上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
猶大國的王希西家
18:1 ( 代下 29:1-2 30:1 )
當以色列王以拉的子何細亞三年，猶大王亞哈斯的子希西家坐位。
猶大王希西家
18:1 ( 代下 29:1-2 31:1 )
當以拉的子以色列王何細亞第三年，亞哈斯的子希西家開始做猶大王。
18:2 伊坐位的時二十五歲，佇耶路撒冷做王共二十九年。伊的老母名叫亞比，是撒迦利雅的查某子。
18:2 伊坐位的時二十五歲，佇耶路撒冷作王二十九年；伊的老母叫做亞比雅，是撒迦利亞的查某子。
18:3 伊行耶和華所看做好的事，照伊的祖大衛一切所行的。
18:3 希西家做上主看做好的事，照伊的祖先大闢一切的所做。
18:4 伊廢無山頭壇，毀壞柱像，剉亞舍拉，拍碎摩西所造的銅蛇，因為到彼時以色列人對伊燒香，叫伊做尼忽士但。
18:4 伊廢除山頭壇，毀壞石柱，剉亞舍拉的柱像，拍碎摩西造的銅蛇；因為彼時以色列人猶對銅蛇燒香，叫伊做尼忽士但。
18:5 伊倚靠耶和華──以色列的上帝，佇伊以後猶大列王中無一個會比得伊，伊以前也無。
18:5 希西家倚靠上主 — 以色列的上帝；佇伊以前及以後的猶大列王，無人會當及伊比。
18:6 因為伊結聯佇耶和華，隨伊無離開，執守耶和華所命令摩西的誡命。
18:6 希西家對上主忠誠，無離開伊，執守上主所命令摩西的誡命。
18:7 耶和華及伊佇啲，伊無論去叨落一盡亨通。伊背叛亞述王、無服事伊。
18:7 上主及伊同在，伊無論去叨位，所做的攏順利；伊背叛亞述王，無閣服事伊。
18:8 伊攻擊非利士人，直到迦薩，及伊的境界，對守更樓到堅固的城。
18:8 伊拍敗非利士人，直到迦薩及四圍的地區，對干焦有守望台的庄社到有堡壘的城。
18:9 希西家王第四年，就是以色列王以拉的子何細亞第七年，亞述王撒縵以色上來攻擊撒瑪利亞圍困伊；
18:9 希西家王第四年，就是以拉的子以色列王何細亞第七年，亞述王撒縵以色上來圍攻撒馬利亞。
18:10 到第三年尾就取伊。希西家六年，以色列王何細亞九年，撒瑪利亞互伊取去。
18:10 到第三年年尾，就是希西家第六年，以色列王何細亞第九年，撒馬利亞受攻破。
18:11 亞述王掠以色列人到亞述，安置𪜶佇哈臘及哈博佇歌散河邊的，及瑪代人許個城；
18:11 亞述王將以色列人掠去亞述，互𪜶住佇哈臘、歌散地區的哈博河邊，以及米底亞人的城。
18:12 因為𪜶聽趁耶和華──𪜶的上帝的話，違背伊的約，見耶和華的奴僕摩西所命令的，𪜶聽守伊。
18:12 因為𪜶毋聽趁上主 — 𪜶的上帝的話，違背伊的約；上主的僕人摩西所命令𪜶的，𪜶毋聽趁，毋遵守。
亞述人威脅耶路撒冷
18:13 ( 代下 32:1-19 賽 36:1-22 )
希西家王十四年，亞述王西拿基立上來攻擊猶大一切堅固的城，取伊。
亞述威脅耶路撒冷
18:13 ( 代下 32:1-19 賽 36:1-22 )
希西家王第十四年，亞述王西拿基立上來攻擊猶大所有堅固的城，閣給𪜶佔領。
