上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
8
書念的婦仁人閣得著產業
以利沙曾互一個婦仁人的子閣活；伊對此個婦仁人講：「你及你全家趕緊去住佇會當生活的所在，因為上主欲互飢荒臨到此個所在七年久。」
2 婦仁人就照上帝重用的人的話，及伊全家出發去非利士人的地，佇遐住七年。
3 七年滿，彼個婦仁人對非利士人的地倒來。伊為著欲收回家己的厝宅田園去見王。
4 彼時，王及上帝重用的人的僕人基哈西啲講話；王講：「請你將以利沙所做一切的大事給我講。」
5 基哈西啲給王講以利沙按怎互死人閣活的時，抵好以利沙互伊的子閣活的彼個婦仁人，為著欲收回伊的厝宅田園來見王。基哈西講：「我的主我的王，此個就是彼個婦仁人；彼個是伊的子，以利沙有互伊閣活。」
6 王問彼個婦仁人，伊就給王講；王就為著伊派一個官員，講：「所有屬此個婦仁人的攏著還伊；對伊離開本地彼日到今仔日，伊的田園所出產的，嘛攏著還伊。」
以利沙及便‧哈達王
7 以利沙來到大馬士革，抵好敘利亞王便‧哈達啲破病；有人對王報告，講：「上帝重用的人來佇遮。」
8 王就對哈薛講：「你帶禮物去見上帝重用的人，拜託伊問上主，看我此個病會好𣍐？」
9 哈薛就去見以利沙。伊用四十隻駱駝載大馬士革逐款的好物做禮物，徛佇以利沙的面前，講：「你的子敘利亞王便‧哈達派我來你遮，請問你：『我此個病豈會好？』」
10 以利沙給伊講：「你去回復伊，講：『你的病一定會好。』毋拘上主指示我，伊一定會死。」
11 以利沙直直看哈薛，看甲伊毋知欲按怎。以利沙開始哮。
12 哈薛講：「我的主，你是按怎啲哮？」
以利沙講：「因為我知你會按怎傷害以色列人；放火燒𪜶的堡壘，用刀刣死𪜶的少年人，摔死𪜶的嬰仔，破開有身的婦仁人。」
13 哈薛講：「你的僕人算啥，不過是一隻狗，哪會當做此款大代誌？」
以利沙應講：「上主指示我，你會做敘利亞王。」
14 哈薛離開以利沙，倒去伊的主人遐；主人問伊講：「以利沙給你講什麼？」
伊應講：「伊給我講，你的病一定會好。」
15 隔日哈薛提厚的布搵水，蓋王的面，給伊翕死。哈薛就續接伊作王。
猶大王約蘭
16 ( 代下 21:1-20 )
亞哈的子以色列王約何蘭第五年，約沙法的子約蘭開始做猶大王。
17 約蘭坐位的時三十二歲，佇耶路撒冷作王八年。
18 伊行以色列諸王的路，所做及亞哈家仝款；因為伊娶亞哈的查某子做某，做上主看做歹的事。
19 毋拘上主因為伊的僕人大闢的緣故，毋甘滅猶大。上主照伊對大闢的應允，永遠賞賜一葩燈互大闢及伊的子孫。
20 約蘭作王的時，以東背叛猶大，脫離猶大的統治，設立𪜶家己的王。
21 約蘭帶所有的戰車過去撒益，煞受包圍。約蘭暝時起來，突破包圍伊的以東人及戰車長；毋拘猶大軍兵逃走，逐個倒去𪜶兜。
22 按呢，以東人背叛猶大，脫離猶大的統治到今仔日。像彼時，立拿嘛背叛。
23 約蘭其他的事蹟及伊的所做，攏記載佇《猶大列王史》。
24 約蘭轉去伊的列祖遐，及伊的列祖安葬佇大闢城。伊的子亞哈謝續接伊作王。
猶大王亞哈謝
25 ( 代下 22:1-6 )
亞哈的子以色列王約何蘭十二年，約蘭的子亞哈謝開始做猶大王。
26 亞哈謝坐位的時二十二歲，佇耶路撒冷作王一年。伊的老母叫做亞她利雅，是以色列王暗利的查某孫。
27 伊行亞哈家的路，做上主看做歹的事，及亞哈家仝款；因為伊是亞哈家的子婿。
28 亞哈謝及亞哈的子約何蘭做夥去基列的拉末，及敘利亞王哈薛交戰；敘利亞人拍傷約何蘭。
29 約何蘭王倒去耶斯列，欲醫治伊佇拉末及敘利亞王哈薛交戰的時所受的傷。約蘭的子猶大王亞哈謝落去耶斯列，探訪亞哈的子約何蘭，因為伊破病。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。