上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大衛算以色列的人額
21:1 ( 撒下 24:1-25 )
撒但起來愛害以色列，引誘大衛算以色列人的數額。
大闢調查戶口
21:1 ( 撒下 24:1-17 )
撒旦起來攻擊以色列人，激動大闢調查以色列人的人口。
21:2 大衛給約押及百姓中的首領講：「恁去算以色列人，對別是巴到但，倒來給我講，互我知𪜶的數額。」
21:2 大闢對約押及軍隊的領袖講：「恁對別是巴到但點算以色列人的人口，互我知全國人民的數目。」
21:3 約押講：「願耶和華互伊的百姓比現今加添百倍。我的主我的王啊，𪜶豈無攏是我的主的百姓嗎？我的主啥事命令此個代誌，啥事互以色列犯罪啊？」
21:3 約押講：「願上主互伊的子民比現在增加百倍。我的主我的王，𪜶豈毋是我的主的人民？我的主是按怎愛欲做此個代誌？是按怎欲互以色列陷落罪？」
21:4 總是王的話贏過約押。約押就出去，遍行以色列地，閣倒來耶路撒冷，
21:4 王堅持伊的命令。約押就行透以色列全國調查，後來倒來耶路撒冷。
21:5 約押就將所算百姓的總額報告大衛：以色列人會攑刀者一百十萬；猶大人會攑刀者四十七萬。
21:5 約押將點算的人數報告大闢。以色列人攑刀的戰士有一百十萬，猶大人有四十七萬。
21:6 獨獨利未人及便雅憫人伊無算在內，因為約押厭惡王此個命令。
21:6 毋拘約押無點算利未支族及便雅憫支族的人數，因為伊厭惡王此個命令。
21:7 此個事上帝看做好，就拍以色列。
21:7 大闢做的此項代誌上帝看做歹，就刑罰以色列。
21:8 大衛對上帝講：「我行此個事大大有罪！今求你除去你的奴僕的罪，因為我所做的真戇。」
21:8 大闢對上帝講：「我做此個代誌犯真大的罪。求你除去你奴僕的罪，因為我按呢做真戇。」
21:9 耶和華吩咐大衛的先見者迦得講：
21:9 上主吩咐大闢的先見迦得，講：
21:10 「你著去給大衛講，耶和華按呢講：今我用三項排佇你面前，你揀一項，我通行佇你。」
21:10 「你去給大闢講：上主按呢講：『我用三項災禍互你揀一項，我就照按呢做。』」
21:11 迦得就來見大衛，給伊講：「耶和華按呢講：『你著家己揀：
21:11 迦得來給大闢講：「上主按呢講：『你家己揀：
21:12 豈採三年的飢荒；抑是三月日久抵著損害佇你的對敵的面前，互仇讎的刀劍趇著你；抑是三日久耶和華的劍，就是瘟疫佇你的國內，耶和華的使者佇以色列的遍境啲毀滅。』今你著想看，我通用甚麼話回覆差我者。」
21:12 三年的飢荒；抑是刣輸對敵，互對敵追殺三個月；抑是三日久互上主用伊的劍，就是瘟疫，降臨佇以色列全國，施行毀滅。』今你著想，互我通回復差我來彼位。」
21:13 大衛給迦得講：「我窘迫到極。我願陷落佇耶和華的手，因為伊的憐憫真大；我願陷落佇人的手。」
21:13 大闢給迦得講：「我真為難；我寧可互上主家己給我刑罰，因為伊有豐盛的憐憫；我毋願陷落佇人的手。」
21:14 對按呢，耶和華就降瘟疫佇以色列，以色列人死者七萬。
21:14 上主就降瘟疫佇以色列；以色列死七萬人。
21:15 上帝差一個使者到耶路撒冷滅伊，欲滅伊的時，耶和華看見，就退悔此個災禍，就給毀滅的使者講：「夠額啦，今通停你的手！」彼時，耶和華的使者徛佇耶布斯人阿珥楠的五穀場。
21:15 上帝差一個天使去耶路撒冷欲給伊毀滅。當天使欲毀滅的時，上主看見就改變心意，無欲繼續降此個災禍，就給啲執行毀滅的天使講：「停手！夠額啦！」彼時，上主的使者徛佇耶布斯人亞勞拿的五穀場。