18:14 猶大王希西家差人去拉吉見亞述王，講：「我有罪啦，求你離開我；見你罰我的，我欲擔當。」對按呢亞述王派猶大王希西家銀三百他連得，金三十他連得。
18:14 猶大王希西家派人去拉吉見亞述王，講：「我有得罪你，求你撤軍離開我；你無論要求什麼，我攏答應。」對按呢，亞述王罰猶大王希西家銀一萬公斤，金一千公斤。
18:15 希西家就將耶和華殿內及王宮府庫所有的銀攏互伊。
18:15 希西家就將上主聖殿及王宮的府庫所有的銀攏互伊。
18:16 彼時，希西家剝耶和華殿門的金及猶大王希西家安佇柱裡許個金，互亞述王。
18:16 希西家閣將上主聖殿門頂的金及伊家己包佇柱頂的金剝落來，交互亞述王。
18:17 亞述王對拉吉差他珥探、拉伯撒利，及拉伯沙基導大隊兵去耶路撒冷，希西家王遐。𪜶上去到耶路撒冷，已經到，就來徛佇頂池的水溝邊，就是佇漂布師傅的田的大路。
18:17 亞述王對拉吉派元帥、將軍，及總司令，帶大軍去耶路撒冷 希西家王遐。𪜶上來到耶路撒冷，徛佇上池的水溝邊，佇漂布場的大路遐。
18:18 𪜶喉叫王的時，就有管家的希勒家的子以利亞敬，及書記舍伯那及史官亞薩的子約亞，出來見𪜶。
18:18 𪜶大聲叫王，就有希勒家的子宮廷總管以利亞敬、書記舍伯那，以及亞薩的子史官約亞，出來見𪜶。
18:19 拉伯沙基對𪜶講：「恁去給希西家講，亞述王，大王按呢講：『你所倚靠的是倚靠甚麼？
18:19 總司令對𪜶講：「去給希西家講，亞述大王按呢講：『你啲靠勢什麼？
18:20 你講有計謀有氣力通交戰，這是空空的話若定。你到底倚靠是誰才背叛我啊？
18:20 你想講有策略及軍力，其實是膨風的話。到底你是靠啥人，竟然敢反叛我？
18:21 看啊，你所倚靠的埃及是彼個𤿎破的蘆竹枴；人若倚伊，就會刺入伊的手。埃及王法老對一切倚靠伊的人也是按呢。
18:21 你所倚靠的埃及是一支斷去的蘆竹仔柺；人若靠伊，手會互伊鑿入去。所有倚靠埃及王法老的人攏會按呢。
18:22 恁若給我講：阮倚靠耶和華──阮的上帝，此個耶和華豈是希西家曾廢伊的山頭壇及伊許個祭壇，也曾對猶大及耶路撒冷的人講：恁著佇耶路撒冷佇此個壇前敬拜的嗎？
18:22 恁若對我講：阮倚靠上主 — 阮的上帝；希西家豈毋是有廢除上帝的山頭壇及祭壇，閣給猶大及耶路撒冷的人講：恁一定著佇耶路撒冷此個祭壇敬拜？』
18:23 今請你用準當互我的主亞述王，我互你二千隻馬，看你彼面會備辦人騎伊抑𣍐。
18:23 今來，來及我的主人亞述王相輸。我互恁兩千隻馬，恁豈有法度尋夠額的人通騎？
18:24 若𣍐，豈可會拍退我的主諸個第一細的奴僕中一個軍長？也竟然倚靠埃及愛得著戰車及馬兵啊？
18:24 若無法度，恁哪會當拍敗我的主上細的一個部下？恁豈欲閣倚靠埃及的戰車及馬兵？
18:25 今我上來攻擊毀滅此個地，豈無耶和華的意思嗎？耶和華吩咐我講：你上去攻擊毀滅此個地。』」
18:25 現在，我來攻擊毀滅此個所在，豈毋是上主的旨意？上主親身給我講：『上去攻取此塊土地，給伊毀滅。』」
18:26 希勒家的子以利亞敬及舍伯那、約亞，對拉伯沙基講：「求你用亞蘭的話及你的奴僕講，因為阮會曉聽；通用猶大的話及阮講，互城頂的百姓耳孔聽見。」
