上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
12
猶大國的王約阿施
( 代下 24:1-16 )
耶戶第七年，約阿施坐位，佇耶路撒冷做王歷過四十年。伊的老母名叫西比亞，是別是巴人。
2 約阿施得著祭司耶何耶大教示，一生行耶和華看做好的事；
3 總是山頭廟無廢無，百姓猶獻祭燒香佇山頭廟。
4 約阿施給眾祭司講：「見若獻佇耶和華的殿分別做聖的物所值的銀就是通用的銀，抑是逐人應該納的身價銀，抑是心所願獻佇耶和華殿的銀，
5 祭司逐人著對所識的人收來，修理殿破壞的所在。無論甚麼所在破壞，攏著修理。」
6 總是約阿施王二十三年，祭司猶未修理殿破壞的所在。
7 所以約阿施王召祭司耶何耶大，及其餘的祭司來，給𪜶講：「恁怎樣無修理殿破壞的所在啊？今恁通閣對所識的人收銀，著交出彼個銀，修理殿破壞的所在。」
8 眾祭司答應閣收百姓的銀，也無修理殿破壞的所在。
9 祭司耶何耶大取一個櫃，佇櫃蓋鑿一孔，下佇壇邊，佇入耶和華殿的正旁；把門的祭司將帶入耶和華殿的銀下佇櫃內。
10 𪜶看見櫃內的銀已經多，王的書記及大祭司上來，將耶和華殿內所得著的銀款佇袋仔內來算秤伊。
11 將所秤的銀交互做工的，就是耶和華殿內辦事的人；𪜶就將伊發互修理耶和華殿的木匠及建築的人，
12 及土匠、石匠，也欲買柴料及過拍的石，修理耶和華殿破壞的所在，以及修理殿的雜費。
13 總是彼個帶來入耶和華殿的銀，無用伊來做耶和華殿內的銀杯、剪刀、碗、號頭，及逐號金器銀器，
14 就將彼個銀交互做工的人修理耶和華的殿；
15 閣將銀交互所經手的人互伊發互做工人，無及𪜶算數，因為𪜶做代誌誠實。
16 獨獨補過失祭的銀、贖罪祭的銀無帶入耶和華的殿，是歸祭司。
17 彼時，亞蘭王哈設上去攻擊迦特，提伊，就定著意思上去攻擊耶路撒冷。
18 猶大王約阿施將伊的列祖猶大王約沙法、約蘭、亞哈謝所獻做聖的物及伊本身所獻做聖的物，以及耶和華的殿及王宮府庫所有的金攏送互亞蘭王哈設；伊就無上來耶路撒冷。
19 約阿施其餘的事，見伊所行的豈無攏記佇猶大列王的記錄嗎？
20 伊的人臣起來背叛，刣死約阿施佇落去悉拉米羅的厝。
21 伊的人臣就是示米押的子約撒甲及朔默的子約薩拔刣死伊。人埋葬伊佇大衛的城及伊的列祖像位；伊的子亞瑪謝續接伊做王。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。