上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
為建殿來獻的禮物
29:1 大衛王對會眾講：「我的子所羅門是上帝特別揀者，猶久少年幼茈；此個工程真大，因為此個殿是為著人，就是為著耶和華上帝起的。
為起造聖殿奉獻禮物
29:1 大闢王對全會眾講：「我的子所羅門是上帝特別揀選的，毋拘猶少年，無經驗。此個工程真大，因為此個聖殿毋是為著人，是為著主上帝起的。
29:2 我為著我的上帝的殿已經盡氣力，備辦金做金器，備辦銀做銀器，銅做銅器，鐵做鐵器，柴做柴器，閣有紅瑪瑙及通鑲的寶石，光石，彩色的石，以及逐樣的寶石，矽石極多。
29:2 我為著我的上帝的殿已經盡力，有準備金、銀、銅、鐵、柴，欲做逐款器具；閣有準備真多紅瑪瑙、通鑲的寶石、光石、彩色的石、逐款的寶石，及大理石。
29:3 因為我欣慕我的上帝的殿，就佇備辦起聖殿的材料以外，閣用我本身所積聚的金銀，獻佇我上帝的厝，
29:3 我意愛我的上帝的殿，就佇準備起聖殿的材料以外，閣將我積聚的金銀，攏獻做起我上帝聖殿的路用；
29:4 就是俄斐的金三千他連得的金、鍛煉的銀七千他連得，來安諸個厝牆。
29:4 就是俄斐的金一百外公噸，純銀兩百四十外公噸，來貼聖殿的壁；
29:5 金做金器，銀做銀器，及師傅的手所做諸個工。今仔日有甚麼人歡喜將本身獻互耶和華啊？」
29:5 以及互師傅做金器、銀器，及所有器具的路用。今仔日猶有什麼人歡喜奉獻，奉獻伊本身互上主？」
29:6 對按呢，眾族長及以色列逐支派的首領、千總、百總，以及監督許個給王做工的，攏歡喜來獻。
29:6 按呢，族長、以色列逐支族的首領、管一千人及管一百人的軍官，以及監督許個給王作工的人的官長，攏甘心奉獻。
29:7 𪜶為著上帝殿的路用獻金五千他連得連一萬達利克，銀一萬他連得，銅一萬八千他連得，鐵十萬他連得。
29:7 𪜶為著上帝聖殿的工程，奉獻金一百七十外公噸、銀三百四十外公噸、銅約六百二十公噸，及鐵三千四百公噸。
29:8 見若有寶石的攏交代革順人耶悅的手，送入耶和華殿的府庫。
29:8 有寶石的人攏將寶石提去交互革順人耶歇，送入上主聖殿的府庫。
29:9 因為𪜶甘心獻，百姓攏歡喜，因為𪜶盡心獻互耶和華，大衛王也大歡喜到極。
29:9 人民攏真歡喜奉獻，因為𪜶盡心獻互上主；大闢王嘛非常歡喜。
大衛謳咾耶和華
29:10 所以，大衛佇會眾的面前謳咾耶和華，大衛講：「耶和華──阮的祖以色列的上帝啊，是應該謳咾者，對永遠到永遠！
大闢稱讚上主
29:10 大闢佇全會眾的面前稱讚上主，講：「上主 — 阮祖先以色列的上帝應該受稱讚，對永遠到永遠。
29:11 耶和華啊，尊大、能力、榮光、得勝、威嚴攏是你的；凡若佇天頂地下的攏是你的；耶和華啊，國也是你的，你是至高，做萬有的頭。
29:11 上主，你至大，有權能、榮光、勝利、威嚴；天頂地下所有的攏是你的。上主，國是你的，你至高，是萬有的主宰。
29:12 好額尊貴攏對你來，你也掌管萬有。佇你的手有大權能大氣力，互人尊大互眾人大氣力攏出佇你的手。
29:12 富裕尊貴攏對你來，你嘛掌管萬有；你有大權能大氣力，互人偉大強盛。
29:13 阮的上帝啊，今阮感謝你，謳咾你榮光的名！
29:13 阮的上帝，今阮感謝你，稱讚你榮耀的名。
29:14 「我是甚麼，我的百姓是甚麼，阮竟然會按呢歡喜奉獻啊？因為萬物攏對你來，阮用你的物獻互你。
29:14 「我算什麼，我的子民算什麼，阮竟然會當按呢甘心奉獻？萬物攏對你來，阮不過用你的物獻互你。
29:15 阮佇你的面前是出外人，是寄腳者，及阮的列祖一般樣。阮佇世間的日子親像影，無通向望長長佇啲。
