上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
早期跟隨大衛的便雅憫人
12:1 大衛因為驚基士的子掃羅，守啲敢出去的時，有諸個勇士來到洗革拉尋伊幫助伊交戰。
早期跟隨大闢的便雅憫人
12:1 大闢為著閃避基士的子掃羅，匿佇洗革拉的時，下面諸個勇士來到伊遐，幫贊伊交戰。
12:2 𪜶𠢕開弓，會用倒手正手㧒石頭射箭，攏是便雅憫人掃羅的同族。
12:2 𪜶會用正手倒手射箭，挕石頭；攏是便雅憫人，是掃羅的親族：
12:3 頭一個是亞希以謝，閣有約阿施，攏是基比亞人示瑪的子。閣有耶設及毗力是亞斯瑪威的子，閣有比拉迦，及亞拿突人耶戶，
12:3 導頭的是亞希以謝，閣落去是約阿施，𪜶攏是基比亞人示瑪的子；
閣有亞斯瑪威的子耶薛及比力、比拉迦
亞拿突人耶戶
12:4 基遍人以實買雅（佇三十人中是勇士，也啲管彼三十人），閣有耶利米、雅哈悉、約哈難，及基得拉人約撒拔，
12:4 基遍人伊施瑪雅 (三十人中的一個勇士，啲管理彼三十人)、耶利米、雅哈悉、約哈難
基底拉人約撒拔、
12:5 伊利烏賽、耶利摩、比亞利雅、示瑪利雅、哈律弗人示法提雅，
12:5 伊利烏賽、耶利摩、比亞利雅、示瑪利雅
哈律弗人示法提雅
12:6 可拉人以利加拿、耶西亞、亞薩列、約以謝、雅朔班，
12:6 可拉人以利加拿、伊示雅、亞薩列、約以謝、雅朔班
12:7 基多人耶羅罕的子猶拉及西巴第雅。
12:7 基多人耶羅罕的子猶拉及西巴第雅。
跟隨大衛的迦得人
12:8 迦得支派有幾若人到曠野的衛所歸倚大衛，𪜶攏是勇士戰士，會出陣夯屏牌攑槍。𪜶的面親像獅的面，𠢕走親像山裡的鹿。
跟隨大闢的迦得人
12:8 迦得支族有幾若人來到曠野的要塞，歸順大闢。𪜶攏是勇猛的戰士，夯盾牌，攑槍，𠢕相刣；𪜶的面親像獅的面，𠢕走親像山裡的鹿。
12:9 頭一個以設，第二俄巴底雅，第三以利押，
12:9 頭一個以謝珥，第二俄巴底亞，第三以利押，
12:10 第四彌施瑪拿，第五耶利米，
12:10 第四彌施瑪拿，第五耶利米，
12:11 第六亞太，第七以利業，
12:11 第六亞太，第七以利業，
12:12 第八約哈難，第九以利薩巴，
12:12 第八約哈難，第九以利薩巴，
12:13 第十耶利米，第十一末巴奈。
12:13 第十耶利米，第十一末巴奈。
12:14 諸個攏是迦得人也攏是軍長，上𣍐者會抵當一百人，上會者會抵當一千人。
12:14 諸個攏是迦得支族的軍官；上細的一個抵一百，上強的一個抵一千。
12:15 正月，約但河水漲滿雙旁岸的時，𪜶過河，互一切𫢶佇山谷的人走東走西。
12:15 正月約旦河的水漲滿雙旁岸的時，𪜶過河，互所有住佇平原的人驚甲四散逃走。
跟隨大衛的便雅憫人及猶大人
12:16 閣有便雅憫猶大人來到衛所尋大衛。
跟隨大闢的便雅憫人及猶大人
12:16 閣有便雅憫人及猶大人來大闢的要塞。
12:17 大衛出去迎接𪜶，對𪜶講：「恁若是為著平安來幫助我，我及恁的心就相契合；總是恁若欲將我無罪的人賣佇對敵的手，願咱列祖的上帝鑑察責罰。」
12:17 大闢出去迎接𪜶，對𪜶講：「恁若好意來欲幫贊我，我歡迎恁及我聯盟；毋拘恁若欲將我此個無罪的人出賣互對敵，願咱列祖的上帝監察責罰。」
12:18 彼時上帝的神臨到諸個將的頭人亞瑪撒，伊就講：
大衛啊，阮是歸佇你者！
耶西的子啊，阮是幫助你者！
願你平平安安，
願幫助你者也得著平安！
因為你的上帝幫助你。
大衛就收留𪜶，設立𪜶做軍長。
12:18 彼時上帝的神臨到眾軍官的首領亞瑪賽，伊就講：
「大闢啊，阮是歸順你的；
耶西的子啊，阮是支持你的。
願你平安順利，
願幫贊你的嘛攏平安；
因為你的上帝幫贊你。」
大闢就接納𪜶，設立𪜶做游擊隊的隊長。
跟隨大衛的瑪拿西人
12:19 大衛從前及非利士出陣，欲攻擊掃羅的時，有瑪拿西支派幾若人來歸倚伊，總是到尾𪜶無幫助𪜶；因為非利士的頭人有議論，著互伊倒去，講：「伊的確歸伊的主人掃羅，致到咱的頭殼危險。」
跟隨大闢的瑪拿西人
12:19 大闢及非利士人做夥欲攻擊掃羅的時，有一寡瑪拿西人來歸順伊。後來𪜶無幫贊非利士人，因為非利士的領袖有參詳，叫大闢倒去，講：「伊真有可能提咱的頭殼去歸順伊的主人掃羅。」
