、朱紅色、藍色的紗做工藝，閣真𠢕雕刻的師傅來我遮，通及我的老父大闢所準備佇猶大以及耶路撒冷許個𠢕的師傅做夥做工。
2:8 閣求你對黎巴嫩運柏香樹、松樹、檀香樹到我遮，因為我知你的奴僕𠢕剉黎巴嫩的樹。看啊，我的奴僕欲及你的奴僕相及做。
2:8 閣請你對黎巴嫩運柏香樹、松樹、檀香樹的柴料來互我；我知你的工人𠢕剉黎巴嫩的樹。我會派人去協助你的工人。
2:9 按呢，通給我備辦多多柴料，因為我所欲起的殿是大閣奇妙。
2:9 請為著我準備較多木材，因為我欲起的聖殿真大閣堂皇。
2:10 你的奴僕剉樹，看啊，我欲互𪜶好的小麥二萬歌珥，大麥二萬歌珥，酒二萬罷特，油二萬罷特。」
2:10 你的工人剉樹，我會互𪜶小麥兩千公噸，大麥兩千公噸，酒四十萬公升，油四十萬公升。」
2:11 推羅王戶蘭回批應所羅門講：「因為耶和華疼伊的百姓，就設立你做𪜶的王」；
2:11 泰爾王希蘭給所羅門回批，講：「因為上主疼伊的子民，所以設立你做𪜶的王。」
2:12 希蘭閣講：「創造天地的耶和華──以色列的上帝是應該謳咾的！伊賞賜大衛王一個智慧的子，互伊有聰明𠢕計謀，通為著耶和華起殿，閣為伊的國起皇宮。
2:12 希蘭閣講：「創造天地的上主 — 以色列的上帝應該受稱讚！伊賞賜大闢王一個有智慧的子，互伊有見識聰明，通為著上主起聖殿，閣為家己起宮殿。
2:13 「今我差一個精工聰明的人去，是我的老父希蘭所用的，
2:13 今我派一個𠢕閣聰明的人去，伊是我的師傅戶蘭。
2:14 伊是但的支派一個婦仁人的子。伊的老父是推羅人，伊𠢕做金、銀、銅、鐵、石、柴、及紫色、藍色，幼苧布、朱紅色，也會曉得逐等號的雕刻，也會想出逐等號的工。互伊及你𠢕的師傅以及你的老父──我的主大衛𠢕的師傅相及做。
2:14 伊是但支族一個婦仁人的子，老父是泰爾人；伊真𠢕用金、銀、銅、鐵、石、柴，及紫色、藍色、幼麻、朱紅色的紗做工藝，嘛真𠢕雕刻，閣會曉設計人交互伊的逐款圖案；你通互伊及你𠢕的師傅，以及你的老父，我的主大闢，𠢕的師傅做夥做工。
2:15 今我的主所講的小麥、大麥、油、酒，願運來互諸個奴僕。
2:15 今我的主所講的小麥、大麥、油、酒，請運來互諸個工人。
2:16 阮欲照你所欠用的，對黎巴嫩剉樹，絞歸排，浮佇海裡運到約帕；你就通運到耶路撒冷。」
2:16 阮會照你所需要的，對黎巴嫩剉樹，縛做歸排浮佇海裡，運到約帕；你就通對遐運去耶路撒冷。」
聖殿工程動工
2:17 ( 王上 6:1-38 )
所羅門算徛起佇以色列地的出外人，照伊的老父大衛所算的，計共有十五萬三千六百名；
2:17 所羅門照伊的老父大闢所做的戶口普查，閣點算住佇以色列地所有的外族人，攏總有十五萬三千六百人。
2:18 伊互七萬人做挑夫，八萬人佇山裡拍石，三千六百人監督𪜶做工的。
2:18 伊互七萬人做運搬的工人，八萬人佇山裡拍石，三千六百人監督𪜶做工。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。