上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
4
呼召以色列悔改
耶和華講：以色列啊，
你若肯倒來，就倒來我遮，
若對我的面前除去你可惡的事，亦無凊彩行。
2 亦照誠實、公平、公義，
指耶和華的永活來咒誓；
就列國欲對伊來家己求福氣，
亦欲因為伊來誇口。
3 耶和華對猶大人及耶路撒冷按呢講：
著開墾恁的土地，
莫得撒種佇莿帕內。
4 猶大人及耶路撒冷徛起的百姓啊，
恁著給本身行割禮，歸佇耶和華，
除去心內的私慾；
驚了我的受氣因為恁所行的歹來發作，
親像火𤏸起來，
甚至無人會拍熄！
外患威脅猶大
5 恁著傳佇猶大，
報佇耶路撒冷講：
恁著佇國內歕哨角，大聲叫講：
恁著聚集！
咱通進入堅固的城！
6 應該向錫安竪大旗。
著逃走，通停腳，
因為我欲互災禍及大的毀壞對北方來。
7 有獅對艷的樹林中上來，
毀壞列國的。
伊已經起身出伊的本所在，
欲互你的地拋荒，
互你的城荒廢無人徛起。
8 為著按呢，恁的腰著縖麻布，大聲啼哭，
因為耶和華的大受氣無對咱越倒轉。
9 耶和華講：「到彼日，君王的心，貴族的心，攏欲消滅；祭司攏欲生驚，先知攏欲卬愕。」
10 我講：「唉啊！主耶和華啊，你真正是大大欺騙此個百姓及耶路撒冷，給𪜶講：『恁欲得著平安。』其實刀劍害著𪜶的生命。」
11 彼時，欲有話對此個百姓及耶路撒冷講：「欲有熱熱的風對曠野光裸裸高的所在向我的眾百姓吹來，是欲簸伊，亦是欲互伊清氣。
12 欲有閣卡大的風為著我吹來；今我閣欲發出判詞，來攻擊𪜶。」
猶大受對敵圍困
13 看啊，伊欲親像雲起來；
伊的戰車親像捲螺風，
伊的馬比鷹鳥卡緊。
有災禍啊！
因為咱敗無啦！
14 耶路撒冷啊，你著洗清你的心來除去歹，
互你通得著救。
歹念頭存佇你的心內欲到底時啊？
15 有聲對但傳報，
對以法蓮山報災禍。
16 恁著傳互列國，
報告攻擊耶路撒冷的代誌講：
有圍困城者對遠遠的所在來，
出𪜶的聲攻擊猶大諸個城。
17 𪜶周圍攻擊伊，
親像顧園的人，
因為伊背叛我。
這是耶和華講的。
18 你的所行，你的所做，致到你有諸個事；
這是你的罪惡，
實在是苦，
是害到你的心！
耶利米為同胞擔憂
19 我的臟腑啊，我的臟腑啊，我的心痛疼！
我的心佇我的內面迫腹。
我𣍐會靜靜無講話，
因為我已經聽見哨角的聲，交戰的喝喊。
20 人啲報毀壞，閣毀壞，
因為全地敗壞。
我的布棚忽然敗壞；
我的帳帷霎仔久破裂。
21 我看見大旗，聽見哨角的聲，
欲到偌久啊？
22 我的百姓愚戇，識我；
𪜶是愚戇無聰明的子；
行歹就𠢕，行好就頇顢。
耶利米的異象──啲欲來臨的毀滅
23 先知講：我看地，
看啊，地是空空混沌；
我看天，天亦無光。
24 我看許個大山，看啊，𪜶攏振動，
小山亦攏搖來搖去。
25 我閣看，看啊，攏無人；
空中的飛鳥亦攏飛走。
26 我閣看伊，看啊，肥的田變做拋荒的地；
一切的城佇耶和華的面前，
因為伊的大受氣攏總倒壞。
27 因為耶和華按呢講：全地的確拋荒，
總是我無欲毀滅到盡。
28 因為按呢，地欲憂悶，
天頂也欲黑暗；
我已經講伊，已經定著伊，
的確無退悔，也無越轉意思做伊。
29 逐個城的人因為馬兵及射箭的人的嘩嘩哮，就攏逃走，
進入樹林，爬上石磐頂；
逐個城抵著棄拺，
無人徛起。
30 你衰敗的時欲怎樣做？
雖然穿朱紅的衫，
用金器妝飾，
用色料畫你的目睭，
按呢展好看是空空！
戀愛你者看輕你，
續數想你的生命。
31 因為我聽見聲，親像生子的婦仁人，
親像生頭上子的艱苦，
就是錫安查某子的聲；
伊喘大氣，展開手，
講：我有災禍啊！
因為我的神魂為著刣人的來昏去。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。