上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
希西家王派人請示以賽亞
19:1 ( 賽 37:1-7 )
希西家王聽見，就拆裂伊的衫，穿麻布，入耶和華的殿；
國王請問以賽亞
19:1 ( 賽 37:1-7 )
希西家王一下聽著𪜶的報告，就拆裂伊的衫，穿麻衫，入去上主的殿。
19:2 差管家的以利亞敬及書記舍伯那，及祭司中的老輩者，攏穿麻布，去見亞摩斯的子先知以賽亞，
19:2 伊派宮廷總管以利亞敬、書記舍伯那，及資深的祭司，攏穿麻衫，去見亞摩斯的子先知以賽亞。
19:3 對伊講：「希西家按呢講：『今仔日是患難、責罰、凌辱的日，是親像子欲出世，也無力通生出。
19:3 𪜶給以賽亞講：「希西家按呢講：『今仔日是患難的日，是受責罰凌辱的日，親像有囝仔欲出世，毋拘無力給生出來。
19:4 豈採耶和華──你的上帝聽見拉伯沙基的話，就是伊的主亞述王差伊來侮慢永活上帝的話，豈採耶和華──你的上帝為著聽見諸個話，就欲責備伊。所以求你為著猶剩的百姓出聲祈禱。』」
19:4 亞述王有派伊的部下總司令來褻瀆永活的上帝，豈採上主 — 你的上帝有聽著，會處罰講諸個話的人。所以，著替留佇遮的人祈禱。』」
19:5 希西家王的人臣就去見以賽亞。
19:5 希西家王的大臣來見以賽亞的時，
19:6 以賽亞對𪜶講：「著按呢對恁的主講，耶和華按呢講：『你聽見亞述王的奴僕褻瀆我的話，免驚𪜶。
19:6 以賽亞對𪜶講：「恁著按呢給恁的主人講：『上主按呢講：毋通因為恁所聽著亞述王的部下對我的誹謗來驚惶。
19:7 看啊！我欲用一個神入伊的心，伊欲聽見風聲就倒轉去本所在。我欲互伊佇本所在倒佇刀下。』」
19:7 看咧，我欲擾亂伊的心，互伊聽著風聲，倒轉去家己的國家；我欲互伊佇遐互人刣死。』」
亞述人閣再威脅
19:8 ( 賽 37:8-20 )
拉伯沙基倒去，抵著亞述王啲拍立拿，因為伊有聽見亞述王離開拉吉。
亞述王閣來恐嚇
19:8 ( 賽 37:8-20 )
總司令聽著亞述王已經離開拉吉去攻擊立拿，就出發去立拿及王會合。
19:9 王聽見講：「古實王特哈加出來欲及你交戰。」就差使者去見希西家，吩咐𪜶講：
19:9 亞述王聽見衣索匹亞王特哈加欲來攻擊𪜶，就派使者去見希西家，吩咐𪜶
19:10 「著給猶大王希西家按呢講：『你所倚靠你的上帝講，耶路撒冷的確無交佇亞述王的手，你莫得互伊欺騙。
19:10 對猶大王希西家講：「毋通互恁所倚靠的上帝騙去，講：耶路撒冷𣍐陷落佇亞述王的手頭。
19:11 看啊，你總有聽見亞述諸個王對列國所行的，是一盡滅伊，總無你猶會得著救嗎？
19:11 恁一定有聽著亞述諸王對列國所做的代誌；𪜶給列國攏剿滅。恁豈有法度避免？
19:12 阮的列祖所毀滅的，就是歌散、哈蘭、利色，及屬提‧拉撒的伊甸人，諸個國的上帝豈曾救𪜶嗎？
19:12 我的祖先毀滅的國家，歌散、哈蘭、利色，以及住佇提拉撒的伯‧伊甸人，𪜶的神明豈有解救𪜶？
19:13 哈瑪的王、亞珥拔的王、西法瓦音城的王、希拿，及以瓦的王攏佇叨落？』」
