上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
約西亞廢除異教崇拜
23:1 ( 代下 34:3-7,29-33 )
王差人聚集猶大及耶路撒冷的眾長老。
約西亞的改革
23:1 ( 代下 34:29-33 34:3-7 )
約西亞王派人召集猶大及耶路撒冷的眾長老。
23:2 王就上去耶和華的殿，猶大眾人及徛起耶路撒冷的百姓，及祭司、先知，及眾百姓，無論大細，攏及伊去；王就將耶和華殿內偶然得著約的冊一切的話讀互𪜶聽。
23:2 王上去上主的殿；猶大眾人及耶路撒冷的住民、祭司、先知，及所有的人民，無論大細，嘛攏上去。王就將佇上主殿內發見的約書一切的話讀互𪜶聽。
23:3 王徛佇柱邊，佇耶和華的面前立約，欲盡心盡性順趁耶和華，守伊的誡命、及干證的話、及律例，來成此本冊所記立約的話。百姓攏承認此個約。
23:3 王徛佇柱邊，佇上主的面前立約，欲全心全意順趁上主，遵守伊的誡命、教示，及規例，實行此卷冊所寫立約的話。人民嘛攏決心欲遵守此個約。
23:4 王命令祭司頭希勒家及第二級的祭司，及顧門的官，將為著巴力及亞舍拉，及天頂的萬象所造許個器具，搬出耶和華的殿，燒伊佇耶路撒冷外汲淪溪邊的田，帶伊的火灰到伯特利。
23:4 王命令大祭司希勒家、副祭司，及聖殿的守衛，將為巴力、亞舍拉，及天頂的萬象所造的器具，攏對上主的殿搬出去，佇耶路撒冷外面，汲淪溪谷的山坪放火燒，閣將火灰摒佇伯特利。
23:5 前猶大列王所設立拜偶像的祭司，佇猶大許個城及耶路撒冷四圍的山頭壇燒香的，今王攏𢬳伊，也𢬳許個燒香佇巴力及日、月、行星，以及天頂的萬象的；
23:5 以前猶大列王所設立的祭司，就是佇猶大許個城，及耶路撒冷四圍的山頭壇燒香拜偶像，向巴力燒香，拜日、月、星辰，以及天頂萬象的祭司，約西亞王攏給𪜶廢除。
23:6 伊閣帶亞舍拉出耶和華的殿去耶路撒冷外到汲淪溪佇汲淪溪燒伊，搥伊做粉，用彼個粉撒佇百姓的墓；
23:6 伊閣給亞舍拉女神的柱像對上主的聖殿搬出去，到耶路撒冷外面的汲淪溪谷，佇遐放火燒，錘做火灰，將許個火灰撒佇人民的公墓。
23:7 閣毀耶和華殿內孌童的厝，就是婦女為著亞舍拉織布棚的所在。
23:7 閣拆毀上主殿內男娼的厝，就是婦女為著亞舍拉編織物件的所在。
23:8 閣對猶大許個城帶許個祭司出去，拍垃墋祭司燒香的山頭壇，對迦巴到別是巴，也拆毀許個門的山頭壇，就是佇管城的約書亞的門前，就是人入城門的倒旁。
23:8 約西亞對迦巴到別是巴，將猶大逐個城的祭司召來耶路撒冷，破壞許個祭司燒香的山頭壇。伊閣拆毀約書亞市長所起拜山羊鬼的廟；此個廟佇入城門的倒旁。
23:9 總是山頭壇的祭司佇耶路撒冷無上耶和華的壇，只有佇𪜶兄弟中食無酵餅。
23:9 毋拘山頭壇的祭司無佇耶路撒冷上主的壇服事，只有會當及其他的祭司食無酵餅。
23:10 伊閣拍垃墋佇便欣嫩的陀斐特，免得人佇遐互𪜶的子查某子經過火來獻互摩洛；
23:10 約西亞閣破壞佇欣嫩子山谷的陀斐特廟，才免人佇遐燒𪜶的子查某子獻互摩洛。
23:11 閣除去猶大列王獻互日頭許個馬，佇入耶和華殿的所在，佇太監拿單‧米勒倚近兩廊的厝，閣用火燒日頭許個車。
23:11 伊閣將猶大列王獻互日頭許個馬徙走，燒毀獻互日頭的戰車。諸個馬本來下佇上主聖殿的門邊，倚近太監拿單‧米勒的厝。
23:12 猶大列王佇亞哈斯的樓頂的厝蓋所起的祭壇及瑪拿西佇耶和華殿二個院中所起的壇，王攏毀壞伊，對彼所在遷徙伊，傾伊的粉佇汲淪溪。
23:12 猶大列王佇亞哈斯王宮厝頂所起的祭壇，及瑪拿西佇上主聖殿兩個埕所起的祭壇，約西亞攏給𪜶毀壞，摃碎，將許個幼仔摒佇汲淪溪谷。
