上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
路加福音
9
十二使徒的使命
( 太 10:1, 5-15 可 6:7-13 )
耶穌召集十二使徒，互𪜶有能力及權柄通制壓攏總的鬼，閣醫好真多病症。
2 然後伊差𪜶出去宣講上帝國的福音，閣醫治病人。
3 伊交代𪜶，講：「出門的時什麼攏毋通帶：毋通帶柺仔；毋通帶旅行袋；毋通帶食物；毋通帶錢；嘛毋通有兩領內衫。
4 恁無論入去叨一間厝，著住佇遐，也對遐離開。
5 𪜶若毋接納恁，恁離開彼個城的時，著將腳裡的土粉拌掉，表示對𪜶警告。」
6 𪜶出去，一庄過一庄傳福音，閣佇逐所在醫好病人。
希律王的不安
7 ( 太 14:1-12 可 6:14-29 )
加利利分封的王希律聽著所發生一切的代誌，心內非常不安，因為有人講施洗者約翰已經對死人中閣活；
8 嘛有人講以利亞有出現；閣有人講古早的一個先知有閣活。
9 希律講：「約翰，我已經給伊斬頭啦，按呢我聽恁啲講此個到底是什麼人？」伊就愛欲見耶穌。
耶穌互五千人食飽
10 ( 太 14:13-21 可 6:30-44 約 6:1-14 )
使徒轉來耶穌遐，將𪜶所做的代誌攏給伊報告。耶穌就干焦導𪜶退去一個叫做伯賽大的城。
11 群眾一下知就隨伊去。耶穌歡迎𪜶，講上帝國的事互𪜶聽，閣醫好許個需要醫治的人。
12 日欲暗的時，十二使徒來給耶穌講：「請給群眾解散，通互𪜶去附近的庄社尋食物及住的所在，因為咱佇遮偏僻無人住。」
13 耶穌給𪜶講：「恁互𪜶食。」
𪜶講：「咱只有五個餅，兩尾魚，若無去買哪有夠通互即多人食？」
14 佇遐差不多有五千個查甫人。
耶穌就對門徒講：「叫𪜶分組坐落去，逐組差不多五十個人。」
15 𪜶照按呢做，叫眾人攏坐落去。
16 耶穌提彼五個餅及兩尾魚，向天感謝，擘開，提互門徒去分互群眾。
17 大家攏食，食到飽。門徒將所賰的碎屑仔攏拾起來，攏總滿十二籃。
彼得宣認耶穌是基督
18 ( 太 16:13-19 可 8:27-29 )
有一遍，耶穌家己一個啲祈禱的時，門徒來尋伊。伊問𪜶講：「眾人講我是什麼人？」
19 𪜶應講：「有人講你是施洗者約翰；毋拘有人講是以利亞；嘛有人講是古早的一個先知閣活。」
20 耶穌閣問𪜶講：「恁咧，恁講我是什麼人？」
彼得應講：「你是上帝設立的基督！」
耶穌預告伊的死及閣活
21 ( 太 16:20-28 可 8:30-9:1 )
耶穌命令𪜶毋通對人講起此個代誌。
22 伊講：「人子一定著受真多苦難，互長老、祭司長，及經學教師拒絕，閣互人害死，第三日上帝會互伊閣活。」
23 耶穌閣對眾人講：「欲隨我的人，著否定家己，逐日夯家己的十字架來隨我。
24 因為欲救家己的性命的，會喪失性命；為著我的緣故喪失家己的性命的，伊會救著性命。
25 人得著全世界煞喪失家己，抑是毀滅家己，有什麼利益？
26 對我及我的話感覺見笑的人，人子佇伊家己及父以及聖天使的榮光中來臨的時，嘛會因為此個人感覺見笑。
27 我實在給恁講，徛佇遮的人，有的猶未死以前會看見上帝國。」
耶穌改變形像
28 ( 太 17:1-8 可 9:2-8 )
諸個話講了，差不多八日後，耶穌導彼得、約翰，及雅各上山去祈禱。
29 伊啲祈禱的時，面貌改變，伊的衫變甲白鑠鑠。