21:16 大衛攑目，看見耶和華的使者徛佇半空中，拔刀佇手裡，伸佇耶路撒冷的頂面。大衛及諸個長老攏穿麻衫，面仆佇地裡。
21:16 大闢攑頭看見上主的使者徛佇半空中，手攑拔出的劍，指向耶路撒冷。大闢及長老攏穿麻衫，面仆佇土腳。
21:17 大衛對上帝講：「吩咐算百姓的豈是我嗎？我犯罪行大歹，總是諸個羊群有做甚麼啊？求耶和華──我的上帝伸手佇我及我的父的家，通攻擊你的百姓，降瘟疫互𪜶。」
21:17 大闢對上帝講：「下令調查戶口的豈毋是我？犯罪做此個歹代誌的是我，諸個無辜的人民攏無做什麼毋著。求上主 — 我的上帝的手刑罰我及我的家族，毋通降瘟疫攻擊你的子民。」
21:18 當彼時耶和華的使者命令迦得去給大衛講，大衛著上去，佇耶布斯人阿珥楠的五穀場給耶和華起一座壇；
大闢為上主起一座祭壇
21:18 ( 撒下 24:18-25 )
上主的使者吩咐迦得，叫大闢上去耶布斯人亞勞拿的五穀場，佇遐為上主起一座祭壇。
21:19 大衛就照迦得奉耶和華的名所講的話上去。
21:19 大闢就照迦得奉上主的名所講的話上去。
21:20 彼時阿珥楠啲拍麥，越頭看見天使，及伊佇啲四個子走去匿。
21:20 彼時亞勞拿啲拍麥，越頭看見天使；及伊做夥佇遐的四個子走去匿。
21:21 大衛到阿珥楠遐，阿珥楠看見大衛，就出五穀場，俯頭拜大衛。
21:21 大闢去到亞勞拿遐；亞勞拿看著大闢，就對五穀場出來迎接，仆佇土腳拜大闢。
21:22 大衛對阿珥楠講：「你用此個五穀場的地互我，互我佇遐通給耶和華起一座壇，你著照足額的價錢賣我，互瘟疫息無害百姓。」
21:22 大闢對亞勞拿講：「請你將此個五穀場賣我，互我通佇遮為上主起一座祭壇，互全國的瘟疫停止。我會用全額的價錢給你買。」
21:23 阿珥楠給大衛講：「你通用伊，願我的主我的王照你所看做好的去行。你看，我用牛互你做燒祭，用拍五穀的器具做柴，亦用麥做素祭。諸個我攏互你。」
21:23 亞勞拿對大闢講：「我的主我的王，請你提去用，照你看做好的去做。我用牛互你做燒化祭，用拍五穀的器具做柴燒，麥仔做素祭；諸個我攏送互王。」
21:24 大衛王給阿珥楠講：「是按呢！我決斷欲用足額的價錢來買。因為我愛提你的物互耶和華，愛用無開費來獻燒祭。」
21:24 大闢王對亞勞拿講：「毋通，我一定欲用全額的價錢給你買。我𣍐用得提你的物獻互上主，用白白得著的物獻做燒化祭。」
21:25 對按呢大衛為著彼塊地秤六百舍客勒的金互阿珥楠。
21:25 大闢就用六千八百公克的黃金給亞勞拿買彼塊地。
21:26 大衛佇遐給耶和華起一座壇，獻燒祭及平安祭，閣求叫耶和華。伊對天降火佇祭壇頂，來應伊。
21:26 大闢佇遐為上主起一座祭壇，獻燒化祭及平安祭，閣求叫上主。上主聽伊的祈禱，對天降火燒祭壇的祭物。
21:27 耶和華命令使者，伊就收伊的刀入鞘。
21:27 上主命令彼個使者，伊就將劍收起來。
21:28 彼時，大衛看見耶和華佇耶布斯人阿珥楠的五穀場應伊，就佇遐獻祭。
21:28 大闢看著上主有佇耶布斯人亞勞拿的五穀場聽伊的祈禱，就佇遐獻祭。
21:29 因為摩西佇曠野所造耶和華的會幕及燒祭的壇，彼時攏佇基遍高的所在；
21:29 摩西佇曠野所造上主的會幕及燒化祭的祭壇，彼個時陣攏佇基遍的山頭壇。
21:30 總是大衛𣍐會上到伊的面前來問上帝，因為伊驚耶和華使者的刀。
21:30 毋拘大闢毋敢去基遍求問上帝，因為驚上主使者的劍。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。