上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大衛佇耶路撒冷的活動
14:1 ( 撒下 5:11-16 )
推羅王希蘭差使者帶柏香柴，及土水師傅、做木師傅到大衛遐欲給伊起厝。
大闢佇耶路撒冷的活動
14:1 ( 撒下 5:11-16 )
泰爾王希蘭派使者帶柏香柴，及土水師傅、作木師傅去大闢遐，給大闢起宮殿。
14:2 大衛知耶和華定著設立伊做以色列王，閣為著伊的百姓以色列的緣故，來興起伊的國。
14:2 大闢就知上主堅立伊做以色列王，閣為著上主的子民以色列互伊的國強盛。
14:3 大衛佇耶路撒冷閣娶幾若個某，大衛閣生子查某子。
14:3 大闢佇耶路撒冷閣娶幾若個某。大闢閣生後生及查某子。
14:4 佇耶路撒冷所生諸個子的名記佇下底：沙某亞、朔罷、拿單、所羅門、
14:4 佇耶路撒冷生的子是沙慕亞、朔罷、拿單、所羅門、
14:5 益轄、以利書亞、以法列、
14:5 益轄、以利書亞、以利法列、
14:6 羅迦、尼斐、雅非亞、
14:6 挪迦、尼斐、雅非亞、
14:7 以利沙瑪、比利雅大、以利法列。
14:7 以利沙瑪、比利雅大、以利法列。
戰贏非利士人
14:8 ( 撒下 5:17-25 )
非利士人聽見大衛受抹油做以色列全國的王，非利士人就攏上來尋大衛。大衛聽見，就出去抵敵伊。
刣贏非利士人
14:8 ( 撒下 5:17-25 )
非利士人聽著大闢受抹油選立做全以色列的王，就全力上來追尋大闢。大闢聽著就出去迎戰。
14:9 非利士人來，排列佇利乏音的山谷。
14:9 非利士人來侵犯利乏音山谷。
14:10 大衛問上帝，講：「我著上去攻擊非利士人嗎？你欲將𪜶交佇我的手嗎？」耶和華講：「著上去，因為我欲將𪜶交佇你的手。」
14:10 大闢問上帝講：「我豈通進攻非利士人？你豈欲將𪜶交佇我的手？」
上主給大闢講：「你去，我會將𪜶交佇你的手。」
14:11 𪜶上來巴力‧毗拉心，大衛佇遐拍𪜶。大衛講：「上帝用我的手沖散我的對敵，親像水沖散一樣」；因為按呢叫彼所在做巴力‧毗拉心。
14:11 非利士人上來巴力‧比拉心，大闢佇遐給𪜶拍敗；大闢講：「上帝用我的手衝散我的對敵，親像大水給堤岸沖破。」因為按呢，彼個所在就叫做巴力‧比拉心。
14:12 非利士人放下𪜶的上帝佇遐，大衛命令人用火燒伊。
14:12 非利士人給𪜶的偶像擲佇遐；大闢命令人給許個偶像放火燒。
14:13 非利士人閣排列佇山谷。
14:13 非利士人閣來侵犯利乏音山谷。
14:14 大衛閣問上帝。上帝給伊講：「通上去追趇，著閃對邊仔，佇桑材樹的對面來攻擊𪜶。
14:14 大闢問上帝。上帝給伊講：「毋通正面進攻；著踅過𪜶的後面，佇桑材樹林的頭前給𪜶攻擊。
14:15 你聽見桑材樹尾有腳步的聲，就著出去交戰，因為上帝做你的頭前出去欲拍非利士人。」
14:15 你聽著樹尾有行軍的聲，就著出兵進攻，因為上帝已經佇你的頭前攻擊非利士人的軍隊。」
14:16 大衛就遵趁上帝所吩咐，𪜶拍非利士人的軍隊，對基遍到基色。
14:16 大闢就照上帝的命令去做，對基遍攻擊非利士人的軍隊，直到基色。
14:17 大衛的名聲就報揚逐所在，耶和華互列國攏驚伊。
14:17 大闢的名聲傳到萬國；上主互列國攏驚伊。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。