18:26 希勒家的子以利亞敬、舍伯那，及約亞對總司令講：「請用亞蘭話對你的僕人講，阮聽有。請毋通用希伯來話講，驚了互城牆頂的人民聽著。」
18:27 拉伯沙基講：「我的主差我來，豈是對你的主及你講諸個話嗎？豈是對坐佇城頂的人講、互𪜶及恁平平食家己的糞、飲家己的尿嗎？」
18:27 總司令對𪜶講：「恁想講阮主人差我講諸個話，只有欲互恁及恁的國王聽是無？毋是，我嘛欲講互城牆頂的人聽。𪜶及恁仝款著食家己的糞，飲家己的尿。」
18:28 拉伯沙基就徛啲，用猶大的話大聲叫講：「恁著聽亞述王大王的話！
18:28 總司令閣徛起來大聲用希伯來話喝講：「著聽亞述大王的話。
18:29 王按呢講：『恁通互希西家所騙；因為伊𣍐會救恁脫離王的手。
18:29 王按呢講：『毋通互希西家騙去，因為伊𣍐當救恁脫離我的手。
18:30 也莫得聽希西家教恁倚靠耶和華，講耶和華的確欲救咱，此個城的確無交佇亞述王的手。』
18:30 伊叫恁信靠上主，講：上主一定會救咱；此個城𣍐陷落佇亞述王的手。』
18:31 莫得聽希西家的話！因為亞述王按呢講：『恁著及我和好，出來投降我，逐人就通食家己的葡萄樹及無花果樹的果子，飲家己的井水。
18:31 毋通聽希西家的話。亞述王按呢講：『及我講和，出來投降。按呢，恁逐個人就會當食家己種的葡萄及無花果，飲恁家己的井水，
18:32 聽候我導恁到一個地及恁本地無各樣，就是有五穀及新酒的地，有米糧及葡萄園的地，有橄欖油及蜜的地，互恁活啲無死。希西家引誘恁，講耶和華欲拯救咱；恁莫得聽伊的話。
18:32 聽候我導恁到一個所在，親像恁的土地，有五穀及新酒，有米糧及葡萄園，有橄欖油及蜜，互恁活長歲壽。毋通互希西家騙去，伊講：上主一定會救咱。恁毋通聽伊的話。
18:33 列國的上帝豈有一個曾救伊的國脫離亞述王的手嗎？
18:33 萬國的眾神明，叨一個曾救伊家己的國脫離亞述王的手？
18:34 哈瑪及亞珥拔的上帝佇叨落啊？西法瓦音、希拿、以瓦的上帝佇叨落啊？𪜶豈曾救撒瑪利亞脫離我的手嗎？
18:34 哈馬及亞珥拔的神明佇叨位？西法瓦音、希拿、以瓦的神明佇叨位？𪜶豈有解救撒馬利亞脫離我的手？
18:35 諸個國的上帝有是誰曾救家己的國脫離我的手啊？莫卻耶和華豈會救耶路撒冷脫離我的手啊？』」
18:35 諸個國家的神明有叨一個曾對我的手救出伊家己的國家？按呢，上主哪會當救耶路撒冷脫離我的手頭？』」
18:36 百姓靜靜，也無應一句，因為王曾吩咐講：「莫得應伊。」
18:36 毋拘人民攏靜靜，無應半句話，因為希西家王有給𪜶吩咐：「毋通應伊！」
18:37 彼時，希勒家的子管家的以利亞敬及書記舍伯那，及史官亞薩的子約亞，攏拆裂衫，來到希西家遐，將拉伯沙基的話給伊講。
18:37 彼時，希勒家的子宮廷總管以利亞敬、書記舍伯那，及亞薩的子史官約亞，攏拆裂𪜶的衫，對希西家報告亞述的總司令給𪜶講的話。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。