上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大衛拍贏亞捫人及亞述人
19:1 ( 撒下 10:1-19 )
此霎了後，亞捫人的王拿轄死，伊的子續接伊做王。
拍敗亞捫人及敘利亞人
19:1 ( 撒下 10:1-19 )
後來，亞捫人的王拿轄死，伊的子哈嫩續接伊作王。
19:2 大衛講：「我欲好款待拿轄的子哈嫩因為伊的老父從前好款待我。」大衛就差幾若個使者為著伊死老父去安慰伊。大衛的人臣到亞捫人的地見哈嫩，欲安慰伊，
19:2 大闢講：「我欲好款待哈嫩，因為伊的老父拿轄以前好款待我。」大闢因為哈嫩的老父死，就差使者去給伊慰問。
大闢的人臣到亞捫人的境內見哈嫩，欲慰問伊。
19:3 總是亞捫人的貴族對哈嫩講：「大衛差人來安慰你，拍算伊是尊敬你的老父嗎？伊的人臣來見你豈是欲詳細查、毀滅、探聽此個地嗎？」
19:3 毋拘亞捫人的領袖對哈嫩講：「大闢派人來慰問你，你想講伊真正尊敬你的老父噢？伊的部下來見你，豈毋是欲詳細偵探此個城，看欲按怎給咱征服？」
19:4 哈嫩就將大衛的人臣剃伊的嘴鬚，剪斷伊的衣服的一半，露現伊的下體，才互伊去。
19:4 哈嫩就掠大闢的人臣，給𪜶的嘴鬚剃起來，閣剪斷𪜶的衫的下半截，互𪜶露出下體，然後趕𪜶倒去。
19:5 有人用諸個人所抵著的去給大衛講，伊就差人去接𪜶，因為許個人真見誚；王吩咐講：「著且𫢶耶利哥，聽候嘴鬚發長才倒來。」
19:5 有人將諸個人所抵著的對大闢報告，大闢就派人去接𪜶，因為𪜶感覺非常見笑。王講：「留𫢶耶利哥，聽候嘴鬚發長才倒來。」
19:6 亞捫人知對𪜶的所做有互大衛厭惡𪜶，哈嫩及亞捫人就寄銀一千他連得，對米所波大米、亞蘭、瑪迦、瑣巴倩戰車及馬兵，
19:6 亞捫人知𪜶惹大闢受氣；哈嫩及亞捫人就派人帶三萬四千公斤的銀，去美索不達米亞、敘利亞‧瑪迦、瑣巴，倩戰車及馬兵。
19:7 對按呢倩三萬二千張的戰車及瑪迦王以及伊的百姓；𪜶就來紮營佇米底巴的頭前。亞捫人也對𪜶許個城出來，聚集欲交戰。
19:7 𪜶倩三萬兩千台的戰車，以及瑪迦王及伊的軍兵；𪜶就來紮營佇米底巴的頭前。亞捫人嘛對𪜶的城出來，聚集欲交戰。
19:8 大衛聽見，就差約押及勇猛的全軍出去。
19:8 大闢聽見，就派約押導所有勇猛的軍隊出去。
19:9 亞捫人出來排陣佇城門前，所來諸個王另外排陣佇郊野。
19:9 亞捫人出來佇城門的頭前排陣；其他許個王另外佇野外排陣。
19:10 約押看見對敵佇伊的前後排陣，就對以色列軍中揀選精兵，互𪜶排陣來對亞蘭人；
19:10 約押看見伊的前後攏有對敵排陣，就對以色列精兵的中間閣再揀一寡勇士出來，排陣欲抵敵敘利亞人。
19:11 其餘的兵交互伊的小弟亞比篩，互伊排陣對亞捫人。
19:11 約押將其他的兵士交互伊的小弟亞比篩，𪜶就面對亞捫人排陣。
19:12 閣講：「亞蘭人若卡強我，你著來幫助我；亞捫人若卡強你，我就幫助你。
19:12 約押對亞比篩講：「敘利亞人若比我較強，你著來幫贊我；亞捫人若比你較強，我會去幫贊你。
19:13 著好膽，咱著為咱的百姓及咱的上帝諸個城做大丈夫，願耶和華照伊所看做好的來行。」
19:13 著堅強！著為咱的同胞及咱上帝的城勇敢出戰。上主會照伊看做好的去做。」
19:14 約押就及隨伊的人進前排陣佇亞蘭的面前；亞蘭人就佇伊的面前逃走。
19:14 約押導伊的軍隊進前及敘利亞人交戰；敘利亞人戰敗，就佇約押的面前逃走。
19:15 亞捫人看見亞蘭人逃走，𪜶亦佇約押的小弟亞比篩面前逃走入城。約押就倒轉去耶路撒冷。
19:15 亞捫人看著敘利亞人逃走，嘛佇約押的小弟亞比篩面前逃走入城。約押就倒轉去耶路撒冷。
19:16 亞蘭人看見𪜶刣輸以色列人，就差使者聚集大河彼旁的亞蘭人，哈大利謝的將軍朔法導𪜶來。
19:16 敘利亞人看著家己刣輸以色列人，就派使者去幼發拉底河彼旁召敘利亞的軍隊來；哈大底謝的將軍朔法導軍隊來。
19:17 有人通知大衛，伊就聚集以色列眾人過約但河，來到亞蘭人遐，排陣抵敵𪜶。大衛已經排陣攻擊亞蘭人，𪜶就及伊交戰。
19:17 有人報告大闢，伊就召集以色列全軍過約旦河，面對敘利亞人排陣。敘利亞人就及大闢交戰。
19:18 亞蘭人佇以色列人的面前逃走。大衛刣亞蘭人七千張車的兵，閣步兵四萬，亦刣死將軍朔法。
19:18 敘利亞人刣輸以色列人；大闢刣死敘利亞的戰車兵七千人，步兵四萬，閣刣死敘利亞的將軍朔法。
19:19 哈大利謝諸個人臣看見𪜶刣輸以色列人，就及大衛講和，來服事伊。對按呢亞蘭人無閣幫助亞捫人。
19:19 哈大底謝的人臣看著𪜶刣輸以色列人，就及大闢講和，歸順伊。對按呢，敘利亞人無閣幫贊亞捫人。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。