上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大衛對起聖殿的指示
28:1 大衛招集以色列的首領各支派的首領及輪班服事王的軍長，千總、百總、掌管王及王的子的產業精牲者，及太監，以及大權能的，及大權能的勇士，攏到耶路撒冷。
大闢指示起造聖殿
28:1 大闢召集以色列的領袖、各支族的首領，及輪班服事王的官長、管理一千人及管理一百人的軍官、管理王及王子兒的產業及牲生的官員、太監、勇士，以及重要人臣，攏來耶路撒冷。
28:2 大衛王就徛起來，講：「我的兄弟，我的百姓啊，恁著聽我的話，我的心本想欲為著耶和華的約櫃，閣為著咱的上帝的腳踏椅；起殿來安置伊；我已經備辦欲起。
28:2 大闢王就徛起來，講：「各位鄉親，各位同胞，請聽！我本來想欲起造聖殿來安置上主的約櫃，就是咱的上帝的腳砧；我嘛已經準備好勢。
28:3 總是上帝對我講：『你𣍐得通為我的名起殿；因為你是戰士，有互人流血。』
28:3 毋拘上帝對我講：『你𣍐用得為著我的名起聖殿，因為你是戰士，有刣死真多人。』
28:4 拘，耶和華──以色列的上帝佇我的父全家揀我做以色列王，直到永遠。因為伊揀猶大做首領；佇猶大的支派中揀我的父的家，佇我的父的眾子中歡喜我，設立我做以色列眾人的王。
28:4 毋拘，上主 — 以色列的上帝對阮老父全家族揀選我作王，永遠治理以色列；因為伊揀選猶大做領袖，閣對猶大支族揀選阮老父的家，佇阮老父的子兒中特別意愛我，選立我作王，治理全以色列。
28:5 耶和華賞賜我多多子，佇我的子的中間揀我的子所羅門佇耶和華的國坐位，治理以色列。
28:5 上主賞賜我真多子，佇我的子兒中揀選我的子所羅門，坐上主的國的王位，治理以色列。
28:6 伊閣對我講：『你的子所羅門欲起我的殿我的院；因為我揀伊做我的子，我也欲做伊的父。
28:6 「上主閣對我講：『你的子所羅門欲起我的殿、我的埕；我揀選伊做我的子，我嘛欲做伊的父。
28:7 伊若久長遵趁我的誡命法度親像今仔日，我就欲堅固伊的國位，直到永遠。』
28:7 伊若親像今仔日堅決遵守我的誡命及命令，我就欲堅固伊的國位，直到永遠。』
28:8 今佇耶和華的會，以色列眾人的面前，咱的上帝也聽見。恁著查考恁的上帝──耶和華的誡命，來執守伊，按呢恁通享受此個好的地，留互恁後代的子孫，永遠做業。
28:8 「現在，佇上主的大會，以色列眾人的面前，咱的上帝嘛啲聽，我命令恁著遵行渴慕上主 — 恁的上帝的誡命；按呢，恁就通得著此塊好的土地，留互恁的後代，永遠做產業。」
28:9 「我的子所羅門阿，你著認識你的父的上帝，誠實心歡喜服事伊；因為耶和華鑑察眾人的心，知攏總的心思念頭。你若尋伊，伊欲互你抵著；你若放拺伊，伊欲永遠拒絕你。
28:9 大闢對所羅門講：「我的子所羅門，你著認識你的老父的上帝，全心歡喜服事伊；因為上主監察逐個人的心，知𪜶的心思意念。你若尋求伊，伊會互你尋著；你若放拺伊，伊會永遠棄拺你。
28:10 你著謹慎，因為耶和華揀你起厝做聖所。你著勇敢去做。」
28:10 你著謹慎，因為上主揀選你起造聖殿；你著勇敢去做。」
28:11 大衛將殿堂的兩廊、房間、府庫、樓閣、內殿，及施恩所彼間一切的圖樣交伊的子所羅門，
28:11 大闢將聖殿的走廊、房間、府庫、樓頂的房間、內殿，及施恩座的所在，所有的設計圖，交互伊的子所羅門；
28:12 閣用對神所得著一切的圖樣，就是耶和華殿的院、四周的房、上帝殿的府庫，及聖物的府庫諸個圖樣攏交伊；
28:12 將伊對上帝的神所得著關係上主聖殿的埕、四圍的房間、聖殿的府庫，及囥聖物的府庫的設計圖，攏交互所羅門。
28:13 閣指示伊祭司及利未人的班列及耶和華殿內服事的工，以及耶和華殿內服事的器具，
28:13 大闢閣給所羅門指示按怎分配祭司及利未人的班次，互𪜶執行佇上主殿內服事的職務，以及管理上主殿內的器具。
28:14 閣秤金互伊做逐樣應用的金器，亦秤銀互伊做逐樣應用的銀器，
28:14 大闢閣指示伊用偌多金及銀做逐種服事欲用的金器及銀器，金及銀的燈及燈台，囥獻祭的餅的金桌及銀桌；
28:15 就是諸個金燈台及伊的盞，就秤金來做逐個燈台及伊的盞，閣用做銀燈台的銀來秤互伊，伊的燈台及伊的盞攏是按呢，照逐個燈台的路用；
28:15 併於上節
28:16 閣秤金互伊來做排列餅的桌，亦秤銀來做銀的桌，
28:16 併於上節
28:17 閣用好金互伊做肉叉、盤、杯，閣秤金互伊通做逐個金碗，秤銀互伊做逐個銀碗，
28:17 閣指示伊著用偌多純金做肉叉、盤、杯、碗，以及用偌多銀做銀碗；
28:18 閣秤好金互伊通做香壇，亦用金做𠼻𡀔兵車的款式；𪜶展開翅，遮蓋耶和華的約櫃。
28:18 閣秤煉過的金做香壇；嘛照設計圖用金做天使基路伯的車，𪜶搋開翼，遮蓋上主的約櫃。
28:19 大衛講：「頂面諸個規模攏是我得著耶和華默示寫出來的。」
28:19 大闢講：「頂面諸個設計圖，攏是照上主親身指示我寫出來的。」
28:20 大衛閣給伊的子所羅門講：「你著勇敢壯膽去做！莫得愞，亦莫得驚。因為耶和華上帝就是我的上帝，及你佇啲；伊的確無離開你，亦無放拺你，直到耶和華殿的工攏明白。
28:20 大闢閣給伊的子所羅門講：「你著堅強勇敢去做；毋通驚，毋通懍；因為主上帝，我的上帝，及你同在；伊一定𣍐離開你，嘛𣍐放拺你，直到你完成上主聖殿的工程。
28:21 看啊，有祭司及利未人的逐班，為著欲辦理上帝殿逐項的事，閣有奇巧的人佇逐項的工歡喜幫助你；亦有諸個首領及眾百姓一心聽趁你的命令。」
28:21 你看，許個祭司及利未人佇上帝的聖殿服事的職務已經分配好勢，嘛有真多功夫真好的師傅歡喜幫贊你，閣有真多官長及全體人民攏會聽趁你的命令。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。