23:13 從前以色列王所羅門佇耶路撒冷的頭前、佇邪僻山的正旁所起的山頭壇服事西頓人可惡的亞斯他錄、摩押人可惡的基抹、亞捫人可惡的米勒公的，王攏拍垃墋伊，
23:13 以前以色列王所羅門佇耶路撒冷的東旁，佇毀滅山的南旁，為著服事西頓人可惡的亞斯她錄、摩押人可惡的基抹、亞捫人可惡的摩洛所起的山頭壇，約西亞王攏給𪜶破壞。
23:14 閣毀壞許個柱像，剉許個亞舍拉，將人的骨頭充滿許個所在。
23:14 伊閣毀壞石柱，剉亞舍拉的柱像，用死人的骨頭給許個所在填滿。
23:15 佇伯特利的壇，以及尼八的子耶羅波安互以色列犯罪的所起的山頭廟，今約西亞毀彼個壇及山頭廟，閣燒伊的山頭廟，搥伊成粉，續燒彼個亞舍拉。
23:15 約西亞毀壞伯特利的祭壇，就是尼八的子耶羅波安所起，互以色列犯罪的山頭壇，給祭壇及山頭壇摃甲碎碎，閣燒亞舍拉柱像。
23:16 約西亞越轉身看見山裡許個墓，就差人去提墓內的骨頭，燒佇壇頂，來拍垃墋伊，照耶和華所講就是前宣傳諸個代誌上帝的奴僕所宣傳的。
23:16 伊越頭，看著山裡許個墓，就派人去提墓內的骨頭，𫢶壇頂燒，拍垃墋祭壇。抵抵應驗以前耶羅波安佇節期徛佇壇邊的時，上帝重用的人所宣告上主的話。約西亞閣越頭看著宣告諸個話彼個上帝重用的人的墓，
23:17 約西亞講：「我所看見的石碑是甚麼？」彼個城的人給伊講：「前有上帝的奴僕對猶大來，代先講你現今所做的事來攻擊伯特利的壇的，此個是伊的墓。」
23:17 約西亞問：「我看著的是什麼人的墓牌？」
彼個城的人對伊講：「這是上帝重用的人的墓；伊對猶大來，預言王抵即攻擊伯特利的壇的代誌。」
23:18 伊講：「莫得插伊！人通遷徙伊的骨頭。」𪜶就無動著伊的骨頭，也無動著對撒瑪利亞來彼個先知的骨頭。
23:18 伊講：「給振動。毋通徙伊的骨頭。」𪜶就無去動伊的骨頭，嘛無動著對撒馬利亞來彼個先知的骨頭。
23:19 撒瑪利亞許個城內山頭的厝就是前以色列諸個王所起，來激耶和華的受氣的，今約西亞毀伊，照伊所行佇伯特利的來行佇𪜶；
23:19 以前以色列的列王佇撒馬利亞逐個城起山頭壇激上主受氣，現在約西亞親像伊佇伯特利所做的將許個攏毀壞；
23:20 閣刣死彼所在山頭廟的祭司佇壇頂，也燒人的骨頭佇壇頂，才倒去耶路撒冷。
23:20 閣佇壇頂刣死所有山頭壇的祭司；佇壇頂燒人的骨頭。後來伊倒去耶路撒冷。
約西亞守𨃟過節
23:21 ( 代下 35:1-19 )
王命令眾百姓講：「著守𨃟過節來服事耶和華──恁的上帝，照此個約的冊所記的。」
約西亞守𨃟過節
23:21 ( 代下 35:1-19 )
王命令全國人民，講：「著照此個約書的記載，守𨃟過節服事上主 — 恁的上帝。」
23:22 對士師治理以色列的時及以色列列王、猶大列王的時，實在未有守親像此號的𨃟過節；
23:22 對士師治理以色列，到以色列及猶大列王統治的時，𪜶猶毋曾親像按呢守𨃟過節。
23:23 只有約西亞王十八年佇耶路撒冷守此個𨃟過節服事耶和華。
23:23 只有到約西亞王第十八年才佇耶路撒冷向上主守此個𨃟過節。
約西亞的其他改革
23:24 猶大地及耶路撒冷所有跳童的、做師公的，及家內的偶像及神佛，及一切可惡的物，約西亞攏除伊，來成律法的話，是記佇祭司希勒家佇耶和華的殿所得著的冊所記的。
約西亞其他的改革
23:24 猶大地及耶路撒冷所有牽亡的及童乩桌頭，偶像及家族神像，以及一切可惡的物，約西亞攏給𪜶除掉，照大祭司希勒家佇上主的殿所發見的律法書所記載的話去做。
23:25 佇約西亞以前無有王親像伊盡心、盡性、盡力歸向耶和華，照摩西一切的律法；佇伊以後也無出一個王親像伊。