19:13 哈馬的王、亞珥拔的王、西法瓦音城的王、希拿及以瓦的王佇叨位？」
19:14 希西家對使者的手接著批，讀伊，希西家就上去耶和華的殿，將批排佇耶和華的面前。
19:14 希西家對使者的手接著批，讀了後，就上去上主的聖殿，佇上主的面前將批搋開。
19:15 希西家佇耶和華的面前祈禱講：「坐佇𠼻𡀔兵的中間耶和華──以色列的上帝啊，獨獨你做天下萬國的上帝，你曾創造天地。
19:15 希西家向上主祈禱講：「坐佇天使基路伯頂面的上主 — 以色列的上帝啊，只有你是地上萬國的上帝。你創造天及地。
19:16 耶和華啊，求你俯耳孔來聽！耶和華啊！求你開目睭來看！著聽西拿基立的話，是差使者來侮慢永活的上帝的。
19:16 上主啊，求你俯耳孔聽，開你的目睭看。求你聽西拿基立差使者來講一切褻瀆你活活上帝的話。
19:17 耶和華啊，亞述諸個王果然互列國及𪜶的地變做拋荒，
19:17 上主啊，亞述諸王確實有互列國及𪜶的土地攏荒廢，
19:18 也將𪜶的上帝㧒佇火裡；因為𪜶是上帝，是人的手所造的，柴的，石的，𪜶就剿滅伊。
19:18 給𪜶的神明攏㧒互火燒滅，其實許個毋是神，不過是人的手用柴用石造的。
19:19 耶和華──阮的上帝啊，今我求你救阮脫離伊的手，互天下萬國攏知獨獨你耶和華是上帝！」
19:19 今，上主 — 阮的上帝啊，求你救阮脫離伊的手，互地上萬國攏會知只有你上主是上帝。」
以賽亞傳互王的信息
19:20 ( 賽 37:20-37 )
亞摩斯的子以賽亞就差人去見希西家，講：「耶和華──以色列的上帝按呢講：『你既然因為亞述王西拿基立的緣故祈求我，我有聽見。』
以賽亞互王的信息
19:20 ( 賽 37:21-38 )
亞摩斯的子以賽亞差人去見希西家，講：「上主 — 以色列的上帝按呢講：『你因為亞述王西拿基立的事對我祈禱，我有聽見。
19:21 今論到伊耶和華有按呢講：
錫安的在室女藐視你，恥笑你；
耶路撒冷的查某囝仔對你搖頭。
19:21 關係西拿基立，我上主按呢講：
在室女錫安看輕你，恥笑你；
少女耶路撒冷對你搖頭。
19:22 你凌辱侮慢是誰啊？
出大聲，目睭赫高高攻擊是誰啊？
就是攻擊以色列的聖者！
19:22 你啲侮辱啥人，褻瀆啥人？
你啲對啥人大聲？
你啲對啥人驕傲，給伊看毋上目？
其實你是啲無視我以色列神聖的上帝！
19:23 你差你的使者侮慢主，
講：我導多多戰車上到山尖，
到黎巴嫩極深的所在；
我欲剉彼塊高大的柏香柴及上好的松樹；
我欲到伊極遠歇睏的所在，及伊肥地的樹林。
19:23 你有通過你的使者侮慢主。
你講：我駛真多戰車𬦰上高山，
去到黎巴嫩上高的山尖。
我佇遐剉上高的柏香樹，
剉上好的松樹。
我𬦰到上高的山尖，
進入上茂盛的樹林。
19:24 我有開井飲外邦的水；
我用腳掌踏埃及一切的河互伊乾去。
19:24 我佇外邦挖井，飲𪜶的水。
我嘛用腳蹋埃及所有的河流，
蹋甲河流攏焦去。
19:25 耶和華講，你豈未曾聽見？
我佇源起頭所做，佇古早所定著的嗎？今我成伊，
是互你毀壞堅固的城，變做瓦片坯。
