上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
所羅門王祈求智慧
1:1 ( 王上 3:1-15 )
大衛的子所羅門國位堅固；耶和華──伊的上帝及伊佇啲，互伊不止大興旺。
所羅門求智慧
1:1 ( 王上 3:1-15 )
大闢的子所羅門堅固伊對以色列的統治，上主 — 伊的上帝及伊同在，互伊受尊做大。
1:2 所羅門對以色列眾人講，就是千總、百總、審判司，以及通以色列的首領及族長。
1:2 所羅門召集以色列眾人，就是管一千人及管一百人的軍官、審判官，以及全以色列的領袖及族長，
1:3 所羅門及會眾攏去到基遍的山頭壇，佇遐有上帝的會幕，就是耶和華的奴僕摩西佇曠野所造的。
1:3 導𪜶去基遍的山頭壇；佇遐有上帝的會幕，是上主的僕人摩西佇曠野所造的。
1:4 獨獨上帝的櫃，大衛已經對基列‧耶琳帶伊上去到大衛替伊備辦的所在，因為伊曾替伊搭布棚佇耶路撒冷，
1:4 彼時大闢已經將上帝的約櫃對基列‧耶琳徙來耶路撒冷，囥佇伊為著約櫃搭的布棚。
1:5 閣戶珥的孫、烏利的子比撒列所造的銅壇也佇遐，佇耶和華會幕前。所羅門及會眾就近伊。
1:5 毋拘戶珥的孫，烏利的子比撒列所造的銅壇猶佇基遍上主的會幕前；所羅門及會眾佇遐求問上主。
1:6 所羅門上到耶和華面前的銅壇就是佇會幕遐，獻燒祭一千佇彼頂面。
1:6 所羅門佇會幕前敬拜上主，佇銅壇獻一千隻牲生做燒化祭。
1:7 彼暝，上帝對所羅門出現，給伊講：「你愛我賞賜你甚麼，你通求啦。」
1:7 彼暝，上帝對所羅門顯現，給伊講：「你愛我賜你什麼，通對我求。」
1:8 所羅門對上帝講：「你曾對我的老父大衛大施慈愛，閣互我續接伊做王。
1:8 所羅門對上帝講：「你曾施大恩互我的老父大闢，閣互我續接伊作王。
1:9 耶和華上帝啊，今求你行你所應允我的老父大衛的話；因為你設立我做此個百姓的王，𪜶親像地上的土沙一樣。
1:9 主上帝，今求你實現你對我的老父大闢的應允，因為你設立我做此個人民的王，𪜶親像地上的土沙赫多。
1:10 求你賞賜我智慧聰明，互我通出入佇此個百姓的面前；因為，是誰會審判你許大國的百姓啊？」
1:10 今求你賜我智慧聰明，互我通領導此個國家，治理諸個人民；若毋是按呢，啥人會當治理你即多的人民？」
1:11 上帝對所羅門講：「你已經有此號心，無求貨財、好額、尊貴，及你的對敵的生命，也無求家己長歲壽，獨獨為家己求智慧聰明互你通審判我的百姓，就是我設立你做𪜶的王的；
1:11 上帝對所羅門講：「既然你的心意是按呢，無求錢財、富足、尊榮，及消滅對敵的性命，嘛無求長歲壽，只有求智慧聰明，通治理我的子民，就是你受設立作王治理的人民。
1:12 所以賞賜你智慧聰明，我也欲賞賜你貨財、好額、尊貴。佇你以前的列王攏無有按呢，佇你以後也無欲有按呢的。」
1:12 所以我欲賜你智慧聰明，嘛欲賜你錢財、富足、尊榮；超過你以前的列王，佇你以後嘛𣍐有人親像你按呢。」
1:13 對按呢，所羅門對基遍山頭壇會幕前倒來耶路撒冷，做王管理以色列。
所羅門的兵力及財力
1:13 ( 王上 10:26-29 )
所羅門對基遍山頭壇的會幕倒來耶路撒冷，作王治理以色列。
所羅門的權力及財力
1:14 ( 王上 10:26-29 )
所羅門聚集戰車馬兵，有戰車一千四百張，馬兵一萬二千名，安置佇囤車的城也及王佇耶路撒冷。
1:14 所羅門王有建立軍隊，戰車一千四百台，馬兵一萬兩千名；給𪜶安置佇許個囤戰車的城，及耶路撒冷王遐。
1:15 王佇耶路撒冷互金銀親像石頭，互柏香樹親像平洋的桑材樹，因為真多。
1:15 王統治期間，耶路撒冷的金銀親像石頭赫多，柏香柴親像山埔的桑材樹赫多。
1:16 所羅門所有的馬是對埃及來的，就是王的生理人一陣一陣照價錢買來的。
1:16 所羅門的馬攏對埃及及科威進口，是王的生理人對科威照市價買來的。
1:17 𪜶對埃及買來的車，每張值銀六百舍客勒，馬每匹一百五十。赫人諸個王及亞蘭諸個王攏對𪜶經手照按呢帶出來。
1:17 對埃及進口的戰車，逐台大約七公斤的銀；戰馬逐隻大約兩公斤的銀。所羅門的生理人嘛經手，將諸個出口賣互赫人及敘利亞人許個王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。