23:25 佇約西亞以前無王親像伊全心全意全力歸向上主，遵行摩西所有的律法；佇伊以後，嘛無有一個王親像伊。
23:26 總是，耶和華無息伊猛烈的大受氣就是伊對猶大發出的受氣，是因為瑪拿西所激著伊受氣許個事。
23:26 毋拘，因為瑪拿西的所做有激上主受氣，上主無停止伊對猶大所發猛烈的大受氣。
23:27 耶和華講：「我欲遷徙猶大離開我的面前，親像遷徙以色列一樣；我欲棄拺我所揀此個城──就是耶路撒冷及此間殿就是我指伊來講我的名欲佇遐的。」
23:27 上主講：「我欲將猶大對我的面前趕走，親像我曾趕走以色列；我欲棄拺我所揀此個城耶路撒冷，及此間聖殿，就是我曾指伊講：『我的名應該佇遐受敬奉』的所在。」
約西亞逝世
23:28 ( 代下 35:20—36:1 )
約西亞其餘的事，見伊所行的豈無攏記佇猶大列王的記錄嗎？
約西亞死
23:28 ( 代下 35:20-36:1 )
約西亞其他的事蹟及伊的所做，攏記載佇《猶大列王史》。
23:29 約西亞的年間，埃及王法老尼哥上伯拉河攻擊亞述王；約西亞去抵當伊。埃及王抵著約西亞佇米吉多就刣伊。
23:29 約西亞在位的時，埃及王法老尼哥上幼發拉底河，幫贊亞述王，約西亞王出去迎戰；埃及王佇米吉多及約西亞交戰，佇遐給約西亞刣死。
23:30 伊的人臣用車載伊的身屍對米吉多帶伊到耶路撒冷，埋葬佇伊本身的墓。國民將約西亞的子約哈斯用油抹伊設立伊做王，續接伊的老父。
23:30 伊的人臣用車載伊的屍體，對米吉多送倒去耶路撒冷，將伊安葬佇伊家己的墓。猶大的人民用油抹約西亞的子約哈斯，設立伊作王，續接伊的老父。
猶大國的王約哈斯
23:31 ( 代下 36:2-4 )
約哈斯坐位的時二十三歲，佇耶路撒冷做王三月日。伊的老母名哈慕她，是立拿人耶利米的查某子。
猶大王約哈斯
23:31 ( 代下 36:2-4 )
約哈斯坐位的時二十三歲，佇耶路撒冷作王三月日久。伊的老母叫做哈慕她，是立拿人耶利米的查某子。
23:32 伊行耶和華所看做歹的事，照伊的列祖一切所行的。
23:32 約哈斯做上主看做歹的事，照伊的祖先的所做去做。
23:33 法老尼哥關禁伊佇哈馬地的利比拉，互伊無做王佇耶路撒冷，閣互彼國進貢銀一百他連得，金一他連得。
23:33 法老尼哥將伊關佇哈馬地的利比拉，不准伊佇耶路撒冷作王；閣罰猶大國金三十四公斤，銀三千四百公斤。
23:34 法老尼哥設立約西亞的子以利亞敬續接伊的老父約西亞做王，給伊改名叫約雅敬，也帶約哈斯到埃及，伊就死佇遐。
23:34 埃及王尼哥設立約西亞的子以利亞敬續接伊的老父約西亞作王，給伊改名做約雅敬；閣給約哈斯掠去埃及，伊就死佇遐。
猶大國的王約雅敬
23:35 ( 代下 36:5-8 )
約雅敬用銀及金互法老，照法老的命令對彼地方收銀來互伊，強抽彼地方百姓的金銀，逐人照所派定著的，來互法老尼哥。
猶大王約雅敬
23:35 ( 代下 36:5-8 )
約雅敬照埃及王的命令，將金及銀交互伊；約雅敬對全國人民，照𪜶的財力徵收金銀，交互埃及王尼哥。
23:36 約雅敬坐位的時二十五歲，佇耶路撒冷做王共十一年。伊的老母名叫西布大，是魯瑪人毗大雅的查某子。
23:36 約雅敬坐位的時二十五歲，佇耶路撒冷作王十一年。伊的老母叫做西布大，是魯瑪人比大雅的查某子。
23:37 約雅敬行耶和華所看做歹的事，照伊的列祖一切所行的。
23:37 約雅敬做上主看做歹的事，照伊的祖先的所做去做。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。