上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
25
亞伯拉罕的其他世系
( 代上 1:32-33 )
亞伯拉罕閣娶一個某，名叫基土拉。
2 基土拉給伊生心蘭、約珊、米但、米甸、伊施巴、書亞。
3 約珊生示巴及底但。底但的子孫是亞書利族、利都是族、及利烏米族。
4 米甸的子是以法、以弗、哈諾、亞比大、以勒大。諸個攏是基土拉的子。
5 亞伯拉罕將一切所有的互以撒。
6 亞伯拉罕將財物分互伊諸個細姨的子，趁伊本身猶活的時差𪜶離開伊的子以撒，去東勢到東旁的地。
亞伯拉罕的死及埋葬
7 亞伯拉罕一生的年日是一百七十五歲。
8 亞伯拉罕食長歲壽成做老人，年歲滿足，斷氣死，倒祖。
9 伊的子以撒、以實瑪利將伊埋葬佇麥比拉的穴。此個穴佇幔利的頭前，赫人瑣轄的子以弗崙的田中，
10 就是亞伯拉罕對赫人所買彼區田。亞伯拉罕及伊的某撒拉攏埋葬佇遐，
11 亞伯拉罕死了後，上帝賜福互伊的子以撒。以撒倚近庇耳‧拉海‧萊徛起。
以實瑪利的世系
12 ( 代上 1:28-31 )
亞伯拉罕的子以實瑪利的世系記佇下底。以實瑪利就是撒拉的女婢埃及人夏甲對亞伯拉罕所生的。
13 以實瑪利諸個子的名，照伊的名字世系親像下底。以實瑪利的大子尼拜約，閣有基達、亞德別、米比衫、
14 米施瑪、度瑪、瑪撒、
15 哈大、提瑪、伊突、拿非施、基底瑪。
16 諸個就是以實瑪利的子的名，照𪜶的鄉村、營寨，做十二族的族長。
17 以實瑪利一生的歲壽一百三十七，氣斷死，就倒祖。
18 伊的子孫住佇哈腓拉到埃及頭前的書珥，欲去亞述的路，徛起佇伊眾兄弟的頭前。
以掃及雅各出世
19 亞伯拉罕的子以撒的世系記佇下底。亞伯拉罕生以撒。
20 以撒娶利百加做某的時抵仔四十歲。伊是巴旦‧亞蘭地的亞蘭人彼土利的查某子，亞蘭人拉班的小妹。
21 以撒因為伊的某無生子，替伊祈求耶和華；耶和華允准伊所求，伊的某利百加就懷孕。
22 囝仔佇伊的腹內相夾，伊就講：「若是此款，我乜使按呢？」就去問耶和華。
23 耶和華給伊講：
二國佇你腹內；
二族欲對你的身軀出。
此族欲卡強彼族；
序大的欲服事序細的。
24 生產的日期到，果然腹內是雙生者。
25 頭一個出來者，身體紅紅，通身軀親像皮仔衫，就給伊號名做以掃。
26 隨後伊的小弟閣出來，伊的手擒以掃的腳後㬹，就給伊號名叫雅各。二個子出世的時，以撒抵仔六十歲。
以掃出賣大子的名份
27 二個囝仔漸漸大，以掃𠢕拍獵，常常佇山野；雅各做人恬靜，常常住布棚內。
28 以撒疼以掃，因為常常食伊的野味；利百加疼雅各。
29 有一日，雅各煮湯，以掃對山野倒來，厭倦到極。
30 以掃對雅各講：「我真厭倦，求你用此個紅的湯互我食。」因為按呢以掃亦名叫以東。
31 雅各講：「你今仔日用大子的名份賣互我。」
32 以掃講：「我都欲死啦，此個大子的名份對佇我有啥利益？」
33 雅各講：「今仔日你著對我咒誓。」伊就對伊咒誓，將大子的名份賣互雅各。
34 雅各就將餅及紅豆湯互以掃，伊就飲食，起來做伊去。這就是以掃看輕大子的名份。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。