30 忽然間，有兩個人，就是摩西及以利亞，來及耶穌講話。
31 𪜶佇榮光中出現，談論耶穌啲欲佇耶路撒冷死來完成使命的事。
32 彼得及伊的同伴悿甲睏去。𪜶一下醒，看見耶穌的榮光以及及伊徛做夥彼兩個人。
33 𪜶啲欲離開耶穌的時，彼得給耶穌講：「老師，咱佇遮真好，阮來搭三間寮仔，一間互你，一間互摩西，一間互以利亞。」伊毋知家己啲講什麼。
34 伊啲講諸個話的時，有一片雲來，給𪜶罩啲；𪜶互雲包圍的時，起驚惶。
35 有聲對雲出來，講：「此個是我的子，我所揀選的，恁著聽趁伊。」
36 彼個聲講了，干焦賰耶穌一個佇遐。有一段時間，門徒攏恬恬，無給人講起𪜶所看見的代誌。
耶穌醫好邪神附身的囝仔
37 ( 太 17:14-18 可 9:14-27 )
隔日，𪜶對山頂落來的時，有歸大陣人來迎接耶穌。
38 彼時，群眾的中間有一個人喝講：「先生，我此個後生求你給伊看一下，伊是我的孤子。
39 鬼一下附身，伊隨時亂喝。鬼互伊抽惙，哹白波涎，閣給伊傷害，攏毋放伊煞。
40 我有請你的門徒給鬼趕出去，𪜶攏無法度。」
41 耶穌應講：「唉啊，毋信閣腐敗的世代！我著及恁住偌久？我著忍耐恁偌久？給你的後生導來遮。」
42 伊互人導來的時，鬼給伊摔倒，互伊抽惙。耶穌就責備邪神，醫好彼個囝仔，將伊交互老父。
43 眾人對上帝偉大的權能感覺真著驚。
耶穌閣預告伊的死
44 ( 太 17:22-23 可 9:30-32 )
「諸個話恁著注意聽：人子啲欲互人出賣交佇人的手頭。」
45 不過門徒無明白此句話，因為意思有對𪜶蓋起來互𪜶𣍐了解，𪜶嘛毋敢問耶穌此句話的意思。
什麼人上大
46 ( 太 18:1-5 可 9:33-37 )
門徒互相爭論什麼人上大。
47 耶穌知𪜶心內啲爭論什麼，就牽一個囝仔來徛佇伊身邊，
48 然後給𪜶講：「無論什麼人為著我的名接納此個囝仔，就是接納我；接納我的就是接納差我來彼位。恁眾人中間上細的就是上大。」
無反對恁就是為恁
49 ( 可 9:38-40 )
約翰講：「老師，阮有看著一個人奉你的名趕鬼，阮給伊阻擋，因為伊無及阮隨你。」
50 耶穌給伊講：「毋通給伊阻擋，因為無反對恁的就是為恁。」
撒馬利亞人拒絕耶穌
51 耶穌受接上天的日子啲欲到，就決意欲去耶路撒冷。
52 伊差派使者代先去。𪜶入去撒馬利亞人的庄頭，為著耶穌準備。
53 彼所在的人無歡迎耶穌，因為伊欲去耶路撒冷。
54 伊的門徒雅各及約翰看著，就講：「主啊，阮對天頂叫火落來給𪜶毀滅好無？」
55 耶穌越過來，給𪜶責備。
56 𪜶就去別個庄頭。
欲隨耶穌的人
57 ( 太 8:19-22 )
𪜶佇路中的時，有一個人對耶穌講：「你無論去叨位，我攏欲隨你。」
58 耶穌給伊講：「狐狸有孔，空中的鳥有巢，不過人子連靠頭殼的所在都無。」
59 耶穌閣對另外一個人講：「來隨我！」
彼個人應講：「主啊，聽候阮序大人百歲年老，我就來隨你。」
60 耶穌應講：「互死人去埋葬𪜶家己的死人。不過，你著去宣講上帝國的福音。」
61 閣有一個人講：「主啊，我欲隨你；不過互我代先轉去厝裡及家內的人相辭。」
62 耶穌對伊講：「手按佇犁尾猶直直越頭看後面的人無適合上帝國。」
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。