上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
24:1 約雅敬的年間，巴比倫王尼布甲尼撒上來；約雅敬服事伊三年，後來反轉背逆伊。
24:1 約雅敬在位的時，巴比倫王尼布甲尼撒來侵犯猶大。約雅敬服事伊三年，後來煞背叛伊。
24:2 耶和華差迦勒底的軍隊、亞蘭的軍隊、摩押的軍隊，及亞捫的軍隊來攻擊伊，閣差𪜶攻擊猶大欲滅伊，照耶和華託伊的奴僕諸個先知所講的。
24:2 上主派巴比倫、敘利亞、摩押，及亞捫的游擊隊來攻擊約雅敬；閣差𪜶攻擊猶大欲給伊毀滅；抵照上主通過伊的僕人眾先知所講的話。
24:3 此個事臨到猶大，實在是對耶和華的命令欲遷徙伊，離開伊的面前，這攏是因為瑪拿西的罪照伊一切所行的；
24:3 此個事臨到猶大，實在是出佇上主的命令，欲將猶大的人民對伊的面前趕走；這攏是因為瑪拿西所犯一切的罪；
24:4 也為著伊流無罪的人的血，因為伊用無罪的人的血充滿耶路撒冷；此個罪耶和華肯赦免。
24:4 伊刣無辜的人，互耶路撒冷四界攏是𪜶的血；此個罪上主毋肯赦免。
24:5 約雅敬其餘的事，見伊所行的豈無攏記佇猶大列王的記錄嗎？
24:5 約雅敬其他的事蹟及伊的所做，攏記載佇《猶大列王史》。
24:6 約雅敬及伊的列祖同睏。伊的子約雅斤續接伊做王。
24:6 約雅敬轉去伊的列祖遐，伊的子約雅斤續接伊作王。
24:7 埃及王無閣對伊的地出來；因為巴比倫有王取見屬埃及王的地，對埃及小河到伯拉河。
24:7 埃及王無閣出兵攻擊外國，因為伊所管的地，對埃及邊界到幼發拉底河，攏互巴比倫王搶去。
猶大國的王約雅斤
24:8 ( 代下 36:9-10 )
約雅斤坐位的時十八歲，佇耶路撒冷做王三月日。伊的老母名叫尼護施她，是耶路撒冷人以利拿單的查某子。
猶大王約雅斤
24:8 ( 代下 36:9-10 )
約雅斤坐位的時十八歲，佇耶路撒冷作王三個月。伊的老母叫做尼護施她，是耶路撒冷人以利拿單的查某子。
24:9 約雅斤行耶和華所看做歹的事，照伊的老父一切所行。
24:9 約雅斤做上主看做歹的事，照伊老父的所做去做。
24:10 彼時，巴比倫王尼布甲尼撒的人臣上來耶路撒冷，圍困彼個城。
24:10 彼時，巴比倫王尼布甲尼撒的人臣上來耶路撒冷，圍困彼個城。
24:11 當伊的人臣圍困城的時，巴比倫王尼布甲尼撒就來。
24:11 當伊的人臣圍困城的時，巴比倫王尼布甲尼撒嘛親身上來。
24:12 猶大王約雅斤出城到巴比倫王遐，伊及伊的老母、及伊的人臣、首領、太監攏去，巴比倫王掠伊。佇伊做王第八年。
24:12 猶大王約雅斤及伊的老母、人臣、將領、官員，攏出城，向巴比倫王投降。巴比倫王將約雅斤掠起來；彼時，是巴比倫王坐位第八年。
24:13 閣將耶和華殿內的寶物及王宮的寶物攏對遐提去，將以色列王所羅門所造耶和華殿內的金器攏拍破，照耶和華所講的話；
24:13 巴比倫王閣將上主殿內及王宮的寶物攏對遐提去，將以色列王所羅門所造上主殿內的金器攏剝落來；抵照上主所講的話。
24:14 閣將耶路撒冷的眾百姓及眾首領，以及所有大權能的勇士，共一萬人，連一切的工匠、鐵匠攏掠去；除國內極喪鄉的人以外，無剩一個；
24:14 伊將耶路撒冷的人民、眾首領，及所有強猛的勇士，共一萬人，連所有的作木師傅及拍鐵師傅嘛攏掠去；只有留國內上喪鄉的人。
24:15 也帶約雅斤到巴比倫、及太后、后妃、太監及國內的大官，攏掠伊對耶路撒冷到巴比倫；
24:15 伊將約雅斤及伊的老母、嬪妃、官員，國內的貴族攏對耶路撒冷掠到巴比倫。
24:16 閣將一切的勇士七千人及工匠、鐵匠一千人，攏是勇壯會上陣的，巴比倫王攏掠伊到巴比倫。
24:16 伊閣將七千個會交戰的勇士，以及一千個作木師傅及拍鐵師傅，攏掠去巴比倫。
24:17 巴比倫王設立約雅斤的叔瑪探雅做王續接伊，換伊的名叫西底家。
24:17 巴比倫王設立約雅斤的阿叔瑪他尼續接作王，給瑪他尼換名做西底家。
猶大國的王西底家
24:18 ( 代下 36:11-12 耶 52:1-3 )
西底家坐位的時二十一歲，佇耶路撒冷做王十一年。伊的老母名哈慕她，是立拿人耶利米的查某子。
猶大王西底家
24:18 ( 代下 36:11-12 耶 52:1-3 )
西底家坐位的時二十一歲，佇耶路撒冷作王十一年。伊的老母叫做哈慕她，是立拿人耶利米的查某子。
24:19 伊行耶和華所看做歹的事，照約雅敬一切所行的。
24:19 伊做上主看做歹的事，照約雅敬的所做去做。
24:20 耶路撒冷及猶大抵著諸個事，是因為耶和華發出受氣欲對伊的面前趕出𪜶。
24:20 耶路撒冷及猶大發生諸個事，是因為上主發受氣，對伊的面前給𪜶趕出去。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。