12:20 彼時大衛去洗革拉，有瑪拿西人的千總押拿、約撒拔、耶疊、米迦勒、約撒拔、以利戶、洗勒太攏來歸倚伊。
12:20 大闢去洗革拉的時，有瑪拿西人的指揮官，押拿、約撒拔、耶疊、米迦勒、約撒拔、以利戶、洗勒太，攏來歸順伊。
12:21 諸個人幫助大衛攻擊土匪；𪜶攏是大氣力的勇士，閣做軍長。
12:21 諸個人幫贊大闢對抗游擊隊，𪜶攏是勇猛的戰士，閣做軍官。
12:22 彼時日日有人歸倚大衛欲幫助伊，就成做大軍隊，親像上帝的軍隊一樣。
12:22 彼時，逐日有人來欲幫贊大闢，伊的軍隊就親像上帝的軍隊赫呢強大。
大衛的軍力
12:23 備辦交戰的軍隊到希伯崙見大衛，欲照耶和華的話移徙掃羅的國位互大衛。𪜶的數額記佇下面：
大闢的軍隊
12:23 有武裝好勢的戰士來希伯崙見大闢，欲照上主的話將掃羅的王位交互伊。下面是許個戰士的數目：
12:24 猶大支派，夯屏牌攑槍備辦交戰的有六千八百人。
12:24 猶大支族：夯盾牌，攑槍的武裝戰士，有六千八百人。
12:25 西緬的支派，會出陣的勇士有七千一百人。
12:25 西緬支族：會出戰的勇士，有七千一百人。
12:26 利未支派四千六百人。
12:26 利未支族：四千六百人；
12:27 耶何耶大是亞倫的家的首領，隨伊者有三千七百人。
12:27 亞倫後代的族長耶何耶大及隨伊的有三千七百人；
12:28 閣有少年人撒督是大勇士，及伊本家的族長二十二人。
12:28 勇猛的戰士少年人撒督及伊家族的領袖二十二人。
12:29 便雅憫的支派，就是掃羅的同族三千人，因為到彼時此族大半猶久擁護掃羅的家。
12:29 便雅憫支族：掃羅的親族有三千人；前到今，𪜶大部分擁護掃羅家。
12:30 以法蓮支派的大勇士，佇本族出名者有二萬連八百人。
12:30 以法蓮支族：出名的勇猛戰士，有兩萬空八百人。
12:31 瑪拿西半支派，記名者共一萬八千，攏來設立大衛做王。
12:31 約旦河西旁的瑪拿西半支族：有記錄佇家譜的，一萬八千人，攏擁護大闢作王。
12:32 以薩迦支派，有智識、識時勢，知以色列所著行者𪜶的頭人有二百；𪜶的兄弟攏趁𪜶的命令。
12:32 以薩迦支族：有智識，識時勢，知以色列佇什麼時著做什麼的領袖有兩百人；𪜶的親族攏聽𪜶的命令。
12:33 西布倫有會出陣者，攏𠢕交戰會用逐樣的軍器者，有五萬人，𪜶會排隊伍，無二樣心。
12:33 西布倫支族：會用逐種軍器出陣交戰，真有紀律，對大闢忠誠的有五萬人。
12:34 屬拿弗他利者，有一千個軍長；夯屏牌、攑槍來隨𪜶者有三萬七千人。
12:34 拿弗他利支族：有一千個領袖；攑槍，夯盾牌隨𪜶的，有三萬七千人。
12:35 但的支派，會排陣的二萬八千六百人。
12:35 但支族：會出戰的，有兩萬八千六百人。
12:36 屬亞設的，會出軍排陣的有四萬人。
12:36 亞設支族：會出陣交戰的，有四萬人。
12:37 約但河的東旁流便人、迦得人、瑪拿西半支派的人，攑逐樣的軍器來交戰的有十二萬人。
12:37 佇約旦河東旁，呂便支族、迦得支族、瑪拿西半支族：攑逐種軍器交戰的，有十二萬人。
12:38 諸個戰士攏會排隊伍，誠實心到希伯崙，欲設立大衛做以色列全國的王。以色列其餘的人也同一樣的心欲設立大衛做王。
12:38 諸個戰士攏隨時會當出戰，對大闢忠誠。𪜶來到希伯崙擁護大闢做以色列全國的王；其他的以色列人嘛同心擁護大闢作王。
12:39 𪜶𫢶遐三日久，及大衛相及𫢶也飲也食，因為𪜶的兄弟給𪜶備辦便便。
12:39 𪜶佇遐及大闢做夥三日，亦食亦飲，因為𪜶的親族攏給𪜶備辦好勢。
12:40 倚近𪜶的人直到以薩迦、西布倫、拿弗他利的人將驢、駱駝、騾、牛，載麵粉食物，及無花果餅、葡萄干、酒、油來遐，也有帶牛羊攏真多，因為佇以色列中有大歡喜。
12:40 𪜶附近的人，甚至對以薩迦、西布倫、拿弗他利來的人，攏用驢、駱駝、騾、牛，載食物，有麵粉、無花果乾丸、葡萄乾丸、酒、油，閣帶牛羊來遐，逐項攏真多；因為佇以色列中有大歡喜。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。