19:25 「『恁豈毋曾聽見？
真早我做此個計劃，
古早就決定，
今已經實現，
就是你互堅固的城堡攏倒壞，
變做荒埔石堆。
19:26 所以其中徛起的百姓氣力真少，
驚惶見誚。
𪜶親像曠野的草，青翠的菜，
親像厝頂的草，
親像猶未大欉就枯焦的稻仔。
19:26 遐的住民攏無力；
𪜶驚惶，見笑。
𪜶親像野地的草，
幼軟的芛，厝尾頂的草，
猶未大欉就焦去。
19:27 你坐落去，你出去，你入來，
你的大受氣我，我攏知。
19:27 「『你住叨位，你出，你入，
你對我的受氣，我攏知。
19:28 因為你大受氣我，
閣因為你驕傲的話𥦁到我的耳孔，
我就欲用我的鈎，鈎你的鼻，
用我的馬咬韁掛佇你的嘴，
互你對原路倒去。
19:28 因為你有對我發受氣，
我有聽著你自高的話；
我欲用鉤仔鉤你的鼻，
用馬咬韁掛佇你的嘴，
互你對來彼條路倒轉去。』
19:29 「希西家啊，此個互你做兆頭：今年恁欲食家己發的物，明年欲食對彼個所出的；到第三年，恁著種作收割，栽種葡萄園，來食伊的果子。
19:29 「希西家，這欲互你做記號：今年，明年，恁攏會食野生的物；第三年，恁會撒種，收成，栽種葡萄，食所結的果子。
19:30 猶大家脫離患難所剩的百姓，欲猶原下面釘根，頂面結果子。
19:30 猶大家逃脫所賰的子民會親像植物，下面釘根，頂面結果子。
19:31 因為欲有剩的百姓對耶路撒冷出來；欲有逃走的人對錫安山來。耶和華的熱心欲成此個事。
19:31 對耶路撒冷欲有賰落來的子民出來，對錫安山欲有人逃脫出來。上主 — 萬軍的統帥的熱誠一定會成全此個事。
19:32 「所以，耶和華論亞述王講：『伊的確𣍐到此個城，也𣍐佇遮射箭，𣍐會夯盾牌到城前，也𣍐起土堆來攻擊伊。
19:32 「所以，關係亞述王，上主有按呢講：『伊𣍐進入此個城，連一支箭嘛𣍐射入來。伊𣍐夯盾牌倚近城，嘛𣍐起土堆攻城。
19:33 伊對彼條路來，欲對彼條路倒去，𣍐會來到此個城。這是耶和華講的。
19:33 伊對叨一條路來，嘛會對彼條路轉去；伊𣍐進入此個城。上主按呢講。
19:34 因為我為著家己的緣故，閣為著我的奴僕大衛的緣故，欲保護此個城來拯救伊。』」
19:34 我為著我的緣故，嘛為著我的僕人大闢的緣故，欲保護解救此個城。』」
19:35 彼暝，耶和華的使者出去，佇亞述營中拍死十八萬五千人。到天光早起來的時，看啊，攏是死的身屍。
19:35 彼暝，上主的天使去亞述軍營，刣死十八萬五千個人。隔早起，人起來，發見逐所在攏是身屍。
19:36 亞述王西拿基立就離開倒去，𫢶佇尼尼微。
19:36 亞述王西拿基立就撤營，倒轉去尼尼微，住佇遐。
19:37 佇伊的上帝尼斯洛的廟敬拜的時，伊的子亞得米勒及沙利色用刀刣伊，𪜶就走到亞拉臘的地。伊的子以撒哈頓續接伊做王。
19:37 有一日，伊佇尼斯洛的廟啲拜伊的神明的時，伊的子亞得米勒及沙利色用刀給伊刣死，然後逃走去亞拉臘的地；伊另外一個子以撒‧哈頓繼承伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。