29:15 阮佇你的面前是出外人，是寄居的，及阮的祖先仝款。阮佇世間的日子親像影，無什麼向望。
29:16 耶和華──阮的上帝啊，阮備辦諸個多多材料，欲為著你的聖名起你的殿，攏是對你來，也攏是你的。
29:16 上主 — 阮的上帝啊，阮準備諸個所有的材料，欲為著你的聖名起造聖殿，諸個攏是對你來，嘛攏是你的。
29:17 我的上帝啊，我知你鑑察人的心，歡喜正直；論到我，我用正直的心歡喜獻這一切的物。今我看見你的百姓佇遮攏歡喜獻互你，我就歡喜。
29:17 我的上帝，我知你監察人的心，意愛正直；我用正直的心甘心奉獻諸個所有的物。現在我真歡喜看著你的子民佇遮，攏甘心奉獻互你。
29:18 耶和華──阮列祖亞伯拉罕、以撒、以色列的上帝啊，求你互你的百姓常常存此號的心思念頭，備辦𪜶的心歸向你，
29:18 上主 — 阮列祖亞伯拉罕、以撒、雅各的上帝，求你互你的子民常常存此款心思意念，堅決歸向你。
29:19 閣求你賞賜我的子所羅門誠實的心，來守你的命令、法度、律例，做成這一切的事，用我所備辦的來起殿。」
29:19 閣求你賞賜我的子所羅門純全的心，徹底遵守你的誡命、教示、規例，閣用我準備的起造聖殿。」
29:20 大衛對諸個會眾講：「恁著謳咾耶和華──恁的上帝。」對按呢會眾謳咾耶和華──𪜶列祖的上帝，俯頭拜耶和華及王。
29:20 大闢對全會眾講：「恁著稱讚上主 — 恁的上帝。」全體會眾就稱讚上主 — 𪜶列祖的上帝，俯頭跪拜上主及王。
29:21 隔日，𪜶獻祭互耶和華閣獻燒祭互耶和華，就是獻公的牛一千隻，公的綿羊一千隻，羊仔一千隻，及伊的灌奠；閣為以色列的眾人獻多多祭物。彼日，𪜶佇耶和華的面前飲食，大大歡喜。
29:21 隔日，𪜶向上主獻祭。𪜶獻燒化祭互上主，公的牛一千隻、公的綿羊一千隻、細隻羊仔一千隻，及奠酒祭；閣為以色列的人民獻真多祭物。
29:22 𪜶第二擺設立大衛的子所羅門做王，為耶和華用油抹伊，互伊做君王，亦用油抹撒督做祭司。
29:22 彼日，𪜶佇上主的面前飲食，非常歡喜。
𪜶第二遍設立大闢的子所羅門作王，佇上主面前給伊抹油作王；閣用油抹撒督做祭司。
29:23 對按呢所羅門坐佇耶和華所賞賜的位，續接伊的老父大衛做王，無亨通；以色列眾人也攏聽趁伊。
29:23 所羅門就坐上主所賞賜的王位，續接伊的老父大闢作王。伊事事順利，以色列人民攏歸順伊。
29:24 眾首領及勇士，及大衛王的眾子，攏順服所羅門王。
29:24 所有的領袖及勇士，連大闢王攏總的子兒嘛攏順服所羅門王。
29:25 耶和華互所羅門佇以色列眾人的面前極其尊大，互伊做國王的威風，贏過以色列以前的王。
29:25 上主互所羅門佇以色列人民的面前受尊做大；互伊有國王的威嚴，超過以色列以前所有的王。
大衛的政績
29:26 耶西的子大衛做以色列眾人的王，
大闢死
29:26 耶西的子大闢做全以色列的王。
29:27 伊做以色列王歷過四十年：佇希伯崙做王七年，佇耶路撒冷做王三十三年。
29:27 伊作王統治以色列共四十年：佇希伯崙七年，佇耶路撒冷三十三年。
29:28 伊食長歲壽，年歲、好額、榮光攏滿足，就過世。伊的子所羅門續接伊做王。
29:28 伊享受榮華富貴，食長歲壽。伊的子所羅門續接伊作王。
29:29 大衛王頭到尾的事攏記佇先見撒母耳的冊及先知拿單的冊以及先見迦得的冊。
29:29 大闢王一生的事蹟攏記載佇先見撒母耳、先知拿單，以及先見迦得的冊。
29:30 許個冊也記載伊治理國的事及伊的大權能，以及伊及以色列及四方的列國所經過的時事。
29:30 諸個冊嘛記載伊按怎治理國政及伊的成就，閣記載伊及以色列以及四圍國家所經歷的事。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。