上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王瑪拿西
21:1 ( 代下 33:1-20 )
瑪拿西坐位的時十二歲，佇耶路撒冷做王共五十五年。伊的老母名叫協西巴。
猶大王瑪拿西
21:1 ( 代下 33:1-20 )
瑪拿西坐位的時十二歲，佇耶路撒冷作王五十五年；伊的老母叫做協西巴。
21:2 伊行耶和華所看做歹的事，學外邦人所行可惡的事，就是耶和華佇以色列的面前所趕出的。
21:2 伊做上主看做歹的事，學許個互上主佇以色列面前趕出的列國所做可惡的事。
21:3 因為伊的老父希西家所毀的山頭壇，伊閣起伊，閣為巴力起壇，做亞舍拉，照以色列王亞哈的所做，閣敬拜天頂的萬象來服事伊；
21:3 伊重建伊的老父希西家所毀壞的山頭壇；照以色列王亞哈的所做，為巴力起祭壇，造亞舍拉的柱像，閣敬拜服事天頂的萬象。
21:4 佇耶和華的殿內起幾若個壇。耶和華曾指此個殿講：「我欲安置我的名佇耶路撒冷。」
21:4 伊佇上主的殿內為著許個神明起幾若個壇；上主曾指此個聖殿，講：「我的名應該佇耶路撒冷受敬奉。」
21:5 伊佇耶和華的殿二個院內為著天頂的萬象起壇，
21:5 瑪拿西佇上主的殿兩個埕內面，為著天頂的萬象起祭壇。
21:6 閣互伊的子經過火，閣有看兆頭，用法術，用跳童者，請師公，行多多耶和華所看做歹的事，來激伊的受氣；
21:6 伊燒伊的子獻做祭，卜卦，行法術，問牽亡的及童乩桌頭；做真多上主看做歹的事，激上主受氣。
21:7 閣佇殿內祀伊所造亞舍拉雕刻的像。此間殿就是耶和華曾對大衛及伊的子所羅門指伊來講：「此間殿及耶路撒冷，就是我佇以色列眾支派中所揀的，我欲安置我的名佇遐，到永遠。
21:7 瑪拿西閣佇殿內𫞼伊雕刻的亞舍拉的像。關係此間聖殿，上主曾對大闢及伊的子所羅門講：「此間聖殿及耶路撒冷，是我佇以色列支族中所揀選的，我的名著佇遮永遠受敬奉。
21:8 以色列人若執守來行我一切所命令𪜶的，照我的奴僕摩西所命令𪜶一切的律法，我就無閣互𪜶的腳移徙離開我所賞賜𪜶列祖的地。」
21:8 以色列人若聽趁我所有的命令，遵行我的僕人摩西所吩咐𪜶一切的律法，我就無閣互𪜶對我所賞賜𪜶列祖的土地受遷徙。」
21:9 總是𪜶無聽趁。瑪拿西引誘𪜶行歹，比耶和華佇以色列人的面前所滅的列國閣卡傷重。
21:9 毋拘𪜶無聽趁；瑪拿西導𪜶做歹，比上主佇以色列人面前所毀滅的列國閣較嚴重。
21:10 耶和華託伊的奴僕許個先知講：
21:10 上主託伊的僕人眾先知講：
21:11 「因為猶大王瑪拿西行諸個可惡的事比伊以前的亞摩利人所行的閣卡歹，閣用伊的偶像互猶大人陷落罪；
21:11 「因為猶大王瑪拿西做諸個可惡的事，比伊以前的亞摩利人的所做閣較歹，閣用伊的偶像互猶大人陷落罪，
21:12 所以耶和華──以色列的上帝按呢講：看啊！我欲降災禍佇耶路撒冷及猶大，互一切聽見的人二個耳孔欲抖起來。
21:12 所以上主 — 以色列的上帝按呢講：『我欲降災禍佇耶路撒冷及猶大，互聽著的人攏驚一趒。
21:13 我欲用量撒瑪利亞的繩線及亞哈的家的墜繩牽佇耶路撒冷的頂面，欲拭耶路撒冷，親像人拭盤，拭了就反仆。
21:13 我欲用量撒馬利亞的繩線及亞哈家的墜繩，牽佇耶路撒冷的頂面；我欲親像人啲拭盤仔按呢拭耶路撒冷，拭了就給伊倒蓋。
21:14 我欲放離我的產業所剩的，將𪜶交佇對敵的手，𪜶欲成做𪜶一切的對敵所掠所搶的；
21:14 我欲棄拺我所賰的子民，將𪜶交互對敵，成做獵物互對敵搶去。
21:15 因為𪜶對恁的列祖出埃及的日，也到今仔日，常常行我所看做歹的事，激我受氣。」
21:15 因為𪜶對𪜶的列祖出埃及彼日到今仔日，常常做我看做歹的事，激我受氣。』」
21:16 瑪拿西互猶大人犯罪，行耶和華所看做歹的事，伊此個罪以外，閣流多多無罪的人的血，滿耶路撒冷，對此角到彼角。
21:16 瑪拿西互猶大人犯罪，做上主看做歹的事；此個罪以外，伊閣流真多無辜的人的血，互耶路撒冷四界攏是血。
21:17 瑪拿西其餘的事，見伊所行的及伊所犯的罪豈無攏記佇猶大列王的記錄嗎？
21:17 瑪拿西其他的事蹟及伊的所做，以及所犯的罪，攏記載佇《猶大列王史》。
21:18 瑪拿西及伊的列祖同睏，埋葬佇伊家己宮內的園就是烏撒的園；伊的子亞們續接伊做王。
21:18 瑪拿西轉去伊的列祖遐了後，安葬佇伊家己宮內的園，就是烏撒的園。伊的子亞們續接伊作王。
猶大國的王亞們
21:19 ( 代下 33:21-25 )
亞們坐位的時二十二歲，佇耶路撒冷做王歷過二年。伊的老母名叫米舒利密，是約提巴人哈魯斯的查某子。
猶大王亞們
21:19 ( 代下 33:21-25 )
亞們坐位的時二十二歲，佇耶路撒冷作王兩年；伊的老母叫做米舒利密，是約提巴人哈魯斯的查某子。
21:20 伊行耶和華所看做歹的事，親像伊的老父瑪拿西所做的；
21:20 伊做上主看做歹的事，親像伊的老父瑪拿西所做的。
21:21 行伊的老父一切所行的路，服事伊的老父所服事許個偶像，
21:21 伊行伊的老父所行的路，服事伊的老父所服事許個偶像，
21:22 棄拺耶和華──伊的列祖的上帝，無行耶和華的道路。
21:22 棄拺上主 — 伊的祖先的上帝，無行上主的道路。
21:23 亞們的人臣背叛伊，刣死王佇王宮內。
21:23 亞們的人臣背叛伊，佇王宮內面給伊刣死。
21:24 總是國民刣死許個背叛亞們王的人，國民就設立伊的子約西亞續接伊做王。
21:24 毋拘國內的人民將許個背叛亞們王的人刣死，設立伊的子約西亞續接伊作王。
21:25 亞們其餘所行的事豈無記佇猶大列王的記錄嗎？
21:25 亞們其他的事蹟攏記載佇《猶大列王史》。
21:26 埋葬佇家己的墓佇烏撒的園。伊的子約西亞續接伊做王。
21:26 人給伊安葬佇烏撒的園內面伊家己的墓。伊的子約西亞續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。